ၵူၼ်းသွင်ၵေႃႉ ၶီႇရူတ်ႉၶိူင်ႈ လုၵ်ႉဝဵင်းၼမ်ႉၶမ်း ဢွၵ်ႇၵႂႃႇႁိုၵ်ႉၺႃး သိုၵ်းလူင်ပွင်ၸိုင်ႈမၢၼ်ႈ ၸွမ်းတၢင်းသေ ထုၵ်ႇႁႄႉၵိုတ်းဢမ်ႇၵိုတ်းလႄႈ ပိုတ်းယိုဝ်းၵၼ်တၢႆ1ၵေႃႉမၢတ်ႇ1 ၵေႃႉ ဝႃႈၼႆ။


ဝၼ်းတီႈ 10/07/2017 ယၢမ်းဝၢႆးဝၼ်း သိုၵ်းလူင်ပွင်ၸိုင်ႈမၢၼ်ႈ ႁူပ်ႉႁၼ်ၵူၼ်းသွင်ၵေႃႉ ၶီႇရူတ်ႉ ၶိူင်ႈမႃး၊ ႁႄႉၶဝ်သွင်ၵေႃႉၵိုတ်းဢမ်ႇၵိုတ်းသေ ၸူၵ်းၵွင်ႈပွတ်းဢွၵ်ႇ ၾၢႆႇသိုၵ်းလူင်ပွင်ၸိုင်ႈမၢၼ်ႈ ၵေႃႈလၼ်ႇၵွင်ႈယိုဝ်းသႂ်ႇ ႁဵတ်းႁႂ်ႈမီးၵူၼ်းမၢတ်ႇၸဵပ်းလႄႈလူႉတၢႆ ၵႂႃႇတၢႆတီႈႁူင်းယႃၼမ်ႉၶမ်း1ၵေႃႉ တီႉတူဝ်လိပ်းၼိုင်ႈၵေႃႉ ပၢင်ပိုတ်းယိုဝ်းၵၼ်ပဵၼ်ႁိမ်းပွၵ်ႉလူင် ဝဵင်းၼမ်ႉၶမ်းၵူၺ်းၼႆ ၵူၼ်းၸမ်ၸႂ် တပ်ႉသိုၵ်းမၢၼ်ႈၼမ်ႉၶမ်းလၢတ်ႈ ။

ၵူၼ်းမိူင်းၼမ်ႉၶမ်းလၢတ်ႈဝႃႈ - “ၵွၼ်ႇၼႃႈၼႆႉ4-5 ဝၼ်း သိုၵ်းလူင်ပွင်ၸိုင်ႈလႆႈၶၢဝ်ႇဝႃႈ မီးၵူၼ်းၼႂ်း ၸုမ်းသိုၵ်း TNLA မႃးတူင်ႉၼိုင်ၼႂ်းပွၵ်ႉၼႂ်းၾၢႆႇၼႆလႄႈ ၶဝ်မႃးၵူတ်ႇထတ်း ၽိူဝ်ႇၺႃး ၶဝ်2ၵေႃႉ ၵေႃႈပဵၼ်ၼႆယဝ်ႉ ” ဝႃႈၼႆ။


ၵူၼ်းၼမ်ႉၶမ်းတႄႉလၢတ်ႈဝႃႈ - “ ၶဝ်2ၵေႃႉပဵၼ်ၵူၼ်းဝၢၼ်ႈလႂ် ၸိုဝ်ႈသဵင်ၶႃယင်းပႆႇႁူႉ ၸႂ်ႈဢမ်ႇၸႂ်ႈ ၸုမ်း TNLA ၵေႃႈဢမ်ႇႁူႉ” ဝႃႈၼႆ။


ၶၢဝ်ႇသိုၵ်းလူင်ပွင်ၸိုင်ႈမၢၼ်ႈတႄႉပိုၼ်ၽၢဝ်ႇဝႃႈ - တီႉလႆႈသိုၵ်း TNLA သွင်ၵေႃႉဢၼ်ႁွၼ်ႈထဝ်ႇ ၵဵပ်းၶွၼ်ႇၼႂ်းဝဵင်းၼမ်ႉၶမ်း ဝႃႈၼႆ။


ၼႂ်းၸိုင်ႈတႆးပွတ်းႁွင်ႇ ပႃးၸဵမ်ဝဵင်းၼမ်ႉၶမ်းၼႆႉ တင်ႈတႄႇသိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်း လေႃႇတိုၵ်းၸုမ်းဢူၺ်းလီသိုၵ်းပွတ်းႁွင်ႇ (ၶၢင်KIA၊ လွႆ TNLA၊ ၵူဝ်းၵၢင်ႉ MNDAA ၊ ရၶႅင်ႇ AA ) သိုၵ်းလွႆ TNLA ပိုတ်ႇၼႃႈသိုၵ်းတေႃႇ RCSS/SSAမႃး - ၵၢၼ်ၵႂႃႇမႃးႁႃၵိၼ်လဵင်ႉတွင်ႉယၢပ်ႇ၊ လွင်ႈႁူမ်ႇလူမ်ႈၵူၼ်းဝၢၼ်ႈၵူၼ်းမိူင်းၵေႃႈဢမ်ႇမီးယဝ်ႉ - ဝႃႈၼႆ။