ၸိုင်ႈတႆးပွတ်းႁွင်ႇ ၸတ်းပၢင်ၶႅင်ႇၼၢင်းႁၢင်ႈလီ ၼၢင်းမူၺ်ၶမ်း သၢဝ်ၼမ်ႉၶမ်း ထုၵ်ႇလိူၵ်ႈ ပဵၼ်တူဝ်တႅၼ်း ၼၢင်းႁၢင်ႈလီၸိုင်ႈတႆးပွတ်းႁွင်ႇ။


ဝၼ်းတီႈ 09/07/2017 ၸိုင်ႈတႆးပွတ်းႁွင်ႇ ၸတ်းႁဵတ်းပၢင်ၶႅင်ႇၼၢင်းငၢမ်း (ၼၢင်းႁၢင်ႈလီ) Miss Shan State (North) တီႈႁူင်းႁေႃးဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ မီးၼၢင်းငၢမ်းၶဝ်ႈၶႅင်ႇ တင်းမူတ်း20ၵေႃႉ။ ၼၢင်းမူၺ်ၶမ်း ဢႃယု 24 ပီ ၵူၼ်းဝဵင်းၼမ်ႉၶမ်း လႆႈထုၵ်ႇလိူၵ်ႈပဵၼ်တူဝ် တႅၼ်းၼၢင်းငၢမ်းၸိုင်ႈတႆးပွတ်းႁွင်ႇ။

ၼၢင်းမူၺ်ၶမ်း လၢတ်ႈဝႃႈ - “ ယိၼ်းၸူမ်းလႄႈမီးတၢင်းသိူဝ်းတႄႉဢၼ် ထုၵ်ႇလိူၵ်ႈပဵၼ်ၼၢင်းႁၢင်ႈ လီပွတ်းႁွင်ႇ ၶႂ်ႈၾၢၵ်ႇထိုင်ၵူၼ်းၼုမ်ႇသႅၼ်းႁုၼ်ႈမႂ်ႇ ဢၼ်တေမႃးၼၼ်ႉ ဝႃႈႁဝ်းလူဝ်ႇမီးလွင်ႈႁတ်း ႁၢၼ် မီးလွင်ႈမၼ်ႈၸႂ်ၼိူဝ်တူဝ်ၸဝ်ႈၵဝ်ႇ ဢမ်ႇႁဵတ်းလႆႈၼၼ်ႉယႃႇႁႂ်ႈမီး ။ ဢၼ်လမ်ႇလွင်ႈၼၼ်ႉ ႁၢင်ႈလီတၢင်းၼွၵ်ႈယဝ်ႉ ဢမ်ႇၵႃႈပၢႆးတူဝ် ပၢႆၸႂ်ၵေႃႈလူဝ်ႇလႆႈလီၸိုၼ်ႈၸၢင်ႇႁၢင်ႈလီၸွမ်း ”ဝႃႈၼႆ။


ၼၢင်းမူၺ်ၶမ်းၼႆႉလိူဝ်သေလႆႈႁပ်ႉသူးၼၢင်းႁၢင်ႈလီယဝ်ႉ ယင်းလႆႈႁပ်ႉပႃးသူးတူဝ်ၶိင်းႁၢင်ႈလီ၊ သူးလွင်ႈယူႇသဝ်းၶႅမ်ႉလႅပ်ႈ၊ သူးလွင်ႈၶူဝ်းၼုင်ႈၸိူဝ်းၼႆႉ။ ၼၢင်းငၢမ်းဢၼ်လႆႈႁပ်ႉသူးတီႈ2 ပဵၼ် ၼၢင်းၽိဝ်ႇ ၽိဝ်ႇဝိၼ်းၶၢႆႇဢႃယု 18 ပီ (ၵျွၵ်ႉမႄး)၊ သူႈတီႈ3ပဵၼ် ၼၢင်းမျၢတ်ႈသၢၼ်းၽူး ဢႃယု 25 ပီ (ၼမ်ႉလၼ်ႈ)။


Miss Shan State (North) ၼၢင်းမူၺ်ၶမ်းၼႆႉတေသိုပ်ႇၶဝ်ႈၶႅင်ႇ ၸၼ်ႉမိူင်းႁူမ်ႈတုမ်မျၢၼ်ႇမႃႇ Miss Golden Land Myanmar ၼႂ်းလိူၼ်ၻီႊသႅမ်ႊၿိူဝ်ႊ ပီ 2017 တီႈဝဵင်းလူင်တႃႈၵုင်ႈ တႃႇလိူၵ်ႈ တူဝ်တႅၼ်းမိူင်းႁူမ်ႈတုမ်မျၢၼ်ႇမႃႇ ဝႃႈၼႆ။


ၼၢင်းမူၺ်ၶမ်းၼႆႉ ပဵၼ်လုၵ်ႈယိင်းလူင်ၸၢႆးလႃႉၵျေႃႇ ၼၢင်းသႅင်သႃႇ ယဝ်ႉႁူင်းႁဵၼ်းၸၼ်ႉၸွမ် BA History မိူဝ်ႈပီ2013 သေ ယၢမ်းလဵဝ်ပိုတ်ႇႁၢၼ်ႉၶူဝ်းတႆးယဵပ်ႉၶူဝ်းတႆးဝႆႉတီႈႁိူၼ်းပွၵ်ႉႁူဝ်ၵၢတ်ႇ ဝဵင်းၼမ်ႉၶမ်း။