ၸဝ်ႈတူၼ်ၶူးလူင် ဢႃၸေယ ဢၽိထၸမႁႃရတ်ႉထၵုရု ၽူႈၵွၼ်းတိူၵ်ႈသွၼ်လိၵ်ႈထမ်မူဝ်းတယ ဝဵင်းၵဵင်းတုင် ၶဝ်ႈသူၼ်မၢၵ်ႇႁၢၵ်ႈၶမ်းၵႂႃႇ လူၺ်ႈတၢင်းပဵၼ်ၵူၼ်းထဝ်ႈ ၽွင်းဢႃယု ၸဝ်ႈ 91 ပီ တေပူၼ်ႉၶၢပ်ႈတူဝ် လုမ်းလႃး သၢင်းၵျူဝ်ႇ ဝႃႈၼႆ။


ဝၼ်းတီႈ 15/10/2017 လုၵ်ႈၼွင်ႉပွင်ႈပၢႆတင်း တၵ်ႉၵႃႇသတ်ႉထႃး တီႈၸမ်/ၵႆ ၵုမ်ၵၼ် လႆႈၸႂ်ဝႃႈတေ ပူၼ်ႉၶၢပ်ႈ တူဝ် မိူဝ်ႈဝႆႉတဵမ် 91 ဝၼ်း ဢွၼ်ၵၼ်လုမ်းလႃးသၢင်း ၵျူဝ်ႇ တီႈထၢတ်ႈႁူဝ်သိူဝ်ၶမ်း သဵၼ်ႈတၢင်း ၵဵင်းတုင်-မိူင်းလႃး ယၢၼ်ၵဵင်းတုင် 3 လၵ်း ၼႂ်းၸႄႈဝဵင်း ၵဵင်းတုင် ၸိုင်ႈတႆးပွတ်းဢွၵ်ႇၶူင်း ဝႃႈၼႆ။

ၸဝ်ႈၶူးဢၵ်ႉၵ လုၵ်ႈၼွင်ႉတပေးပွင်ႈပၢႆ ၸဝ်ႈတူၼ်ၶူးလူင် ဢႃၸေယ လၢတ်ႈဝႃႈ “  တေႃႈလဵဝ်ၼႆႉ တူဝ်ၸဝ်ႈ တူၼ်ၶူး လူင်ႁဝ်းၶႃႈ ဝႆႉယူႇတီႈဝတ်ႉထမ်မူဝ်းတယ။ ပေႃးထိုင်မႃး ၼႂ်းဝၼ်းတီႈ 17/09/2017 တေမႃးၼႆႉ ႁဝ်းတေပၢင်းၶၢပ်ႈ တူဝ်ၸဝ်ႈႁဝ်း လူင်းၵျွင်းၼိပ်ႉပၢၼ်ႇယဝ်ႉ တေယေႃးၵႂႃႇဝႆႉတီႈ ထၢတ်ႈႁူဝ်သိူဝ် တႃႇ ၶၢဝ်းတၢင်း ၼိုင်ႈလိူၼ်သေ ယဝ်ႉ ၵေႃႈ ၸင်ႇတေလုမ်းလႃးသၢင်းၵျူဝ်ႇ။


ၼႂ်းၶၢဝ်းတၢင်းၼိုင်ႈလိူၼ် ဢၼ်တေဝႆႉတီႈ ထၢတ်ႈႁူဝ်သိူဝ်ၼၼ်ႉ တေမီးပၢင် ႁေႃးထမ်းတြႃး ၵူႈၶမ်ႈ တေမီးပွႆးလၢမ်းထႅင်ႈ၊ ထႅင်ႈလွင်ႈၼိုင်ႈသမ်ႉ ၵွပ်ႈသင် ဝႆႉ ၶၢပ်ႈတူဝ်ၸဝ်ႈတူၼ်ၶူးႁဝ်းႁိုင်ၼႆ ဝႆႉၸွမ်းဢႃယုၸဝ်ႈ ယွၼ်ႉဝႃႈ ဢႃယုၸဝ်ႈ လႆႈ 91 ပီ။ ယွၼ်ႉၼၼ် ၸင်ႇဝႆႉ 91 ဝၼ်း” ဝႃႈၼႆ။


ၸဝ်ႈတူၼ်ၶူးလူင် ဢႃၸေယၼႆႉ ၶဝ်ႈသူၼ်မၢၵ်ႇႁၢၵ်ႈၶမ်းၵႂႃႇ လူၺ်ႈတၢင်းပဵၼ်ၵူၼ်းထဝ်ႈ ၽွင်းဢႃယု ၸဝ်ႈ 91 ပီ ဝႃသႃ 71 ပီ။ မိူဝ်ႈပူၼ်ႉမႃး 11/07/2017 ၶၢဝ်းယၢမ်းၵၢင်ၶမ်ႈ 07:08 မူင်း ၸဝ်ႈတူၼ်ၶူးလူင် ဢႃၸေယ ဢၽိထ ၸမႁႃရတ်ႉ ထၵုရု လႆႈၶဝ်ႈ သူၼ်မၢၵ်ႇႁၢၵ်ႈၶမ်းၵႂႃႇ တီႈဝတ်ႉဝိႁၢရ်တိူၵ်ႈသွၼ် လိၵ်ႈထမ်မူဝ်းတယ ၸႄႈဝဵင်းၵဵင်း တုင် ၸိုင်ႈတႆး ပွတ်းဢွၵ်ႇၶူင်း။