ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ပဵၼ်ၵဝ်ႉၵၼ်းသေ မုၵ်ႉၸုမ်း ၼၢင်းယိင်း ၸိုင်ႈတႆးSSWOဢွၼ်ၼမ်းၸတ်းႁဵတ်းပၢင်ၾိုၵ်းသွၼ် ပူၵ်းပွင်ၼမ်ႉၵတ်ႉ ၼၢင်းယိင်းၼုမ်ႇ ၶၢဝ်းတၢင်း 3 လိူၼ် တီႈဝဵင်းမႂ်ႇဝၢၼ်ႈႁႆး ။


ဝၼ်းတီႈ 11/07/2017 တေႃႇ 08/10/2017 ၶၢဝ်းယၢမ်း 3 လိူၼ် ပူင်သွၼ်ပၼ် ၵူႈႁူဝ်ၶမ်ႈ 5 မူင်း တေႃႇ ထိုင် 7 မူင်း၊ ၼုမ်ႇသၢဝ် မႄႈႁိူၼ်းၼုမ်ႇတၢင်တူဝ်ၼႂ်းပွၵ်ႉ ယွမ်ႇဝၢၼ်ႈဢိူင်ႇၽႂ်မၼ်းသေမႃးၶဝ်ႈႁူမ်ႈ 23 ၵေႃႉ၊ ပဵၼ်ၵူၼ်းၼႂ်းၸႄႈ ဝဵင်းမိူင်းသူႈ၊ ဝဵင်းၵေးသီး ၊ ဝဵင်းမိူင်းၼွင် ၊ ဝဵင်းတၢင်ႉယၢၼ်း ၊ဝဵင်းလႃႈသဵဝ်ႈ ၊ ၵူတ်ႉၶၢႆလႄႈ ဝဵင်းမႂ်ႇဝၢၼ်ႈႁႆး ။

Photo: Tai Hun Mai

ႁူဝ်ၶေႃႈဢၼ်တေပူင်သွၼ် - သုၼ်ႇလႆႈသုၼ်ႇပဵၼ်ၵူၼ်း ၊ ၶွမ်ႊၽိဝ်ႊတိူဝ်ႊ ၊ ပိုၼ်ႉႁူႉလွင်ႈၼၢင်းယိင်း ၊ မၢႆမီႈ၊ ပၵ်းပိူင် ၊ သိုဝ်ႇၶၢဝ်ႇ ၊ လွင်ႈဝၢင်းၽႅၼ်ၼႃႈႁိူၼ်းလႄႈပၢႆးယူႇလီ၊ ပႃးၸဵမ်ပိူင်ၵၢၼ်လွၵ်းၸုၵ်း ၶေႃႈတိုဝ်း ၵမ်ပႃႇတီႇမႂ်ႇသုင်ၸိုင်ႈတႆး။


ၼၢင်းၶမ်းလူႇ ၽူႈဢွၼ်ႁူဝ်ၼၢင်းယိင်းၼုမ်ႇပိုတ်ႇပၢင်သေမွၵ်ႇလၢတ်ႈၶေႃႈၵႂၢမ်းဝႃႈ- “ ၼၢင်းယိင်းၼႆႉဢမ်ႇ ထုၵ်ႇလီပွႆႇတူဝ်ပွႆႇၸႂ်လွင်ႈၸွမ်းၼမ်ႉ ပႅင်းမႅပ်ႇၵႃႈၶၼ်ၼၢင်းယိင်း လႆႈၵႃႈႁိုဝ် လီၵႃႈၼၼ်ႈယဝ်ႉ” - ဝႃႈၼႆ။


ၼၢင်းၸၢမ်ၽွင်း ၵႅမ်ၽူႈၸတ်းၵၢၼ် ပူၵ်းပွင်ၼမ်ႉၵတ်ႉၼၢင်းယိင်း လၢတ်ႈဝႃႈ - “ ယိူင်းဢၢၼ်းႁဝ်းၶႃႈ တႃႇႁႂ်ႈၼၢင်းယိင်းၼုမ်ႇ ၼႂ်းပိုၼ်ႉတီႈ မီးပိုၼ်ႉႁူႉမီးၼမ်ႉၵတ်ႉမေႃ မိူဝ်းပူၵ်းပွင် ၶိုၼ်းၼႂ်းမူႇ ဝၢၼ်ႈၵၢၼ် တူင်ႇဝူင်းၵူၼ်းလႄႈၵၢၼ်မိူင်းသေဢမ်ႇၵႃး ႁႂ်ႈမေႃၵွင်ႉသၢၼ် ၶဝ်ႈဢွၵ်ႇၵၼ် ၸွမ်းၵူၼ်းၼႂ်းပိုၼ်ႉတီႈလႄႈ မေႃၶႂၢၵ်ႈၼႃႈၵၢၼ်၊ မေႃႁဵတ်းမေႃသၢင်ႈၵႂႃႇလႆႈၶၢဝ်းယၢဝ်း ” - ဝႃႈၼႆ။


ၼၢင်းၶမ်းဢေး ဝၢၼ်ႈၸၢင်ႉ မိူင်းယႆ ၵေႃႈလၢတ်ႈဝႃႈ - “ပၢင်သွၼ်ပၢႆးဢွၼ်ႁူဝ်ၸိူင်ႉၼႆ ပႆႇယၢမ်ႈၶိုၼ်ႈ ၊ သေပွၵ်ႈ။ၵူၼ်းတီႈဝၢၼ်ႈႁဝ်းၵမ်ၼမ် လွင်ႈသုၼ်ႇလႆႈသုၼ်ပဵၼ်ၼၢင်းယိင်းၸိူဝ်းၼႆႉတေဢမ်ႇပေႃးႁူႉ ၊ တေႁူႉပၢႆးမၢၵ်ႇမီးၵူၺ်း လွင်ႈၵၢၼ်ဝၢၼ်ႈၵၢၼ်မိူင်းၵေႃႈဢမ်ႇသူၼ်ၸႂ်။ ၶႃႈႁဝ်းတႄႉ ၶႂ်ႈမေႃဢွၼ်ႁူဝ် ပူၵ်းပွင်ပိုၼ်ႉတီႈလႄႈ ၸင်ႇမႃးၶႃႈယဝ်ႉ”- ဝႃႈၼႆ။


မုၵ်ႉၸုမ်းၼၢင်းယိင်းၸိုင်ႈတႆး SSWO ၼႆႉတႄႇၵေႃႇတင်ႈမႃး မိူဝ်ႈ28 / 04 / 2013 တီႈငဝ်ႈငုၼ်းပႃႇတီႇမႂ်ႇ သုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ဝၢၼ်ႈႁႆး။ပၢင်သွၼ် ပွၵ်ႈၵမ်းႁႅၵ်ႈ ယၢမ်ႈဢွၼ်ၸတ်းႁဵတ်း ယဝ်ႉ ၵမ်းၼိုင်ႈ မိူဝ်ႈပီ 2016 ။ SSWO ၼႆႉပဵၼ်ၸုမ်းၼႅင်ႈ ၵပ်းသိုပ်ႇတင်း ၸုမ်းၵပ်း သၢၼ်လွင်ႈၼၢင်း ယိင်းတႆးSWAN၊ ၸုမ်းNGO ၊ တၢင်ႇၸၢဝ်းၶိူဝ်း ၸိူဝ်းၼႆႉဝႃႈၼႆ။