သိုၵ်း TNLA တင်း RCSS ပဵၼ်ပၢင်တိုၵ်းၶဵင်ႈၶႅင်ၵၢၼ်သိုၵ်းလႄႈ ၵူၼ်းဝၢၼ်ႈၵူၼ်းသူၼ် ထုင်ႉၾၢႆႇဢွၵ်ႇၼမ်ႉတူႈ ဢွၼ်ၵၼ်ပၢႆႈၽေးသိုၵ်း ႁွတ်ႈၽႅဝ်မႃးထႅင်ႈ တီႈဝတ်ႉပူၵ်ႉပႃႇယူင်ႇ ၸႄႈဝဵင်းၼမ်ႉတူႈ 100 ပၢႆ။


ဝၼ်းတီႈ 05/07/2017 ယၢမ်းၵၢင်ၼႂ် ထိုင်တၢမ်းၶမ်ႈ ၵူၼ်းဝၢၼ်ႈၵူၼ်းသူၼ် ၼႂ်းဢိူင်ႇလွႆပႄး ဝၢၼ်ႈပၢင်လေႃႉ၊ ဝၢၼ်ႈၵုင်းၸူင်၊ ဝၢၼ်ႈၼွင်ၵဝ်ႈလုၵ်ႈ၊ ဝၢၼ်ႈပၢင်ၶၢမ်၊ ဝၢၼ်ႈပၢင်သၢၼ်ႈ၊ ဝၢၼ်ႈၸၢမ်မႂ်ႇလႄႈ ဝၢၼ်ႈဢိူၵ်ႇၾႃႉ ဢွၼ်ၵၼ်ပၢႆႈၽေးသိုၵ်း ႁွတ်ႈၽႅဝ်တီႈဝတ်ႉပူၵ်ႉပႃႇယူင်ႇ ပွၵ်ႉ 8 ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ယွၼ်ႉသိုၵ်ႈတဢၢင်း TNLA တင်း တပ်ႉသိုၵ်းၸိုင်ႈတႆး RCSS ပဵၼ်ပၢင်တိုၵ်းၵၼ်ႁိမ်းႁွမ်း မူႇဝၢၼ်ႈ ဝႃႈၼႆ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၾၢႆႇလူလွမ်ပႂ်ႉတူၺ်း ၵူၼ်းပၢႆးၽေး ၸႄႈဝဵင်းၼမ်ႉတူႈ လၢတ်ႈဝႃႈ “ တေႃႈလဵဝ် ၵူၼ်းပၢႆႈၽေး ၼ်ႂ်းဢိူင်ႇလွႆပႄး ဢွၼ်ၵၼ်ပၢႆႈ။ ပႆ၊ ၶီႈလူတ်ႉၶိူင်ႈၵၼ်မႃး မိူဝ်ႈဝႃး ဝၼ်းတီႈ 5 ယၢမ်းၵၢင်ၼႂ် ပီႈၼွင်ႉၵူၼ်းပၢႆႈၽေး ဢွၼ်ၵၼ်မႃးထႅင်ႈ ထိုင်ႁူဝ်ၶမ်ႈ။ သဵၼ်ႈ သၢႆမၢႆ တင်းမူတ်း ဢၼ်လႆႈၵဵပ်းဝႆႉ မီး 112 လင်ႁိူၼ်း၊ ႁူဝ်ၵူၼ်း 400 ပၢႆယဝ်ႉ” ဝႃႈၼႆ။


ၵဵဝ်ႇၵပ်းလွင်ႈၼႆႉ ယွၼ်ႉသိုၵ်း TNLA တင်း RCSS လႆႈပဵၼ်ပၢင်တိုၵ်း ႁိမ်းႁိမ်းမူႇဝၢၼ်ႈ ၼႂ်းဢိူင်ႇလွႆပႄးသေ ၵူၼ်းဝၢၼ်ႈၵူၼ်းသူၼ် ဢွၼ်ၵၼ်ပၢႆႈ။ ၵမ်ႈၼမ်တႄႉ မႃးယူႇသဝ်းဝႆႉတီႈ ဝတ်ႉပူၵ်ႉပႃႇယူင်ႇ ဝႃႈၼႆ။


လုင်းၸၢႆးပႃႉၺၢၼ်ႇ သိုပ်ႇလၢတ်ႈထႅင်ႈဝႃႈ တေႃႈလဵဝ် ပဵၼ်ၶၢဝ်းႁဵတ်းႁႆႈႁဵတ်းၼႃး ပၢင်တိုၵ်းသမ်ႉမႃး ပဵၼ် ႁိမ်းဝၢၼ်ႈ။ လွင်ႈၼႆႉ ဢမ်ႇထုၵ်ႇလီပဵၼ် သင်ပဵၼ်ပၢင်တိုၵ်းၼႆႉ ႁႂ်ႈၵႂႃႇပဵၼ်တီႈယၢၼ်ၵႆ မူႇဝၢၼ်ႈၵူၼ်းမိူင်း။ တပ်ႉသိုၵ်းၾၢႆႇလႂ် ၵေႃႈ ပိုင်ႈဢိင်ၵူၼ်းမိူင်းၼင်ႇၵၼ်။ ပေႃးထွမ်ႇတူၺ်းၶၢဝ်ႇၸိုင် ပၢင်တိုၵ်းၼႆႉ တေပႆႇယဵၼ် လဵပ်ႈတေသိုပ်ႇပဵၼ်ထႅင်ႈ ယူႇ” ဝႃႈၼႆ။


တေႃႈလဵဝ် ၵူၼ်းပၢႆႈၽေးသိုၵ်းဢၼ်ႁွတ်ႈၽႅဝ်မႃး တီႈဝတ်ႉပူၵ်ႉပႃႇယူင်ႇ ပွၵ်ႉ 8 ၸႄႈဝဵင်းၼမ်ႉတူႈၼႆႉ လင်ႁိူၼ်း 112 လင်၊ ႁူဝ်ၵူၼ်း 400 ၵေႃႉ၊ ၽူႈၸၢႆး 175 ၵေႃႉ၊ ၽူႈယိင်း 225 ၵေႃႉ။ ဢၼ်ပီႈၼွင်ႉၵူၼ်းၽေးပၢႆႈမႃး ၼႂ်းဝၼ်း တီႈ 4 သမ်ႉ ႁူဝ်ၵူၼ်း 290 ၵေႃႉ။ ဝၼ်းတီႈ 5 သမ်ႉ ၽိူမ်ႉလိူဝ်မႃးထႅင်ႈ 110 ၵေႃႉ ဝႃႈၼႆ။