ၶွမ်ႊမတီႊ ၸုမ်းပၵ်းတႃပႂ်ႉတူၺ်း လွင်ႈငမ်းယဵၼ် JMC-S လူင်းပိုၼ်ႉတီႈႁူပ်ႉထူပ်း ၵူၼ်းမိူင်းတႆး ပွတ်းၸၢၼ်း လၢႆၸႄႈဝဵင်း သပ်းလႅင်းၼႄ လွင်ႈပိူင်ၸုမ်း JMC၊ NCA၊ ၊ COC ၸဵမ်ၸိူဝ်းၼႆႉ ဝႃႈၼႆ။


ၶွမ်ႊမတီႊပၵ်းတႃပႂ်ႉတူၺ်း လွင်ႈငမ်းယဵၼ် JMC-S ၼႆႉ လူင်းႁူပ်ႉထူပ်း ၵူၼ်းမိူင်း ၼႂ်းၸိုင်ႈတႆး လၢႆလၢႆတီႈ မိူၼ်ၼင်ႇ ၸႄႈဝဵင်းမိူင်းၵိုင်၊ ၸႄႈဝဵင်းလၢႆးၶႃႈ လႄႈ ၸႄႈဝဵင်းပၢင်လူင် ၸဵမ်ၸိူဝ်းၼႆႉ။ ဝၼ်းတီႈ 18/08/2017 သမ်ႉ သိုပ်ႇႁူပ်ႉထူပ်း ၵူၼ်းမိူင်းထႅင်ႈ တီႈၸႄႈဝဵင်းၼမ်ႉၸၢင် ဝႃႈၼႆ။


ၼႂ်းၶွမ်ႊမတီႊ ၸုမ်းပၵ်းတႃပႂ်ႉတူၺ်း လွင်ႈငမ်းယဵၼ် JMC-S ၼႆႉ ပႃးတူဝ်တႅၼ်းၾၢႆႇတပ်ႉသိုၵ်းၸိုင်ႈတႆး RCSS/SSA သေတႃႉ ယွၼ်ႉမွၵ်ႇမႃး ၸမ်ႈၸုတ်ႇႁႅင်းၼႃႇလႄႈ RCSS ဢမ်ႇလႆႈၶဝ်ႈႁူမ်ႈပႃး ဝႃႈၼႆ။

ၸဝ်ႈသိုၵ်းၸၢႆးဢူး ၽူႈမီးပုၼ်ႈၽွၼ်း လုမ်းၵပ်းသၢၼ်ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ဢၼ်ပၵ်းလုမ်းဝႆႉတီႈဝဵင်းတူၼ်ႈတီး လၢတ်ႈဝႃႈ “ ႁဝ်းဢမ်ႇလႆႈႁူႉၵၼ်ဝႆႉထႃႈဢွၼ်တင်း ၵူၼ်းႁဝ်းၵေႃႈပႆႇတူဝ်ႈတၼ်း ႁဝ်းဢမ်ႇလႆႈၵႂႃႇႁူမ်ႈ။ ၶဝ်မွၵ်ႇမႃး တင်းၾူၼ်းဢဝ်။ ပေႃးတူၺ်းဢဝ်ၼႆႉသေ ယူႇတီႈႁဝ်းႁၼ်ထိုင်ဝႃႈ JMC-S ၼႆႉဢမ်ႇပႃးႁဝ်းၵေႃႈ ၶဝ်တေႁဵတ်းၵႂႃႇ တိၵ်းတိၵ်း၊ ပေႃးၸိူင်ႉၼႆ မၼ်းဢမ်ႇမိူၼ်ၾၢင်ႁၢင်ႈႁူမ်ႈၵၼ်၊ ပွင်ႇဝႃႈ ၸွမ်းၼင်ႇဢၼ်ၶဝ် ၶႂ်ႈႁဵတ်းၼၼ်ႉ ၶဝ်တေႁဵတ်း ၵႂႃႇတိၵ်းတိၵ်း မၼ်းၼႄဝႃႈၸိူင်ႉၼၼ်ဝႆႉ။ တီႈတႄႉမၼ်းၼႆႉ ၺႃးမိူဝ်ႈႁဝ်းဢမ်ႇတူဝ်ႈတၼ်း ၵေႃႈၶဝ်သမ်ႉႁဵတ်းၵႂႃႇ ယူႇ မၼ်းၵေႃႈပွင်ႇဝႃႈၸိူင်ႉၼၼ်ဝႆႉ” ဝႃႈၼႆ။


ဝၼ်းတီႈ 17/08/2017 ယၢမ်းၵၢင်ၼႂ် ၸွမ်ႁၢၼ်တၢၼ်းလၢႆႇ ၽူႈၵွၼ်းတိူင်းသိုၵ်းၶူဝ်လမ် ႁူဝ်ပဝ်ႈၶွမ်ႊမတီႊ ပႂ်ႉတူၺ်းလွင်ႈငမ်းယဵၼ် ၸၼ်ႉၸႄႈမိူင်း JMC-S ဢိၵ်ႇၽူႈမီးပုၼ်ႈၽွၼ်းလၢႆလၢႆၵေႃႉ လူင်းပိုၼ်ႉတီႈ ႁူပ်ႉထူပ်း ၵူၼ်းမိူင်း တီႈဝၢၼ်ႈၵိဝ်ႇယူမ်း ၸႄႈဝဵင်းပၢင်လူင် ၸိုင်ႈတႆးပွတ်းၸၢၼ်း မီးၽူႈၶဝ်ႈႁူမ်ႈ 100 ပၢႆ။


ၼၢင်းမျႃႉထူၺ်း ၽူႈတႅၼ်းသၽႃးၸႄႈဝဵင်းလွႆလႅမ် ၶဵတ်ႇလိူၵ်ႈတင်ႈ မၢႆ( 2) လၢတ်ႈဝႃႈ “ ဢၼ်ၸုမ်း ပၵ်းတႃပႂ်ႉတူၺ်း လွင်ႈငမ်းယဵၼ် JMC-S မႃးႁူပ်ႉထူပ်းၵူၼ်းမိူင်းၼႆႉ ၶဝ်မႃးသပ်းလႅင်းၼႄ ပေႃးမီးပၢင်တိုၵ်းၸိုင် ၸုမ်းလႂ်ပူၼ်ႉပႅၼ်ၼႆ ႁႂ်ႈၵူၼ်းမိူင်းတိူင်ႇလၢတ်ႈပၼ် ႁႂ်ႈပေႃႈမႄႈၵူၼ်းမိူင်းလႆႈႁပ်ႉႁူႉဝႆႉ၊ ထႅင်ႈလွင်ႈၼိုင်ႈၵေႃႈ တိုၵ်းသူၼ်းထိုင် ႁႂ်ႈပေႃႈမႄႈၵူၼ်းမိူင်း ၶဝ်ႈႁူမ်ႈပႃးၸွမ်း ၶဝ်ႈလၢတ်ႈၸွမ်း။ သင်ဝႃႈ ပေႃႈမႄႈၵူၼ်းမိူင်းၶဝ်ႈႁူမ်ႈၸွမ်း တႃႇတေလႆႈလွင်ႈငမ်းယဵၼ်တႄႉ တေယၢပ်ႇၽိုတ်ႇ။ ယဝ်ႉၵေႃႈ ၼႂ်းၶၢဝ်းတၢင်း 70 ပီမႃးၼႆႉ လွင်ႈငမ်းယဵၼ် ဢၼ်ဝႃႈၼၼ်ႉ ပႆႇလႆႈသေပွၵ်ႈ ၼင်ႇႁိုဝ် တေလႆႈလွင်ႈငမ်းယဵၼ်ၼၼ်ႉ ၵူၼ်းမိူင်းတၵ်းလႆႈၶဝ်ႈႁူမ်ႈပႃးၸွမ်း” ဝႃႈၼႆ။


သင်ဝႃႈ ၸုမ်း RCSS/SSA ၵေႃႈလီ၊ PNLO ၵေႃႈလီ၊ တပ်ႉသိုၵ်းမၢၼ်ႈၵေႃႈလီ မီးလွင်ႈပူၼ်ႉပႅၼ်ၸိူင်ႉႁိုဝ် ၼိူဝ်ၵူၼ်းမိူင်းၵေႃႈ ႁႂ်ႈလၢတ်ႈ ႁတ်းႁတ်းႁၢၼ်ႁၢၼ်ဝႃႈၼႆ။


JMC-S ၼႆႉမိူဝ်ႈဝၼ်းတီႈ 30/05/2017 တူဝ်တႅၼ်းတပ်ႉသိုၵ်း RCSS/SSA ၊ တူဝ်တႅၼ်းတပ်ႉသိုၵ်းလူင်ပွင်ၸိုင်ႈ မၢၼ်ႈ တိူင်းသိုၵ်း ဝၼ်းဢွၵ်ႇၵၢင်(ၶူဝ်လမ်) လႄႈတူဝ်တႅၼ်းၵူၼ်းမိူင်း ၸဵမ်ၸိူဝ်းၼႆႉ ႁူမ်ႈၵၼ်ပိုတ်ႇလုမ်းလူလွမ် ပႂ်ႉတူၺ်းလွင်ႈ ငမ်းယဵၼ် ၸၼ်ႉၸႄႈမိူင်း တီႈၸႄႈဝဵင်းၶူဝ်လမ်(ၶူဝ်ၶမ်း) ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။