ၾူၼ်တူၵ်းႁႅင်းထပ်းၵၼ်လၢႆဝၼ်းလႄႈ ၼမ်ႉထူမ်ႈၼႂ်းၸႄႈဝဵင်းမိူင်းပၼ်ႇလၢႆပွၵ်ႉလၢႆဝၢၼ်ႈ ႁဵတ်းႁႂ်ႈၶူဝ်၊ သဵၼ်ႈတၢင်းBP1 ၊ပုင်ႇပႃႇၶႅမ်- မိူင်းတူၼ်- မိူင်းပၼ်ႇ - လၢင်းၶိူဝ်း - တူၼ်ႈတီး လူႉၵွႆလၢႆတီႈ တူင်ႈၼႃးၺႃးၼမ်ႉထူမ်ႈၼမ်ဝႃႈၼႆ။

ဝၼ်းတီႈ 17-18/07/2017 ၾူၼ်တူၵ်းႁႅင်းဢမ်ႇထၢတ်ႇလႄႈ ၼမ်ႉႁူၺ်ႈၼမ်ႉလွႆလႆလူင်းၸူးဝၢၼ်ႈ ၾၢႆတႅၵ်ႇလႄႈႁဵတ်းႁႂ်ႈၼမ်ႉထူမ်ႈ လၢႆတီႈမိူၼ်ၼင်ႇ ဝၢၼ်ႈလွႆၼွႆႉ၊ တၢင်းတူၵ်းဝဵင်းမိူင်းပၼ်ႇလႄႈ သဵၼ်ႈတၢင်းတႃႇဢွၵ်ႇၵႂႃႇမိူင်းတူၼ်၊ ၾၢႆႇႁွင်ႇဝဵင်းၸိူဝ်းၼႆႉ။  သၢႆတၢင်းလႄႈ ၶူဝ်လူႉၵွႆ ၊ၼမ်ႉထူမ်ႈ တူင်ႈၼႃးတင်းၼမ်။


လုင်းပၺ်ၺႃၸဝ်ႈၼႃးမိူင်းပၼ်ႇလၢတ်ႈဝႃႈ - “ ဢၼ်ၼမ်ႉထူမ်ႈယႂ်ႇ ထူမ်ႈလူင်ၸိူင်ႉၼႆၼႂ်းပီၼႆႉပဵၼ် ပွၵ်ႈဢွၼ်တၢင်းသုတ်း ႁဵတ်းႁႂ်ႈၼႃးလူႉၵွႆၼမ်၊ ဢမ်ႇၸၢင်ႈႁဵတ်းၼႃး တႃႇတေႁဵတ်းၼႃးၵေႃႈလႆႈပႂ်ႉ ႁႂ်ႈၼမ်ႉႁႅင်ႈၵွၼ်ႇ ” ဝႃႈၼႆ။


မိူဝ်ႈလဵဝ်ၶူဝ်လႄႈသဵၼ်ႈတၢင်းတႄႉ ၸဝ်ႈၼႃႈတီႈၽူႈမီးပုၼ်ႈၽွၼ်းလႄႈ ၵူၼ်းဝၢၼ်ႈၸွႆႈၵၼ်သေ ၶိုၼ်းမႄးယဝ်ႉ တွၼ်ႈတႃႇတူင်ႈၼႃးတႄႉၵူၼ်းမိူင်းတိုၵ်ႉၶတ်းၸႂ်ဢဝ်ၼမ်ႉဢွၵ်ႇယူႇ ဝႃႈၼႆ။