ၽူႈမီးပုၼ်ႈၽွၼ်းလၢႆၾၢႆႇ မိူၼ်ၼင်ႇ ပႃႇတီႇၵၢၼ်မိူင်း၊ တပ်ႉသိုၵ်း၊ ၸုမ်းတူင်ႇဝူင်းၵူၼ်း ၸိူဝ်းၼႆႉ ႁူမ်ႈၵၼ်ၸွႆႈထႅမ်ႁႅင်းၵၢၼ် ၸိူဝ်းၵႂႃႇႁဵတ်းၵၢၼ်မိူင်းထႆး ၶိုၼ်းပွၵ်ႈမိူင်း။


ဝၼ်းတီႈ18/07/2017 ၶွင်ႇသီႇဢဝ်ၶိုၼ်းၸိုင်ႈတႆး RCSS၊ ပႃႇတီႇမႂ်ႇသုင်ၸိုင်ႈတႆး SSPP၊ ပႃႇတီႇ ႁူဝ် သိူဝ် SNLD ၊ သိူဝ်ၽိူၵ်ႇSNDP ၊ ၼူၵ်ႉယုင်း NLD ဢိၵ်ႇၸုမ်းတူင်ႇဝူင်းၵူၼ်း ၽူႈမီးၼမ်ႉၸႂ်ၸိူဝ်းၼႆႉ ႁူမ်ႈၵၼ်ပႂ်ႉၸွႆႈထႅမ် ႁႅင်းၵၢၼ်ဢၼ်တေပွၵ်ႈမိူင်း ၽူႈၸၢႆးမီး 18ၵေႃႉ၊ ယိင်း17ၵေႃႉႁူမ်ႈတင်းမူတ်း 35ၵေႃႉ တီႈလႅၼ်လိၼ်မႄႈသၢႆ- တႃႈၶီႈလဵၵ်ႉ။

Photo: Sao Hsang Li

ပွၵ်ႈၵမ်းၼႆႉ ပႃႇတီႇသိူဝ်ၽိူၵ်ႇလႄႈ ႁူင်းႁႅမ်း 1G1 လဵင်ႉလူၶဝ်ႈၽၵ်းတၢင်းၵိၼ်၊ ပႃႇတီႇၼူၵ်ႉယုင်း ၸွႆႈငိုၼ်း ၼိုင်ႈၵေႃႉလႂ် 3,000 ၵျၢတ်ႉ၊ SSPP ၸွႆႈပၼ်ၵႃႈၵႃးတႃႇပွၵ်ႈႁိူၼ်း ၸိူဝ်းၼႆႉ။


ၸဝ်ႈႁၢၼ်သႅင်လီ ၽူႈၼင်ႈလုမ်းၵပ်းသၢၼ် RCSS ဝဵင်းတႃႈၶီႈလဵၵ်ႉလၢတ်ႈဝႃႈ-  “ ပေႃးပီႈၼွင်ႉႁဝ်း ၶႃႈ ႁူမ်ႈၵၼ်သေမႃးၸိုင် ႁဝ်းၶႃႈၸၢင်ႈၵပ်းသၢၼ်ၵၼ်သေၸွႆႈထႅမ်လႆႈ ၵွပ်ႈၼၼ်လႄႈ ပေႃးပဵၼ် လႆႈၼႆႉ မႃးၵၼ်ပဵၼ်ၸုမ်း၊ မီးလွင်ႈတၢင်းၸိူင်ႉႁိုဝ် မီးတၢင်းယၢပ်ႇသင်ၵေႃႈ ႁႂ်ႈၵပ်းသိုပ်ႇမႃးတီႈ ၸုမ်းၸွႆႈထႅမ်ႁဝ်းၶႃႈ ဢၼ်မီးဝႆႉတီႈမိူင်းၵွၵ်ႇ၊ ၵဵင်းမႆႇ လႄႈၵပ်းသိုပ်ႇတီႈ မၢႆၾူၼ်း 098752 7610 ၵေႃႈလႆႈယူႇ ” ဝႃႈၼႆ။


လူင်ပွင်ၸိုင်ႈမိူင်းထႆး ပိုၼ်ၽၢဝ်ႇယွၼ်ႇယၢၼ်းယိုတ်ႈၶၢဝ်းယၢမ်း ပၼ် ႁႂ်ႈႁႅင်းၵၢၼ် ၶပ်းၶိုင်လွင်ႈဝတ်း ဝႂ်လႄႈ ဢမ်ႇမီးဝတ်းဝႂ်ၼၼ်ႉၵေႃႈ ႁႂ်ႈပေႃႈလဵင်ႉၼၢႆးၸၢင်ႈၵႂႃႇတၢင်ႇယွၼ်း ႁဵတ်းလႆႈၼႆသေတႃႉ ႁႅင်းၵၢၼ်ယၢၼ်မိူင်းယင်းတိုၵ်ႉဢွၼ်ၵၼ် ပွၵ်ႈႁိူၼ်းယူႇၶိူဝ်းယႂ်း။ မိူဝ်ႈဝၼ်းတီႈ 17/07/2017 ၶွင်ႇသီႇဢဝ်ၶိုၼ်းၸိုင်ႈတႆး RCSS ၵပ်းသၢၼ်တင်းၸုမ်းပႃႇတီႇၵၢၼ်မိူင်းတႆး ၊ ၸဝ်ႈၼႃႈတီႈၾၢႆႇ ၵူတ်ႇထတ်းၵူၼ်းၶဝ်ႈမိူင်းထႆး၊ မၢၼ်ႈ၊ ၸုမ်းတူင်ႇဝူင်းၵူၼ်းၸိူဝ်းၼႆႉသေၶပ်းၶိုင်ပၼ်ႁႅင်းၵၢၼ် ပွၵ်ႈၸူးမိူင်းတႆး 30 ပၢႆ။