ၵေႃႁူမ်ႈသၢင်ႈၵူၼ်းၼုမ်ႇတႆး Tai Youth Network ဢွၼ်ႁူဝ်ၼမ်းၼႃႈ ၽုၵ်ႇတူၼ်ႈမွၵ်ႇၵွၼ် 1500 တူၼ်ႈ ၼႂ်းဢိူင်ႇမိူင်းယေႃ ၸႄႈဝဵင်းလႃႈသဵဝ်ႈ ပဵၼ်မိၵ်ႈမၢႆမိူင်းတႆး ၼင်ႇႁိုဝ် ၵူၼ်းၼုမ်ႇတေမီးလွင်ႈႁူမ်ႈသၢင်ႈ တူင်ႉၼိုင် မိုတ်ႈၵိုဝ်းၵၼ်လႄႈ ႁၵ်ႉသႃထိင်းသိမ်းသၽႃႇဝ သိင်ႇဝႅတ်ႉလွမ်ႉ ဝႃႈၼႆ။


ဝၼ်းတီႈ 16/07/2017 ယၢမ်းၵၢင်ၼႂ် 7 မူင်း ထိုင် 4 မူင်းဝၢႆးဝၼ်း ၵေႃႁူမ်ႈသၢင်ႈၵူၼ်းၼုမ်ႇတႆး TYN ဢွၼ်ႁူဝ် ၵူၼ်းၼုမ်ႇတႆးပႃးတင်းပီႈၼွင်ႉၵူၼ်းမိူင်း ၼႂ်းဢိူင်ႇမိူင်းယေႃ ဢဵၼ်ႁႅင်း ႁိမ်း 300 ၵေႃႉ ဢွၼ်ၵၼ် ၽုၵ်ႇတူၼ်ႈ မွၵ်ႇၵွၼ် တီႈပၢင်ႇလူင်မူၼ်း၊ ဝတ်ႉဝိႁၢရ်မူၺ်ႇတေႃႇ၊ ၼႂ်းဝၢင်းႁူင်းႁဵၼ်းတႆးလႄႈ ဝၢင်းႁူင်းယႃ ၼႂ်းဢိူင်ႇမိူင်းယေႃ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ။ ယိူင်းဢၢၼ်း ၼင်ႇႁိုဝ် ၼမ်ႉလိၼ်ႁိၼ်ၽႃ သၽႃႇဝ မိူင်းတႆး ၶဵဝ်ၸမ်ႉ ၼမ်ႉလိူင်ႇလႄႈ ယိူင်းဢၢၼ်း ႁႂ်ႈၵူၼ်းၼုမ်ႇၵူႈတီႈၵူႈတၢင်း ပေႃးတေႁူမ်ႈသၢင်ႈလႄႈႁူပ်ႉထူပ်းၵၼ် ဝႃႈၼႆ။

ၸၢႆးၼေႃႇသႅင် ၽူႈၶၢၼ်ပၢၵ်ႇ ၵေႃႁူမ်ႈသၢင်ႈၵူၼ်းၼုမ်ႇတႆး TYN လၢတ်ႈဝႃႈ “ ၵဵဝ်ႇလူၺ်ႈဢၼ်ႁဝ်းၶႃႈ ယူႇတီႈၵေႃ ႁူမ်ႈသၢင်ႈၵူၼ်းၼုမ်ႇတႆးသေ ၽုၵ်ႇသွမ်ႈတူၼ်ႈမွၵ်ႇၵွၼ် ပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်း။ ႁဝ်းႁၼ်ဝႃႈ ၵူၼ်း ၼုမ်ႇႁဝ်းၶႃႈ တေမေႃႁၵ်ႉသႃၼမ်ႉလိၼ်ႁိၼ်ၽႃလႄႈ သၽႃႇဝ ၾိင်ႈတိုၼ်းပဵၼ်မိူင်းႁဝ်း။ ပေႃးဢဝ်ႁူဝ်ၵူၼ်း ၼုမ်ႇႁဝ်းဝႃႈၼႆၸိုင် ႁဝ်းၶႃႈတိုၵ်ႉဢေႇဝႆႉယူႇ ဢမ်ႇဝႃႈ ၵူၼ်းၼုမ်ႇ ၵူၼ်းထဝ်ႈ ပီႈၼွင်ႉၵူၼ်းမိူင်းႁဝ်း ႁႂ်ႈမေႃႁၵ်ႉ သႃထိင်းသိမ်း သၽႃႇဝသိင်ႇဝႅတ်ႉလွမ်ႉမိူင်းႁဝ်းလႄႈ ႁႂ်ႈႁဝ်းၶႃႈ လႆႈၸၢမ်ႇပူၺ်ႈလူၺ်ႈ သၽႃႇဝ ဢၼ်ႁဝ်းၶႃႈ ယၢမ်ႈယူႇမႃး မိူဝ်ႈဢွၼ်တၢင်း။ တေႃႈလဵဝ် ယွၼ်ႉဝႃႈ ၽေးသ ၽႃႇ ဝၵေႃႈၼမ် မုင်ႈမွင်းဝႃႈ ပီႈၼွင်ႉ ၵူၼ်းမိူင်း ႁဝ်း တေပွင်ႇၸႂ် ၵႃၶၼ်သၽႃႇဝ ၾိင်ႈတိုၼ်း ပဵၼ်မႃး” ဝႃႈၼႆ။


ၵဵဝ်ႇၵပ်းၵၢၼ်ၽုၵ်ႇသွမ်ႈတူၼ်ႈမွၵ်ႇၵွၼ် 1500 တူၼ်ႈၼႆႉ ယူႇတီႈၵူၼ်းၼုမ်ႇတႆးဢၼ်မႃးၶဝ်ႈႁူမ်ႈသမ်ႉ မိူၼ်ၼင်ႇ ၸႄႈဝဵင်းတႃႈလိူဝ်ႇ၊ ၵျွၵ်ႉမႄး၊ ၼမ်ႉလၼ်ႈ၊ မိူင်းၶိူဝ်း၊ သႅင်ၵႅဝ်ႉ၊ ၼမ်ႉတူႈ၊ ပၢင်လူင်၊ ၵူတ်ႉၶၢႆ၊ လႃႈသဵဝ်ႈ၊ ထုင်ႉမၢဝ်း လႄႈ ပႃးတင်းပီႈၼွင်ႉၵူၼ်းမိူင်းယေႃ ႁူမ်ႈဢဵၼ်ႁူမ်ႈႁႅင်းၵၼ်သေၽုၵ်ႇ။


ၼွၵ်ႈလိူဝ်ၼၼ်ႉ ယၢမ်းၵၢင်ၼႂ် ဢွၼ်ၵၼ်ၽုၵ်ႇတူၼ်ႈမႆႉသေ ထိုင်မႃး ယၢမ်းဝၢႆးဝၼ်းသမ်ႉ ၸတ်းႁဵတ်းပၢင်ႁူပ်ႉထူပ်း ၵူၼ်းၼုမ်ႇၵႂႃႇ။ ၼႂ်းဝၼ်းၼၼ်ႉၵူၺ်းၼင်ႇၵဝ်ႇ ယူႇတီႈၵေႃႁူမ်ႈသၢင်ႈၵူၼ်းၼုမ်ႇတႆးၵေႃႈ လႆႈမွပ်ႈဝႂ်ယွင်ႈယေႃး ၼမ်ႉ ၸႂ် တီႈၸဝ်ႈတႃႇၼၶဝ် ၸိူဝ်းမႃးၵမ်ႉၸွႆႈလူႇတၢၼ်းဝႆႉပၼ် တူၼ်ႈမွၵ်ႇၵွၼ် 1500 တူၼ် ဝႃႈၼႆ။


ၵေႃႁူမ်ႈသၢင်ႈၵူၼ်းၼုမ်ႇတႆး TYN ၼႆႉ မီးယိူင်းဢၢၼ်းဝႃႈ ၼင်ႇႁိုဝ်ၵူၼ်းၼုမ်ႇတႆး ပေႃးတေမေႃႁၵ်ႉသႃ သိင်ႇဝႅတ်ႉ လွမ်ႉလႄႈ ယၢၼ်ၵႆယႃႈမဝ်းၵမ် ႁႂ်ႈၼႄၾၢင်ႁၢင်ႈၽွမ်ႉႁူမ်ႈၵၼ်သေ ၶိုၼ်ႈလွႆသုင် ဢၼ်ၸိုဝ်ႈ သဵင်လင်ၼႂ်းမိူင်းတႆး မႃးၵူႈပီ။