ႁႅင်းၵၢၼ်တႆး ၸိူဝ်းၶဝ်ႈမႃးႁဵတ်းၵၢၼ်ၼႂ်းမိူင်းထႆး ႁူမ်ႈၵၼ် 85 ၵေႃႉ ဢွၼ်ၵၼ်ပွၵ်ႈၶိုၼ်းမိူင်းတႆး၊ မိူဝ်းယူႇၶိုၼ်း ဝၢၼ်ႈၵဝ်ႇၽႂ်မၼ်း ၼႂ်းမိူင်းတႆး ပွတ်းႁွင်ႇ၊ ပွတ်းဢွၵ်ႇ၊ ပွတ်းၸၢၼ်း။


ဝၼ်းတီႈ 20/08/2017 ၵၢင်ၶမ်ႈၶွၼ်ႇၵၼ်တီႈဝတ်ႉမႂ်ႇသေ ဢွၵ်ႇယၢၼ်မိူင်းၵွၵ်ႇ ဝၼ်းတီႈ 21/08/2017 ယၢမ်းၵၢင်ၼႂ်ၸဝ်ႉ 5 မူင်း ၵေႃပွင်ၵၢၼ် ၽွမ်ႉႁူမ်ႈပီႈ ၼွင်ႉတႆး မိူင်းၵွၵ်ႇ၊ တူဝ်တႅၼ်းပႃႇတီႇတႆး 2 ပႃႇတီႇ လႄႈ တပ်ႉသိုၵ်း 2 တပ်ႉသိုၵ်း ႁူမ်ႈၵၼ်ၸွမ်းသူင်ႇ/ႁပ်ႉတွၼ်ႈ ႁႅင်းၵၢၼ်တႆး တီႈလႅၼ်လိၼ် ထႆး-တႆး ၸႄႈဝဵင်းမႄႈသၢႆ သေ ပွၵ်ႈၸူးဝဵင်းတႃႈၶီႈလဵၵ်း။

ၼၢင်းထူၺ်းဢိင်ႇ ၽူႈၵပ်းသၢၼ်တိတ်းတေႃႇ/ ႁပ်ႉသဵၼ်ႈသၢႆမၢႆ ၸုမ်းၵေႃပွင်ၵၢၼ်ၽွမ်ႉႁူမ်ႈ ပီႈၼွင်ႉတႆး  မိူင်းၵွၵ်ႇ လၢတ်ႈဝႃႈ “ ယူႇတီႈႁဝ်းၶႃႈ လႆႈႁၢင်ႈႁႅၼ်းသေ သူင်ႇပီႈၼွင်ႉႁႅင်းၵၢၼ်တႆးႁဝ်းပွၵ်ႈမိူဝ်းၼႆႉ မီး 2 ပွၵ်ႈယဝ်ႉ။ မိူဝ်ႈၵမ်း ဢွၼ်တၢင်းၼႆႉ လႆႈသူင်ႇပွၵ်ႈမိူဝ်း 33 ၵေႃႉ။ ပွၵ်ႈၵမ်းၼႆႉသမ်ႉ မီး 85 ၵေႃႉ။ ဢၼ်ပီႈၼွင်ႉႁႅင်းၵၢၼ်တႆးႁဝ်း ပွၵ်ႈၼႆႉ မၢင်ၵေႃႉ ဢမ်ႇမီးဝတ်းဝႂ်သင်၊ မၢင်ၵေႃႉ ဝတ်းမူတ်းဢႃယု၊ မၢင်ၵေႃႉ ဢမ်ႇမီး ပေႃႈလဵင်ႉ/မႄႈလဵင်ႉ (ၼၢႆး ၸၢင်ႈ)။ လိူဝ်ၼၼ်ႉ မၢင်ၵေႃႉ ၶဝ်ႈမႃးႁဵတ်းၵၢၼ် ၼႂ်းမိူင်းထႆးႁိုင် ယဝ်ႉသေ ၶႂ်ႈပွၵ်ႈမိူဝ်း ႁဵတ်းၵၢၼ်ႁႃ ၵိၼ်တၢင်း မိူင်းတႆး လႄႈၸင်ႇ ပွတ်းမိူင်းႁဝ်းၶိုၼ်း ၸဵမ်ၸိူဝ်းၼႆႉ” ဝႃႈၼႆ။


ပီႈၼွင်ႉႁႅင်းတႆး 85 ၵေႃႉ ဢၼ်ဢွၼ်ၵၼ်ပွၵ်ႈၶိုၼ်းၵမ်းၼႆႉ  ၵမ်းၼမ် ႁဵတ်းၵၢၼ် မိူင်းၵွၵ်ႇ၊ ၶျူၼ်းပူးရီးလႄႈ ရယွင်း ၸိူဝ်းၼႆႉ ဝႃႈၼႆ။


ၼၢင်းထူၺ်းဢိင်ႇ သိုပ်ႇလၢတ်ႈဝႃႈ ႁဝ်းၶႃႈ လႆႈၵပ်းသိုပ်ႇဝႆႉတီႈ ပႃႇတီႇတႆး 2 ပႃႇတီႇ၊ တပ်ႉသိုၵ်းတႆး 2 တပ်ႉသိုၵ်း ဢၼ်ၸဝ်ႈၼႃႈတီႈၶဝ် မီးတၢင်းၾၢႆႇ ၸႄႈဝဵင်းတႃႈၶီႈလဵၵ်းယဝ်ႉ။ သင်ဝႃႈ ပီႈၼွင်ႉႁႅင်းၵၢၼ်တႆးႁဝ်း ၽႅဝ်ႁွတ်ႈ တင်း ၾင်ႇတႃႈၶီႈလဵၵ်းယဝ်ႉၸိုင် ပႃႇတီႇတႆး၊ တပ်ႉသိုၵ်းတႆး တေႁၢင်ႈႁႅၼ်းလူတ်ႉၵႃး သူင်ႇပီႈၼွင်ႉႁႅင်းၵၢၼ်တႆးႁဝ်း ႁႂ်ႈ ႁွတ်ႈၽႅဝ်ၶိုၼ်းႁိူၼ်းၽႂ် ဝဵင်းမၼ်း ဝႃႈၼႆ။


မိူဝ်ႈ ဝၼ်းတီႈ 17/07/2017  ပွၵ်ႈဢွၼ်တၢင်း 1 ၼၼ်ႉ လႆႈႁၢင်ႈႁႅၼ်း သူင်ႇပီႈၼွင်ႉႁႅင်းၵၢၼ်တႆး ပွၵ်ႈမိူဝ်းယဝ်ႉၵမ်းၼိုင်ႈ တႃႇၵူၼ်း 33 ၵေႃႉ၊ ၼၼ်ႉၵေႃႈ သူင်ႇပွၵ်ႈၶိုၼ်းတၢင်း ၸႄႈဝဵင်းမႄႈသၢႆ- တႃႈၶီႈလဵၵ်း ၵူၺ်းၼင်ႇၵဝ်ႇ ဝႃႈၼႆ။


ၵဵဝ်ႇၵပ်းလွင်ႈၼႆႉ ၵေႃပွင်ၵၢၼ်ၽွမ်ႉႁူမ်ႈပီႈၼွင်ႉတႆး မိူင်းၵွၵ်ႇ ႁူမ်ႈတင်း ပႃႇတီႇႁူဝ်သိူဝ်(SNLD) ၊ ပႃႇတီႇသိူဝ်ၽိူၵ်ႇ (SNDP) ၊ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လႄႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး SSPP/SSA  လႆႈသၢၼ်မိုဝ်းၵၼ်သေ ၸွႆႈထႅမ်ႁႅင်းၵၢၼ်တႆး ၸိူဝ်းတူၵ်း တၢင်းယၢပ်ႇ ၼႂ်းမိူင်းထႆး ႁႂ်ႈပေႃး လႆႈပွၵ်ႈၶိုၼ်းမိူင်းတႆး- ဝႃႈၼႆ။


သင်ဝႃႈ ပီႈၼွင်ႉႁႅင်းၵၢၼ်တႆး မီးတၢင်းယၢပ်ႇၽိုတ်ႇ လွင်ႈတေပွၵ်ႈမိူဝ်းၶိုၼ်းႁိူၼ်းယေး ၽႂ်မၼ်းၸိုင် ၵပ်းသိုပ်ႇလႆႈတီႈ မၢႆၾူၼ်း 085-360-0495၊ 085-162-1097၊ 086-886-4359၊ 089-697-0016၊ 085-377-6769၊ 092-402-4333၊ 080-559-0325 လႄႈ 081-449-4260 ၸဵမ်ၸိူဝ်းၼႆႉ။