ၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး Committee For Shan State Unity (CSSU) တေၸတ်းႁဵတ်းပၢင်ၵုမ် တႃႇႁၢင်ႈ ႁႅၼ်း ပၢင်ၵုမ်လူင် လွင်ႈငမ်းယဵၼ် ၸိုင်ႈမိူင်း ပွၵ်ႈတေမႃး လႄႈ တေဢုပ်ႇၵၼ်တႃႇၶႅၼ်ႇတႅမ်ႈပၵ်းပိူင် ၸုမ်းဢၼ်မႂ်ႇ ဝႃႈၼႆ။


ၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး CSSU တေၸတ်းႁဵတ်း ပၢင်ၵုမ် တီႈဝဵင်းၵဵင်းမႆႇ ၸိုင်ႈထႆး တႃႇၶၢဝ်းတၢင်း 3 ဝၼ်း တႄႇဢဝ် ဝၼ်းတီႈ 20-22/07/2017။ ႁူဝ်ၶေႃႈတေဢုပ်ႇဢူဝ်းၵၼ်သမ်ႉ ထတ်းသၢင်ၼိူဝ် ပၢင်ၵုမ်လွင်ႈငမ်းယဵၼ် မိူင်းႁူမ်ႈတုမ် 21 ပၢင်လူင် ပွၵ်ႈၵမ်း 2 ။ ထတ်းသၢင် မူႇပိူင် CSSU လႄႈ ၽႅၼ်ၵၢၼ်ၶၢဝ်းၼႃး ၸဵမ်ၸိူဝ်းၼႆႉ ဝႃႈၼႆ။

ၸၢႆးၺုၼ်ႉလုၼ်ႇ ႁိုဝ် ၸၢႆးၼုတ်း ၽူႈၼၢမ်းၼႂ်း ၵူႈလွင်ႈလွင်ႈ ၵေႃႁူမ်ႈသၢင်ႈ ၸိုင်ႈတႆး (SSJAC) ဢၼ်ပဵၼ်လုၵ်ႈ ၸုမ်း ၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး ၵေႃႈလၢတ်ႈတီႈၸုမ်းၶၢဝ်ႇသႅၼ်ပၢႆးဝႃႈ “ ပၢင်ၵုမ် CSSU  ပွၵ်ႈၵမ်းၼႆႉ တေမႄး တႅမ်ႈပၵ်းပိူင်လၵ်းၵၢၼ် ၸုမ်းဢၼ်မႂ်ႇ CSSU ဢၼ်လႆႈၶႅၼ်ႇတႅမ်ႈပိူင်ယုၵ်းယၢင်ႇ ယိုၼ်ႈၸူးတီႈႁူဝ်ပဝ်ႈဝႆႉၼၼ်ႉ” ၼႆယဝ်ႉ။


“ ပၢင်ၵုမ်ၼႆႉ တေဢုပ်ႇဢူဝ်း ထတ်းသၢင်ၶိုၼ်း လွင်ႈဢုပ်ႇဢူဝ်းၵၼ် 21 ပၢင်လူင် ပွၵ်ႈတီႈ 2 ၼၼ်ႉ မၼ်းမီးလွင်ႈ တိူဝ်းတွၼ်းသင်မႃး၊ မီးလွင်ႈ တူၵ်းလူင်းသင်ၵၼ်လႆႈ ပေႃးယဝ်ႉ ၸွင်ႇမၼ်းမီးၽွၼ်းလီ တႃႇတေလႅၵ်ႈလၢႆႈလႆႈ တေ ဢွၼ်ၵၼ်ၶိုၼ်းမႄးထတ်း သၢင်ၶိုၼ်းသေ ဢုပ်ႇဢူဝ်းၵၼ်။ ထႅင်ႈဢၼ်ၼိုင်ႈသမ်ႉ လွင်ႈမၢႆမီႈၶွင် CSSU ၼင်ႇႁိုဝ် ၵူၼ်းတင်းၼမ် တေၶဝ်ႈမႃး ၸူးၵၼ်ၼၼ်ႉ ထုၵ်ႇလီမီးမၢႆမီႈဢီႇသင်ထႅင်ႈ၊ လွင်ႈမီးပၼ်ႁႃၵၼ်မႃးၸိူင်ႉၼၼ်ႉ ႁဝ်း သမ်ႉထုၵ်ႇလီမီးမၢႆမီႈၵႄႈၶႆ ၸိူင်ႉႁိုဝ်။ လိူဝ်ၼၼ်ႉ မိူဝ်ႈၼႃးမႃး CSSU တေႁဵတ်းဢီႇသင်ၵႂႃႇ ၸဵမ်ၸိူဝ်းၼႆႉ” ၸၢႆးၶိူဝ်းသႅင် ၽူႈတႅၼ်းၸုမ်း Shan CBOs ၵဵင်းမႆႇ လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။


ဝၢႆးလင်ပၢင်ၵုမ်ယဝ်ႉ တေသိုပ်ႇမီး ပၢင်ဢုပ်ႇဢူဝ်းလႅၵ်ႈလၢႆႈ Workshop တႃႇ CSSU ထႅင်ႈ 3 ဝၼ်း တႄႇဢဝ် ဝၼ်းတီႈ 23-25/07/2017 တီႈၵဵင်းမႆႇ ၵူၺ်းၼင်ႇၵဝ်ႇ ဝႃႈၼႆ။


မိူဝ်ႈလဵဝ် ႁူဝ်ပဝ်ႈ ၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး ပဵၼ်ၸွမ်သိုၵ်းလူင် ယွတ်ႈသိုၵ်း၊ ၽူႈၼမ်းၼႂ်း ပဵၼ်ၸွမ်ႁၢၼ် ပွင်ၶိူဝ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ။


ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၼႆႉ ၵေႃႇတင်ႈမႃး မိူဝ်ႈဝၼ်းတီႈ 15/10/2013 ပိူဝ်ႈတႃႇၵႅတ်ႇၶႄႁႄႉၵင်ႈ သုၼ်ႇလႆႈၵူၼ်းမိူင်းၸိုင်ႈတႆး ၵူႈၸၢဝ်းၶိူဝ်း။ မီးယိူင်းဢၢၼ်း လႄႈ လၵ်းၵၢၼ် သွင်ပိူင်- 1.ပိူဝ်ႈတႃႇ ၵူၼ်းမိူင်းၸိုင်ႈတႆး ၵူႈၸၢဝ်းၶိူဝ်း ၽွမ်ႉႁူမ်ႈၵၼ်ၵႄႈလိတ်ႈ ၵမ်ၸႃတႃ (ၵၢမ်ႇၵျမ်ႇမႃႇ) ၸိုင်ႈတႆး။ 2.ပိူဝ်ႈတႃႇႁူမ်ႈၵၼ် ႁၢင်ႈႁႅၼ်း ယူင်ႉၶၢပ်ႈၵၢၼ်မိူင်း (Political frame-work) ပိူဝ်ႈတႃႇဢုပ်ႇဢူဝ်း ၵၢၼ်မိူင်း (ၸိုင်ႈတႆးၼႂ်းဝၼ်းမိူဝ်းၼႃႈ)။


မီးလုၵ်ႈၸုမ်းမိူၼ်ၼင်ႇ - ပႃႇတီႇၵၢၼ်မိူင်းတႆး ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး ႁိုဝ်ပႃႇ တီႇႁူဝ်သိူဝ် (SNLD) ၊ တီႇမူဝ်ႇၶရႅတ်ႉ တိၵ်ႉပႃႇတီႇၸၢဝ်းၶိူဝ်းတႆး ႁိုဝ် ပႃႇတီႇသိူဝ်ၽိူၵ်ႇ (SNDP) ။ ၸုမ်းတႆးယိပ်း ၵွင်ႈၵၢင်ႇလုၵ်ႉၽိုၼ်ႉ ၶွင်ႇသီႇဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၊ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၊ ၵေႃႁူမ်ႈသၢင်ႈၸိုင်ႈတႆး SSJAC [ဢၼ်မီး SSPP/SSA ၊ ပႃႇတီႇႁူဝ်သိူဝ် SNLD ၊ တပ်ႉသိုၵ်းၵူၼ်းမိူင်း (ၸုမ်းပီႇတုၸိတ်ႉသႅင်ၵႅဝ်ႉ)၊] ၸုမ်းတူင်ႇဝူင်းၵူၼ်းတႆး-မိူင်းထႆး (Shan CBOs, Thailand) ။ ပႃႇတီႇမႂ်ႇသုင်တီႇမူဝ်ႇ ၶရေႇၸီႇမိူင်းတႆးပွတ်း ဢွၵ်ႇ(ESSDDP) ႁိုဝ် ပႃႇတီႇၵွင်ၸႆး၊ ၸုမ်းၵပ်းသၢၼ်သိုင်ႇ ၾိင်ႈမိူင်းတႆး၊ ၸုမ်းသႅၼ်းႁုၼ်ႈမႂ်ႇ ၸိုင်ႈတႆး (NGSS) ၊ ၸုမ်းၵူၼ်းၼုမ်ႇတႆး (TYO) ၊ မုၵ်ႉၸုမ်းၸၢဝ်းၶိူဝ်းတႆး-မိူင်းထႆး (TNAT)၊ ၵေႃႁူမ်ႈသၢင်ႈၵူၼ်း ၼုမ်ႇတႆး ၸိူဝ်းၼႆႉ။