ၶူးလႄႈ ၶွမ်ႊမတီႊပွင်ပဵၼ်ၸၼ်ႉၸွမ် “ၵႃလီႉ”ဢမ်ႇၼၼ်ၸုမ်းၵေႃတႆး လူင်းပိုၼ်ႉတီႈၼႂ်းၸိုင်ႈတႆး ပွတ်းၸၢၼ်း ၸုမ်းၵေႃတႆးႁူပ်ႉထူပ်းၵူၼ်းမိူင်းသပ်းလႅင်းလွင်ႈပၢႆးပၺ်ၺႃလႄႈ လွင်ႈၸၼ်ႉၸွမ် တူင်ႇဝူင်းတႆး ထိုင်ၸုမ်းပႃႇတီႇၵၢၼ်မိူင်း ၵေႃလိၵ်ႈလၢႆးလႄႈ ၸုမ်းၵူၼ်းၼုမ်ႇၸႄႈဝဵင်းလႂ်ၸႄႈဝဵင်း ၼၼ်ႉ။


ဝၼ်းတီႈ 7/07/2017 မႃးၼႆႉၸုမ်းၵေႃတႆး မိူၼ်ၼင်ႇၸၢႆးၽူင်းၶွင်ႇ၊ ၼၢင်းႁဵဝ်းသႅင်၊ ၸၢႆးထုၼ်းသႃႇ၊ ၼၢင်းၵမ်ႉၵေႃႇ ယွတ်ႈသႅင် ၸိူဝ်းၼႆႉဢွၼ်ၵၼ်ၵႂႃႇႁူပ်ႉထူပ်းၵူၼ်းမိူင်းလၢႆတီႈမိူၼ်ၼင်ႇဝဵင်းတူၼ်ႈ တီး၊ လၢႆးၶႃႈ၊ ပၢင်လူင်၊ မိူင်းၵိုင်၊ ၵေးသီး ၸိူဝ်းၼႆႉ။

Photo: Kaw Dai Organization

ပၢင်ႁူပ်ႉထူပ်းၼႆႉယူႇတီႈၸုမ်းပႃႇတီႇၵၢၼ်မိူင်း ၊ၵေႃလိၵ်ႈလၢႆး၊ ၸုမ်းၵူၼ်းၼုမ်ႇၸိူဝ်းၼႆႉႁူမ်ႈၵၼ် သေၸတ်းပၼ်ဢွင်ႈတီႈႁႂ်ႈလႆႈပဵၼ်ပၢင်ႁူပ်ႉထူပ်းၵၼ်။


ၸၢႆးၵျေႃႇၸေႇယ ၽူႈတႅၼ်းၸႄႈမိူင်းၶဵတ်ႇလိူၵ်ႈတင်ႈမၢႆ1 ဝဵင်းလၢႆးၶႃႈ လၢတ်ႈဝႃႈ - “ ၸၼ်ႉၸွမ် တူင်ႇဝူင်းတႆးၼႆႉ ယုမ်ႇယမ်ဝႃႈတေမီးၽွၼ်းလီတွၼ်ႈတႃႇၵူၼ်းမိူင်းတႆးတႄႉတႄႉ ၵွပ်ႈၼၼ်လႄႈ ယွၼ်းႁႂ်ႈၵူၼ်းမိူင်း ဢွၼ်ၵၼ်သႂ်ႇၸႂ်လဵပ်ႈႁဵၼ်းၼမ်ၼမ်သေၵမ်း” ဝႃႈၼႆ။


ၸၢႆးၽူင်းၶွင်ႇ ၽူႈၵပ်းသၢၼ်ၵေႃတႆးလၢတ်ႈဝႃႈ– “ ၶႂ်ႈႁႂ်ႈပီႈၼွင်ႉႁဝ်းၶႃႈ ဢွၼ်ၵၼ်သႂ်ႇၸႂ်လႄႈ ပၼ်ႁႅင်းပၢႆးပၺ်ၺႃၼမ်ၼမ် ယွၼ်ႉဝႃႈၵၢပ်ႈပၢၼ်မိူဝ်ႈလဵဝ်ၼႆႉ ပိူၼ်ႈဢဝ်တၢင်းႁူႉတၢင်းႁၼ်ၶႄႉ ၶႅင်ႇၵၼ်ယဝ်ႉ ၼင်ႇႁိုဝ်ႁဝ်းပေႃးတေၸၢင်ႈပူၵ်းပွင်ဢိူင်ႇဝၢၼ်ႈႁဝ်း ႁႂ်ႈၶိုတ်းၸၼ်ႉလုမ်ႈၾႃႉ ပဵင်း ပိူၼ်ႈၼၼ်ႉ ႁႂ်ႈဢွၼ်ၵၼ်လဵပ်ႈႁဵၼ်းဢဝ်တၢင်းႁူႉၵၼ်ၼမ်ၼမ်သေၵမ်း တီႈၼႆႈတေပဵၼ်တီႈ ဢၼ်ၾိုၵ်းၽွၼ်ႉပၼ်ႁႂ်ႈတူင်ႇဝူင်းတႆးၵႅၼ်ႇၶႅင်ႇမႃး ” -ဝႃႈၼႆ ။


ၼၢင်းႁဵဝ်းသႅင် ၽူႈၶဝ်ႈပႃးၶပ်းၶိုင်တႃႇၵေႃႇတင်ႈၸၼ်ႉၸွမ် လၢတ်ႈဝႃႈ - “ပီႈၼွင်ႉႁဝ်းၶႃႈဝဵင်းလႂ်သေ ဢမ်ႇဝႃႈ သင်ၶႂ်ႈႁႂ်ႈႁဝ်းၶႃႈၵႂႃႇသပ်းလႅင်းပၼ်ၼႆၸိုင် ၵပ်းသိုပ်ႇမႃးလႆႈယူႇ ႁဝ်းၶႃႈယိၼ်းလီတေၵႂႃႇ သပ်းလႅင်းပၼ်ယူႇ” ဝႃႈၼႆ။


ၸၼ်ႉၸွမ်တူင်ႇဝူင်းၵူၼ်းတႆး (College ) ၼႆႉပီဢွၼ်တၢင်းသုတ်းတေတႄႇသွၼ် 2 ပၢႆး မိူၼ် ၼင်ႇ 1. ပၢႆးသၢႆႈတူင်ႇဝူင်းၵူၼ်း Social Science ၊ 2. ပၢႆးၸတ်းပွင်ၵၢၼ်မၢၵ်ႈမီး Business Admi nistration မိူဝ်းၼႃႈ မႃးတေၽိူမ်ႉၼမ်မႃးလိူဝ်ၼႆႉ။ ၶူးပူင်သွၼ်ပဵၼ်ၵူၼ်းၼႂ်းၸုမ်း ၵေႃတႆး ဢၼ်ၵႂႃႇယဝ်ႉ ၸၼ်ႉၸွမ် ၼွၵ်ႈမိူင်းမႃး မိူၼ်ၼင်ႇ ၼၢင်းၶႅမ်ဝၼ်း၊ ၼၢင်းႁဵဝ်းသႅင်၊ ၸၢႆးထုၼ်းသႃႇ ၊ ၼၢင်းမူၺ်သႅင်၊ ၼၢင်းဝၼ်းလီ ၸိူဝ်းၼႆႉ တင်းမူတ်း မီးမွၵ်ႈ 16 ၵေႃႉ။


လုၵ်ႈႁဵၼ်းဢၼ်တေမႃးၶိုၼ်ႈႁဵၼ်းတီႈဢေႇသုတ်းႁႂ်ႈထိုင်ၸၼ်ႉ 10 ပီတီႈၼိုင်ႈတေႁပ်ႉ60 ၵေႃႉ။ ၼိုင်ႈ ၵေႃႉတေလႆႈၸွႆႈၵႃႈၸႂ်ႉၸၢႆႇၵၢၼ်ႁဵၼ်းၵၢၼ်သွၼ် 10 သႅၼ် ၵျၢတ်ႉ တေႃႇ1 ၼိုင်ႈထိူမ်ႊ (ၼိုင်ႈထိူမ်ႊ5လိူၼ် 1 ပီ2ထိူမ်ႊ) ႁူမ်ႈပႃးၵႃႈၵိၼ်ၵႃႈယူႇၵႃႈဢွၵ်ႇတၢင်းလဵပ်ႈႁဵၼ်းၶူၼ်ႉၶႂႃႉ။ ၶၢဝ်းႁဵၼ်းတေႃႇပေႃးယဝ်ႉ တေႁိုင် 3 ပီ ။