ၽိူင်ၵျႃးၽူး ၵေႃႉပဵၼ် ၽူႈၵွၼ်းသိုၵ်း တပ်ႉသိုၵ်းၶႄႇ ၵဝ်ႈၵၢင်ႉ MNDAA လုသဵင်ႈသုတ်းမုၼ်၊ လုမ်းလၢင်း ႁွပ်ႇႁူဝ်ၶဝ်ႈႁဵဝ်ႈ မိူဝ်ႈဝႃး ဝၼ်းတီႈ 4/7/2017 ၊ မီးၵူၼ်းသိုၵ်း ၽူႈၼမ်း ၸုမ်းသိုၵ်းဢူၺ်းလီ ပွတ်းႁွင်ႇ ၶဝ်ႈႁူမ်ႈတင်းၼမ်။


ၽိူင်ၵျႃးၽူး ဢႃယု 80   လုသဵင်ႈတီႈ လႅၼ်လိၼ် တႆး - ၶႄႇမိူဝ်ႈဝၼ်းတီႈ 21/6/2017 လူၺ်ႈတၢင်းပဵၼ်ၵူၼ်းထဝ်ႈ၊ တၢင်းပဵၼ်ပွတ်ႇ၊ ထူၺ်ႈၸႂ်ၵပ်ႉ ၸိူဝ်းၼႆႉ။ ၶၢပ်ႈတူဝ် တႄႉ လုၵ်ႈၼွင်ႉလုမ်းလၢင်း မိတ်ႉသႁၢႆ သၢၼ်မိုဝ်းၵၼ် ႁွပ်ႇႁူဝ်ၶဝ်ႈႁဵဝ်ႈ တီႈပႃႇႁဵဝ်ႈ ၶႄႇၵဝ်ႈၵၢင်ႉ။


“ဢၼ်လႆႈႁၼ် တႄႉ ၽူႈၵွၼ်းသိုၵ်း ၸုမ်းသိုၵ်းရၶႅင်ႇ၊ ၽူႈၼမ်း ၸုမ်းသိုၵ်းၶၢင် ၊  ၸုမ်းသိုၵ်းတႆး မိူၼ်ၼင်ႇ ၸဝ်ႈၶိူဝ်းတႆး၊  ၸိူဝ်းၼႆႉ မႃးၶဝ်ႈႁူမ်ႈ၊ သိုၵ်းတႆး၊ သိုၵ်းလွႆ ၊ သိုၵ်းၵဝ်ႈၵၢင်ႉ၊ သိုၵ်းဝႃႉ ၸိူဝ်းၼႆႉ ၵေႃႈ ၼႄၽၢင်ႁၢင်ႈသိုၵ်းသေ ၸွမ်းသူင်ႇ တၵ်ႉယမ် ၶႂၼ်ငဝ်း ၽိူင်ၵျႃးၽူး ၵမ်းလိုၼ်းသုတ်း” - ၼႆ ၽူႈမီးၸၼ်ႉ ဢၼ်ၵႂႃႇၶဝ်ႈႁူမ်ႈ ပၢင်ၸႃႇပၼ ၽိူင်ၵျႃးၽူး ၼၼ်ႉလၢတ်ႈ။


ၽိူင်ၵျႃးၽူးၼႆႉ ၵိူတ်ႇမိူဝ်ႈပီ 1937 ၸႃႇတိ တီႈၵိူတ်ႇ ၵဝ်ႈၵၢင်ႉ၊ ပီႈဢၢႆႈ ပဵၼ် ၽိူင်ၵျႃးသိူင်း ႁူဝ်ပဝ်ႈ တပ်ႉသိုၵ်းၵူဝ်းၵၢင်ႉ MNDAA ယၢမ်းလဵဝ်။


ၽိူင်ၵျႃးသိူင်း တင်း ၽိူင်ၵျႃးၽူး သွင်ပီႈၼွင်ႉၼႆႉ ၸိုဝ်ႈယႂ်ႇ ၼႂ်းပၢင်တိုၵ်း ၸဵမ်ပၢၼ်ၶွမ်ႊမိဝ်ၼိတ်ႉ။ ၸဵမ်မိူဝ်ႈပီ 1962 ပၢၼ် ၸွမ်သိုၵ်းၼႄႇဝိၼ်းယိုတ်းဢႃႇၼႃႇၼၼ်ႉ သၢၼ်မိုဝ်းၵၼ်တင်း လုၵ်ႈလၢၼ် ၸဝ်ႈၾႃႉၵဝ်ႈၵၢင်ႉသေ တႄႇၵၢၼ်လုၵ်ႉၽိုၼ်ႉမႃး။ ယၢမ်ႈယူႇၼႂ်းတပ်ႉသိုၵ်း ၸိုင်ႈတႆး SSA ဢၼ်ၸဝ်ႈမႄႈၼၢင်းႁိူၼ်းၶမ်းဢွၼ်ႁူဝ်။


ၽိူင်ၵျႃးၽူးၼႆႉ မေႃယူႇၵိၼ်သိုဝ်ႈယူဝ်း ဢမ်ႇတွၼ်ႉ  သမ်ႇမႅၼ် ၊ မေႃယူႇလပ်ႉတူဝ်လပ်ႉၶိင်း၊ ၸိုဝ်ႈသဵင်ဢမ်ႇတွၼ်ႉလုမႃးသေပွၵ်ႈ  လႄႈႁဵတ်းႁႂ်ႈၵူၼ်းၸၢဝ်းၶႄႇ ၵဝ်ႈၵၢင်ႉ ႁၵ်ႉႁွမ် ၵႅမ်ႉထႅမ်ပၼ်ႁႅင်း။


မိူဝ်ႈပၢၼ်လုၵ်ႉၽိုၼ်ႉ ၶွမ်ႊမိဝ်ႇၼိတ်ႉၼၼ်ႉၵေႃႈ သွင်ပီႈၼွင်ႉ ဢွၼ်ႁူဝ်တေႃႇတၢၼ်ႈ ၽၢတ်ႇဢွၵ်ႇ ၶွမ်မိဝ်ၼိတ်ႉမိူင်းမၢၼ်ႈသေ ၵေႃႇတင်ႈတပ်ႉသိုၵ်းၵဝ်ႈၵၢင်ႉ ပူၵ်းတင်ႈၼႃႈလိၼ် ၶိုၵ်ႉတွၼ်း မၢႆ 1 မိူင်းတႆး ပွတ်းႁွင်ႇ။   မိူဝ်ႈပီ 2008 သိုၵ်းမၢၼ်ႈ တဵၵ်းၸႂ်ႉ သိုၵ်းၵဝ်ႈၵၢင်ႉ လႅၵ်ႈပဵၼ်တပ်ႉပႂ်ႉလႅၼ်လိၼ် ၼၼ်ႉၵေႃႈ သွင်ပီႈၼွင်ႉဢမ်ႇႁပ်ႉ  ဢွၼ်ဢဝ် တပ်ႉသိုၵ်း ၵဝ်ႈၵၢင်ႉ တိုၵ်းတေႃး လုၵ်ႉၽိုၼ်ႉ သိုၵ်းမၢၼ်ႈ လူင်ပွင်ၸိုင်ႈမၢၼ်ႈမႃး တေႃႇဝၼ်းမိူဝ်ႈၼႆႉ။