ဝၼ်းတီႈ 18 လိူၼ် ဢေႃးၵတ်ႉသ်ၼႆႉ တၵ်ႉၵႃႇလႄႈသင်ၶၸဝ်ႈဢွၼ်ႁူဝ် ၵူၼ်းဝၢၼ်ႈၵူၼ်းမိူင်းၼႂ်း ထုင်ႉလၢင်းၶိူဝ်းသေ တႄႇပူပိုၼ်ႉ ဝိႁၢရ်လူင် ၵျွင်းလူင်(မႂ်ႇ)  ၼႂ်းဝတ်ႉတိူၵ်ႈသွၼ်လိၵ်ႈပရိယတ်ႉတိ မႁႃဝိႁႃရ   ၵၢင်ဝဵင်းလၢင်းၶိူဝ်း။


တိူၵ်ႈသွၼ်လိၵ်ႈပရိယတ်ႉတိ မႁႃဝိႁႃရ (ၵျွင်းလူင်)ၼႆႉ   ယွၼ်ႉၾႆးၾႃႉသျွၵ်ႉသေ ၾႆးမႆႈၵႂႃႇမိူဝ်ႈ ဝၼ်းတီႈ 23 လိူၼ်ၵျူႊလၢႆႊ ပီ 2016  ။ သင်ၶၸဝ်ႈလႄႈပေႃႈမႄႈၵူၼ်းမိူင်း ဢိၵ်ႇ တၵ်ႉၵႃႇသတ်ႉထႃး ၼွၵ်ႈမိူင်းၼႂ်းမိူင်း ႁူမ်ႈၵၼ်သေၶိုၼ်းၵေႃႇသၢင်ႈတိူၵ်ႈသွၼ်လိၵ်ႈလင်မႂ်ႇ ၼႂ်းပီ 2017 ၼႆႉ။

လုင်းၼေႃႇမိူင်း ၶွမ်ႊမတီႊပွင်ပဵၼ်ၵၢၼ်ၵေႃႇသၢင်ႈ ဝိႁၢရ်လူင်လင်မႂ်ႇ လၢတ်ႈဝႃႈ - ‘ဢဵၼ်းဢၢၼ်းတေၵေႃႇသၢင်ႈ 3 ၸၼ်ႉ။ ငိုၼ်းတွင်းၵႃႈၸႂ်ႉၸၢႆႇၼပ်ႉသွၼ်ႇဝႆႉဝႃႈတေသဵင်ႈမွၵ်ႈ 10,000 သႅၼ်ပျႃး။ ၵူၺ်းၵႃႈ ယၢမ်းလဵဝ်ယွၼ်ႉပိူဝ်ႈဢဵၼ်ႁႅင်းငိုၼ်းတွင်း ဢမ်ႇပဵင်းပေႃးလႄႈ တိုၵ်ႉယဝ်ႉၸၼ်ႉတႂ်ႈသုတ်းၸၼ်ႉလဵဝ်ၵူၺ်း။ ၵႃႈၸႂ်ႉၸၢႆႇမူတ်းသဵင်ႈၵႂႃႇ 2,000 သႅၼ်ပျႃးယဝ်ႉ။ သင်ဝႃႈမီးၸဝ်ႈတႃႇၼႃႉ ၸဝ်ႈၽူႈမီးၸ်ႂၶႂ်ႈလူႇတၢၼ်းတႃႇၵေႃႇသၢင်ႈဝတ်ႉၵျွင်းထႅင်ႈၸိုင် ၵပ်းသိုပ်ႇမႃးလႆႈတီႈ မၢႆၾူၼ်း 097-737-59590 ၵေႃႈလႆႈ’ ဝႃႈၼႆ။


တိူၵ်ႈသွၼ်လိၵ်ႈပရိယတ်ႉတိ မႁႃဝိႁႃရ (ၵျွင်းလူင်)ၼႆႉ ပဵၼ်ႁူင်းႁဵၼ်းလေႃးၵုတ်ႈ ႁပ်ႉၸဝ်ႈသၢင်ႇ သႃမၼေႇၼႂ်းထုင်ႉလၢင်းၶိူဝ်းသေ ပူင်သွၼ်ပၼ်လိၵ်ႈထမ်းပုတ်ႉထၸဝ်ႈ ၵူႈပီ။ မိူဝ်ႈၾႆးပႆႇမႆႈၼၼ်ႉ ၼိုင်ႈပီႁပ်ႉသင်ၶၸဝ်ႈ မႃးႁဵၼ်းလိၵ်ႈ 100ပၢႆ။ ၵူၺ်းၵႃႈ ဝၢႆးလင်ၾႆးမႆႈယဝ်ႉ ယွၼ်ႉပိူဝ်ႈမီးတၢင်း ယၢပ်ႇၽိုတ်ႇတီႈယူႇတီႈသွၼ်လိၵ်ႈလႄႈ လႆႈႁပ်ႉသင်ၶႁဵၼ်းလိၵ်ႈ 50 ၵူၺ်း။


ဝိႁၢရ်လူင်လင်ၵဝ်ႇ ဢၼ်ၺႃးၾႆးမႆႈၼၼ်ႉ မီးဢႃယု 50 ပီပၢႆ၊ ပီႈၼွင်ႉလၢင်းၶိူဝ်း ဢၼ်မႃးႁူမ်ႈႁႅင်းၵေႃႇသၢင်ႈသိူဝ်ႇပိုၼ်ႉၼႂ်းဝၼ်းမိူဝ်ႈၼႆႉ တင်ႈတႄႇဝၢၼ်ႈႁူၺ်ႈသိမ်ႇ ပွတ်းႁွင်ႇဝဵင်းလၢင်းၶိူဝ်း တေႃႇထိုင်ဝၢၼ်ႈၸလွင်း ထုင်ႉၾၢႆႇၸၢၼ်းဝဵင်းလၢင်းၶိူဝ်း။  ဢဵၼ်ႁႅင်းၵူၼ်းမႃးမီးမွၵ်ႈ 2,000 ပၢႆ။  ပီႈၼွင်ႉဝၢၼ်ႈလူင်ပွၵ်ႉတူၵ်းလႄႈပွၵ်ႉဢွၵ်ႇ ႁပ်ႉပဵၼ်ၸဝ်ႈတႃႇၼႃႉလဵင်ႉၶဝ်ႈၽၵ်း- ဝႃႈၼႆ။