ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး ဢွၵ်ႇၶေႃႈပိုၼ်ၽၢဝ်ႇ ႁပ်ႉၸွႆႈထႅမ် တႆးႁဵတ်းၵၢၼ်မိူင်းထႆး သေထူပ်းတၢင်းယၢပ်ႇၽိုတ်ႇ။


ဝၼ်းတီႈ 04/07/2017 ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ဢွၵ်ႇလိၵ်ႈ ပိုၼ်ၽၢဝ်ႇ ပုၼ်ႈတႃႇႁႅင်းၵၢၼ်ယၢၼ်မိူင်း ၸိူဝ်းလႆႈမႃးႁဵတ်းၵၢၼ်ယူႇ ၼႂ်းၸိုင်ႈထႆးယၢမ်းလဵဝ်။

ၼႂ်းလိၵ်ႈပိုၼ်ၽၢဝ်ႇၼၼ်ႉ တႅမ်ႈဝႆႉဝႃႈ  ဢိင်လူၺ်ႈလူင်ပွင်ၸိုင်ႈမိူင်းထႆး လႅၵ်ႈလၢႆႈပၵ်းပိူင်ၵဵဝ်ႇလူၺ်ႈ ႁႅင်းၵၢၼ် ယၢၼ်မိူင်းလႄႈ ၼင်ႇႁိုဝ်တေႁဵတ်းၵၢၼ်ထုၵ်ႇမႅၼ်ႈ ၸွမ်းပၵ်းပိူင်မႂ်ႇၼၼ်ႉ ႁႂ်ႈဢွၼ်ၵၼ်ႁဵတ်းႁႂ်ႈထုၵ်ႇမႅၼ်ႈ ၸွမ်းၼင်ႇပၵ်းပိူင်မၢႆမီႈမိူင်းထႆး။


ပီႈၼွင်ႉတႆးၸိူဝ်းဢမ်ႇမီးဝတ်းဝႂ် ဢၼ်ထူပ်းတၢင်းယၢပ်ႇၽိုတ်ႇသေ ဢွၼ်ၵၼ်ပွၵ်ႈၶိုၼ်းႁိူၼ်းၼၼ်ႉၵေႃႈ၊ၼင်ႇ ႁိုဝ်ပေႃးတေငၢႆႈလူမ်ၸႂ် လွင်ႈၵႂႃႇမႃး၊ လွင်ႈဝႂ်ၵပ်းတူဝ် (မၢတ်ႈပုင်ႇတိၼ်ႇ) လွင်ႈတီႈယူႇၸိူဝ်းၼႆႉ၊ၵပ်းသိုပ်ႇ ယွၼ်းတၢင်းၸွႆႈထႅမ်မႃးတီႈ RCSS၊ မႃးလိုဝ်ႈသဝ်းတီႈငဝ်ႈၸိုင်ႈလွႆတႆးလႅင်းလႄႈ လုမ်းၵပ်းသၢၼ် လႆႈၵူႈတီႈ - ဝႃႈၼႆ။


ၸဝ်ႈႁၢၼ်သႅင်လီ လုမ်းၵပ်းသၢၼ် RCSS ဝဵင်းတႃႈၶီႈလဵၵ်းလၢတ်ႈဝႃႈ - ႁဝ်းၶႃႈRCSS ႁူမ်ႈပႃးလူၺ်ႈ ပႃႇတီႇ ၵၢၼ်မိူင်း၊ ၸုမ်းၵူၼ်းၼုမ်ႇ၊ ၸုမ်းၶႅၵ်ႇလီပၢင်ၸႃႉလႄႈ ၸုမ်းတူင်ႇဝူင်းၵူၼ်း ၸိူဝ်းၼႆႉ ႁူမ်ႈမိုဝ်းၵၼ်သေ ပႂ်ႉႁပ်ႉတွၼ်ႈၸွႆႈထႅမ်ယူႇ ။ ၸိူဝ်းဢမ်ႇမီးဝႂ်ၵပ်းတူဝ်(မၢတ်ႈပုင်ႇတိၼ်ႇ ) ၼၼ်ႉၵေႃႈ ႁဝ်းၶႃႈတေဢုပ်ႇ ၵုမ်ၵၼ် သေႁႃလၢႆးတၢင်းၸွႆႈထႅမ်ယူႇၶႃႈ။ လွင်ႈဢၼ်ဝႃႈပေႃးၵႂႃႇယွၼ်းတၢင်းၸွႆႈထႅမ်တီႈ RCSS ၸိုင် ၵူဝ်းၺႃး ဢဝ်ၵႂႃႇ ႁဵတ်းသိုၵ်းဢၼ်ဝႃႈၼၼ်ႉ ဢမ်ႇမီးပေႃႇလႃႇသီႇ  ဢမ်ႇလူဝ်ႇၵူဝ် ၊ ၼင်ႇႁိုဝ်ၵူၼ်းမိူင်းႁဝ်းမီးလွင်ႈ ဢုၼ်ႇၸႂ်လႄႈ ႁဝ်းၸင်ႇမႃးၸွႆႈထႅမ် ။ ပေႃးႁႂ်ႈလီၼႆႉ ႁႂ်ႈမီးႁူဝ်ၼႃႈမၼ်ၵေႃႉၼိုင်ႈသေ ၵႂႃႇယွၼ်းပွၵ်ႈၶိုၼ်းႁိူၼ်း ႁႂ်ႈၸဝ်ႈၼႃႈ တီႈၶဝ်သူင်ႇပၼ်တေ ဢမ်ႇလႆႈသဵင်ၵႃႈၸႂ်ႉၸၢႆႇမၼ်းၼမ် ဝႃႈၼႆ။


ၵပ်းသိုပ်ႇယွၼ်းတၢင်းၸွႆႈထႅမ်လႆႈတီႈ 085 029 4662 / တီႈၵပ်းသိုပ်ႇမၢႆၾူၼ်း တၢင်းမိူင်းထႆး 081 783 0206 / 086 195 9003 ၵေႃႈလႆႈယူႇ။


ဝၢႆးသေမီးပၵ်းပိူင်မႂ်ႇပီ 2017 ဢွၵ်ႇမႃး ဢၼ်ဝႃႈ – ၽူႈလႂ်ၽႂ်ႁပ်ႉၵူၼ်းႁဵတ်းၵၢၼ် ဢမ်ႇမီး ဝတ်းဝႂ်၊ ႁဵတ်းၵၢၼ် ၽိတ်းတီႈ၊ ႁဵတ်းၵၢၼ်ၽိတ်းပၵ်းပိူင်ၼႆၸိုင် မီးတၢမ်ႇမႂ်ငိုၼ်း 400,000 – 800, 000 ၿၢတ်ႇ တေႃႇၵူၼ်းႁဵတ်း ၵၢၼ်ၼိုင်ႈၵေႃႉ။ ၾၢႆႇၼိုင်ႈၵေႃႈၸဝ်ႈၼႃႈတီႈပလိၵ်ႈထႆး ၾၢႆႇၵူတ်ႇထတ်းၵူၼ်းၶဝ်ႈမိူင်းၸိူဝ်းၼႆႉ လူင်းပိုၼ်ႉ တီႈၵူတ်ႇထတ်းတီႉၺွပ်းလႄႈၵူၼ်းမိူင်းႁူမ်ႈတုမ်မျၢၼ်ႇမႃႇဢွၼ်ၵၼ်ပွၵ်ႈႁိူၼ်းၸမ်သႅၼ်ယဝ်ႉ ဝႃႈၼႆ။


ႁႅင်းၵၢၼ်ယၢၼ်မိူင်း ဢၼ်လုၵ်ႉတီႈမိူင်းႁူမ်ႈတုမ်မျၢၼ်ႇမႃႇ ၵႂႃႇႁဵတ်းၵၢၼ်ၼႂ်းမိူင်းထႆးတင်းမူတ်း မီး 2.3 လၢၼ်ႉ ၵေႃႉ ၊ ႁႅင်းၵၢၼ် ဢၼ်ထုၵ်ႇမႅၼ်ႈၸွမ်းမၢႆမီႈထႆးမီးလၢၼ်ႉပၢႆၵူၺ်းဝႃႈၼႆ။