ပႃႇတီႇႁူဝ်သိူဝ် SNLD တႅမ်ႈလိၵ်ႈ ယိုၼ်ႈမိုဝ်းၸွႆႈထႅမ်တႆးတူၵ်းမိူင်းထႆး ထူပ်းတၢင်းယၢပ်ႇၽိုတ်ႇ ၶၢဝ်းတၢင်း ပွၵ်ႈၶိုၼ်းမိူင်းတႆး။


ဝၼ်းတီႈ 05/07/2017 ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး ႁိုဝ်ပႃႇတီႇႁူဝ်သိူဝ် SNLD တႅမ်ႈလိၵ်ႈထိုင် ၵေႃပွင်ၵၢၼ်ၽွမ်ႉႁူမ်ႈ ပီႈၼွင်ႉတႆးမိူင်းၵွၵ်ႇဝႃႈ - ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး ပၼ်ပုၼ်ႈၽွၼ်း လုမ်းပွင်ၵၢၼ် ၸႄႈဝဵင်းတႃႈၶီႈလဵၵ်း၊ မိူင်းတူၼ်လႄႈ ၸိုင်ႈတႆးပွတ်းဢွၵ်ႇ ႁႂ်ႈၸွႆႈထႅမ်ပၼ် လွင်ႈၵႂႃႇမႃးၸွမ်း တႃႈၸွမ်းတၢင်း။ ၸွႆႈၵႄႈလိတ်ႈပၼ် တၢင်းယၢပ်ႇၽိုတ်ႇ ၵူၼ်းၸိူဝ်းဢမ်ႇမီးဝႂ်ၵပ်းတူဝ်။

ၸၢႆးလဵၵ်ႉ ၽူႈၶၢၼ်ပၢၵ်ႇပႃႇတီႇႁူဝ်သိူဝ် SNLD လၢတ်ႈဝႃႈ – “ ယွၼ်ႉဝၢၼ်ႈမိူင်းဢမ်ႇၼိမ်သဝ်း ပၢင်တိုၵ်းသိုၵ်း သိူဝ်ၼမ်၊ ယႃႈမဝ်းၵမ်လိူင်ႇ ၵၢၼ်ႁႃၵိၼ်လဵင်ႉတွင်ႉယၢပ်ႇလႄႈ ၵူၼ်းမိူင်းတႆး ဢွၼ်ၵၼ်ၵႂႃႇႁဵတ်းၵၢၼ်မိူင်းထႆး မိူဝ်ႈလဵဝ်ပၵ်းပိူင် ၵပ်ႉၵိၼ်းမႃးလႄႈ ပီႈၼွင်ႉႁဝ်းဢွၼ်ၵၼ်လႆႈပၢႆႈဝၢႆႇပွၵ်ႈမႃး မိူင်းႁဝ်းၶိုၼ်းၼႆၵေႃႈ ၼင်ႇႁိုဝ် တေၵႂႃႇမႃးငၢႆႈလူမ်ၸႂ်ၸွမ်းတၢင်း ၼင်ႇႁိုဝ်ဢမ်ႇမီးတၢင်းယၢပ်ႇၽိုတ်ႇ၊ ၼင်ႇႁိုဝ်တေယူႇငၢႆႈၵိၼ်ငၢႆႈ၊ လုၵ်ႈ လၢၼ်ၵေႃႈပေႃးတေ လႆႈႁဵၼ်းလိၵ်ႈလၢႆးၼၼ်ႉ ယူႇတီႈပႃႇတီႇလႄႈ ၸုမ်းတူင်ႇဝူင်းၵူၼ်း တေႁူမ်ႈမိုဝ်းၵၼ် ၶပ်းၶိုင်ၸွႆႈထႅမ် ၵႂႃႇယူႇ” ဝႃႈၼႆ။


ၼႂ်းၽိုၼ်လိၵ်ႈၼၼ်ႉတႅမ်ႈဝႆႉဝႃႈ - တႃႇတေၸွႆႈထႅမ်ပၼ်ပီႈၼွင်ႉတႆး ပွၵ်ႈၶိုၼ်းႁိူၼ်းၼၼ်ႉ ငဝ်ႈငုၼ်းတီႇမူဝ်ႇ ၶရေႇၸီႇ ၸိူဝ်ႉၶိူဝ်းတႆးပၼ်ပုၼ်ႈၽွၼ်း လုမ်းပွင်ၵၢၼ် ၸႄႈဝဵင်းတႃႈၶီႈလဵၵ်း၊ မိူင်းတူၼ်လႄႈ ၸိုင်ႈတႆး ပွတ်း ဢွၵ်ႇ ႁႂ်ႈၸွႆႈထႅမ်ပၼ် လွင်ႈၵႂႃႇမႃး၊ ၼင်ႇႁိုဝ်ပီႈၼွင်ႉႁႅင်းၵၢၼ် တေၸၢင်ႈပွၵ်ႈ ၶိုၼ်းႁိူၼ်းၵတ်းၵတ်းယဵၼ် ယဵၼ်ၼၼ်ႉ လႆႈဢုပ်ႇၵုမ် တင်းၸုမ်းလူင်ပွင်ၸိုင်ႈ မိူင်းတႆးဝႆႉဢမ်ႇၵႃး တီႈၼႂ်းလုမ်း သၽႃးမိူင်းႁူမ်ႈတုမ် ၵေႃႈ ႁၢင်ႈႁႅၼ်းတေထၢမ်တေယိုၼ်ႈလွင်ႈၼႆႉၵႂႃႇၼႂ်းဝႆးဝႆးၼႆႉ။ ၼင်ႇႁိုဝ်ႁႅင်းၵၢၼ်တေဢမ်ႇၺႃးတီႉ၊ တေဢမ်ႇၺႃး လွၵ်ႇငိုတ်ႈၸွမ်းတၢင်းၼၼ်ႉၵေႃႈ ၸုမ်းပွင်ၵၢၼ်ပႃႇတီႇႁူဝ်သိူဝ် တေၶတ်းၸႂ်ၸွႆႈထႅမ်ပၼ် ၼင်ႇၵႃႈပွင် ပဵၼ်လႆႈ- ဝႃႈၼႆ။


ဝၢႆးသေလူင်ပွင်ၸိုင်ႈထႆးပိုၼ်ၽၢဝ်ႇ ပၵ်းပိူင်မႂ်ႇပီ 2017 ဢွၵ်ႇမႃးဝႃႈ – ၽူႈလႂ်ၽႂ်ႁပ်ႉၵူၼ်းႁဵတ်းၵၢၼ် ဢမ်ႇမီး ဝတ်းဝႂ်၊ ႁဵတ်းၵၢၼ် ၽိတ်းတီႈ၊ ႁဵတ်းၵၢၼ်ၽိတ်းပၵ်းပိူင်ၼႆၸိုင် မီးတၢမ်ႇမႂ်ငိုၼ်း 400,000 – 800, 000 ၿၢတ်ႇ တေႃႇၵူၼ်းႁဵတ်း ၵၢၼ်ၼိုင်ႈၵေႃႉ။ ၾၢႆႇလူင်ပွင်ၸိုင်ႈယွၼ်ႇယၢၼ်းပၼ် 6 လိူၼ်ႁႂ်ႈလႆႈၶၢဝ်းယၢမ်းႁၢင်ႈ ႁႅၼ်းတူဝ်သေတႃႉ ။ ၵူၼ်းႁဵတ်းၵၢၼ်မိူင်းထႆး ယင်းတိုၵ်ႉဢွၼ်ၵၼ် ပွၵ်ႈႁိူၼ်းယူႇၶိူဝ်းယႂ်း ။ တၢင်းမႄႈသွတ်ႇ၊ ရၼွင်း၊ မႄႈသၢႆၸိူဝ်းၼႆႉ လၢႆၸုမ်းၾၢႆႇတၢင်းမိူင်းႁူမ်တုမ်မၢၼ်ႈ ဢွၼ်ၵၼ်မႃးပႂ်ႉႁပ်ႉတွၼ်ႈ ၸွႆႈထႅမ်လွင်ႈ ၶဝ်ႈၼမ်ႉတၢင်းၵိၼ်၊ လွင်ႈသူင်ႇပွၵ်ႈ ႁိူၼ်းၸိူဝ်းၼႆႉ။