ၵူၼ်းၵႃႉၵူၼ်းၶၢႆထႆး ထူပ်းတၢင်းယၢပ်ႇၽိုတ်ႇ ယွၼ်ႉပၢႆးမၢၵ်ႈမီးဢမ်ႇလီ ႁႅင်းၵၢၼ်ဢွၼ်ၵၼ်ပွၵ်ႈႁိူၼ်း ၶၢတ်ႈလၢမ်းဝႃႈပီ 2017 ႁၢၼ်ႉဢႃးႁၢၼ် (သႅင်ႇၶဝ်ႈၽၵ်း) ၸၢင်ႈႁပ်းပိၵ်ႉႁၢၼ်ႉၵႂႃႇမွၵ်ႈ 2,300 ၸဝ်ႈ/ႁၢၼ်ႉ။


ပီၼႆႉပၢႆးမၢၵ်ႈမီးတူၵ်း လူင်ပွင်ၸိုင်ႈပိုၼ်ၽၢဝ်ႇပၵ်းပိူင်ႁႅင်းၵၢၼ် ၵူၼ်းႁဵတ်းၵၢၼ် ၶႅမ်ႊၿေႃႊတီႊ ယိူဝ်ႊ၊ လၢဝ်း၊ မၢၼ်ႈ ဢွၼ်ၵၼ်ပွၵ်ႈၶိုၼ်းႁိူၼ်း ၸဝ်ႈၶူင်းၵၢၼ်၊ ႁၢၼ်ႉၶွင်ၵိၼ်ယမ်ႉ (သႅင်ႇၶဝ်ႈ၊ ၽၵ်း၊ လဝ်ႈ) ဢမ်ႇမီးၵူၼ်းႁဵတ်းၵၢၼ်၊ ၵူၼ်းသိုဝ်ႉၵေႃႈဢမ်ႇပေႃးမီးလႄႈ ထူပ်းတၢင်းယၢပ်ႇၽိုတ်ႇ ၶၢတ်ႈလၢမ်းဝႃႈပီၼႆႉတေမီးလၢၼ်ႉ ပိၵ်ႉမွၵ်ႈ 2,300  ႁၢၼ်ႉ - ဝႃႈၼႆ။

ၼၢင်းလတ်ႊၻႃႊ သမ်ႊၽဝ်ႊထွင်ႊ ၽူႈၵွၼ်းႁွင်ႈၵၢၼ်ၾၢႆႇၵၢၼ်ၵႃႉၶၢႆ (ႁၢၼ်ႉ) တၢင်းၵိၼ် လၢတ်ႈ တီႈသိုဝ်ႇၶၢဝ်ႇထႆး ၻေႊလီႊၼိဝ်ႊသ် ဝႃႈ - “ၼႂ်းပီ 2017 ၼႆႉ ၶၢတ်ႈလၢမ်းဝႃႈတေမီးႁၢၼ်ႉ ပိၵ်ႉႁပ်း မွၵ်ႈ 2,300 တီႈ  လွင်ႈတၢင်းမၼ်းတႄႉပဵၼ်ယွၼ်ႉပၢႆးမၢၵ်ႈမီးမိူင်းထႆးတူၵ်းတႅမ်ႇ ႁႅင်းၵၢၼ် ယၢၼ်မိူင်းဢွၼ် ၵၼ်ပွၵ်ႈႁိူၼ်း ”  ဝႃႈၼႆ။


သိုဝ်ႇၶၢဝ်ႇထႆးၻေႊလီႊၼိဝ်ႊသ် ပိုၼ်ၽၢဝ်ႇဝႃႈ ၸူဝ်ႈၶိုင်ႈပီၵူၺ်း ႁၢၼ်ႉဢၼ်ပိၵ်ႉၵႂႃႇၼႆႉမီး 1,300 ႁၢၼ်ႉယဝ်ႉ ၸိုင်ႈထႆး ပွတ်းတႂ်ႈပိၵ်ႉၵႂႃႇ 700 ႁၢၼ်ႉ ပွတ်းၼိူဝ် 300 လႄႈတၢင်ႇတီႈၸိူဝ်းၼႆႉ။ မိူဝ်ႈလဵဝ်ၼႂ်းၸိုင်ႈတႆး မီးသႅင်ႇ/ႁၢၼ်ႉ မီးယူႇ 20,000 – 30,000 ႁၢၼ်ႉ။