ယူႇတီႈၸုမ်းၶူၼ်ႉၶႂႃႉလွင်ႈတႆး ၸတ်းႁဵတ်း “ ပၢင်ပွႆးၵပ်းသိုပ်ႇတမ်းၶၢႆပပ်ႉၵျႃႇၼႄႇ ၸုမ်းၶူၼ်ႉၶႂႃႉၸၢဝ်းၶိူဝ်းတႆး” ၸတ်းႁဵတ်းတီႈတူၼ်ႈတီး ပွၵ်ႈၵမ်းႁႅၵ်ႈ မီးၽူႈၶဝ်ႈႁူမ်ႈပၼ်ႁႅင်း ႁိမ်း 100 ၵေႃႉ။


ဝၼ်းတီႈ 17/07/2017 ယၢမ်းၵၢင်ၼႂ် 9 မူင်း ယူႇတီႈၸုမ်းၶူၼ်ႉၶႂႃႉလွင်ႈတႆး ဢွၼ်ႁူဝ်ၸတ်းႁဵတ်း ပၢင်ပိုတ်ႇပပ်ႉ ၵပ်းသိုပ်ႇၼႄ ပပ်ႉၶူၼ်ႉၶႂႃႉလွင်ႈတႆး ပဵၼ်ပွၵ်ႈၵမ်းႁႅၵ်ႈ မီးၽူႈယႂ်ႇၵူၼ်းလူင် မႃးၶဝ်ႈႁူမ်ႈပၼ်ႁႅင်း ပိုတ်ႇပၢင်ၵႂႃႇ တင်းၼမ်လၢႆ။ ပၢင်ပိုတ်ႇပပ်ႉ ၵပ်းသိုပ်ႇၶူၼ်ႉၶႂႃႉလွင်ႈတႆးၼႆႉ ၸတ်းႁဵတ်းတီႈ ႁူင်းႁေႃ ၵေႃလိၵ်ႈလၢႆးလႄႈ ၾိင်ႈ ငႄႈတႆး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ၼင်ႇႁိုဝ် ၵူၼ်းတင်းၼမ် ၼွၵ်ႈမိူင်း/ ၼ်ႂ်းမိူင်း ပေႃးတေ လႆႈႁပ်ႉႁူႉလွင်ႈတႆး ပိုၼ်းတႆး မႃးၼမ် ဝႃႈၼႆ။

ၶူးၸၢႆးၶမ်းမိူင်း ၽူႈၸတ်းၵၢၼ် ၼႂ်းၸုမ်းၶူၼ်ႉၶႂႃႉလွင်ႈတႆး လၢတ်ႈဝႃႈ “ ၸုမ်းၶူၼ်ႉၶႂႃႉလွင်ႈတႆး ဢၼ်ႁဝ်းၶႃႈ မႃးတႄႇ တင်ႈတီႈၼႆႈၼႆႉ တႃႇႁဵတ်းၶူၼ်ႉၶႂႃႉလွင်ႈမိူင်းတႆး လွင်ႈတႆးမဵဝ်းလဵဝ်သေဢမ်ႇၵႃး လွင်ႈၸၢဝ်းၶိူဝ်း ဢၼ် မီးယူႇ ၼႂ်းမိူင်းတႆးၼႆႉ တင်းမူတ်း။ ၵွပ်ႈသင်လႄႈႁဵတ်းၼႆ မဵဝ်းၼႆႉ ၽႂ်ပႆႇတွၼ်ႉႁဵတ်း သမ်ႉထႅင်ႈ လွင်ႈတႆးႁဝ်း သေ ဢမ်ႇၵႃး လွင်ႈၸၢဝ်းၶိူဝ်းတၢင်ႇမဵဝ်းၵေႃႈ လွင်ႈယဵၼ်ႇငႄႈၶဝ် လိၵ်ႈလၢႆး ၽႃသႃ သႃသၼႃ။ ၵွပ်ႈပိူဝ်ႈဢမ်ႇသိမ်း ဝႆႉလီ လီလႄႈ ဢၼ်ႁၢႆဝွတ်ႈဝၢႆးၵႂႃႇၵေႃႈ မီးၼမ်ဝႆႉ မိူဝ်းၼႃႈမႃး ၵူဝ်ပဵၼ်ၸိူင်ႉၼၼ်လႄႈ ဢၼ်ႁဝ်းတေၵဵပ်းလႆႈၵႃႈႁိုဝ်၊ ဢၼ်ႁဝ်း တေၶူၼ်ႉၶႂႃႉလႆႈၵႃႈႁိုဝ် လူဝ်ႇႁဵတ်း မၼ်းတူၵ်းလိုၼ်းၼႃႇယဝ်ႉၼႆ လႆႈၸႂ်ၸိူင်ႉၼၼ်လႄႈ ၸင်ႇမႃးတႄႇ တင်ႈ မုၵ်ႉၸုမ်းၶူၼ်ႉၶႂႃႉ” ဝႃႈၼႆ။


ၼ်ႂ်းပၢင်ပိုတ်ႇပပ်ႉ ၵပ်းသိုပ်ႇၶူၼ်ႉၶႂႃႉလွင်ႈတႆး မိူဝ်ႈၼႆႉ ပပ်ႉဢၼ်မႃးပိုတ်ႇၼႄ ဢၼ်ၼိုင်ႈသမ်ႉ ၸိုဝ်ႈႁွင်ႉဝႃႈ The Journal of Tai Studies။ ထႅင်ႈပပ်ႉၼိုင်ႈသမ်ႉ Vessantara – jataka and its recital in Kengtung တင်းသွင် ပပ်ႉၼႆႉ တႅမ်ႈဝႆႉၽႃႇသႃႇ ဢိင်းၵလဵတ်ႈ။ ပပ်ႉသွင်ပပ်ႉၼႆႉ လႆႈၸႂ်ႉၶၢဝ်းယၢမ်း ၶူၼ်ႉၶႂႃႉ တႅမ်ႈဢွၵ်ႇမႃး မိူၼ်ၼင်ႇ The Journal of Tai Studies ၸႂ်ႉၶၢဝ်းယၢမ်း 7-8 လိူၼ်။ လွင်ႈ Vessantara – jataka and its recital in Kengtung လႆႈၸႂ်ႉၶၢဝ်းယၢမ်းမႃး မွၵ်ႈ 3 လိူၼ် ဝႃႈၼႆ။


ၶူးၸၢႆးၶမ်းမိူင်း သိုပ်ႇလၢတ်ႈဝႃႈ ၵၢၼ်ၶူၼ်ႉၶႂႃႉလွင်ႈတႆးၼႆႉ ဢၼ်ထုၵ်ႇႁဵတ်းမီးထႅင်ႈတင်းၼမ် ႁဝ်းလူဝ်ႇလူင်း ပိုၼ်ႉတီႈၶူၼ်ႉၶႂႃႉ လိၵ်ႈတႆးၵဝ်ႇႁဝ်း ဢၼ်ၵဝ်ႇဢၼ်မွၼ်ၸိူဝ်းၼၼ်ႉ ဢၼ်ပိူၼ်ႈၵဵပ်းဝႆႉၵေႃႈမီး ဢမ်ႇၵဵပ်းဝႆႉၵေႃႈမီး လူဝ်ႇၵဵပ်းႁွမ်ၸိူဝ်းၼၼ်ႉ ယဝ်ႉၵေႃႈ ႁဝ်းတေပၢင်းမႃး ၸဝ်ႈၶူးမေႃၶဝ် ဢၼ်မေႃဢၢၼ်ႇ လိၵ်ႈၸိူဝ်းၼႆႉသေ ဢဝ်မႃး ဝႆႉတီႈလုမ်း ပေႃးယဝ်ႉၵေႃႈႁဝ်းတေလိူၵ်ႈတူၺ်း ဢၼ်လႂ် ထုၵ်ႇလီ ပိၼ်ႇၽႃသႃ ဢိင်းၵလဵတ်ႈၼႆၵေႃႈ တေသိုပ်ႇႁဵတ်းထႅင်ႈ ဝႃႈၼႆ။


ၵဵဝ်ႇၵပ်းလွင်ႈပၢင်ပိုတ်ႇပပ်ႉ ၵပ်းသိုပ်ႇၶူၼ်ႉၶႂႃႉလွင်ႈတႆးၼႆႉ မီးၽူႈယႂ်ႇၵူၼ်းလူင် ၽူႈသူင်လဵပ်ႈႁဵၼ်းပိုၼ်း ၽူႈႁၢပ်ႇ ၵၢၼ်လူင်ပွင်ၸိုင်ႈ မႃးၶဝ်ႈႁူမ်ႈ မိူၼ်ၼင် ၸဝ်ႈတူၼ်ၶူးလူင် ၻွၵ်ႊတိူဝ်ႊၶမ်းမၢႆ ထမ်မသႃမိ၊ ႁွင်ႈၵၢၼ်ၾၢႆႇလူင် ပွင်ၸိုင်ႈမိူင်းတႆး၊ ႁူဝ်ပဝ်ႈ သၽႃးမိူင်းတႆး၊ ၸၼ်ႉၸွမ်ဝဵင်းတူၼ်ႈတီး၊ ၸုမ်းတူင်ႉၼိုင်တူင်ႇဝူင်းၵူၼ်း၊ ၸုမ်း ပႃႇတီႈၵၢၼ်မိူင်း၊ ၽူႈတႅမ်ႈပိုၼ်းတႆး/ ၽူႈသူင်လဵပ်ႈႁဵၼ်းပိုၼ်း ၸဵမ်ၸိူဝ်းၼႆႉ မႃးၶဝ်ႈႁူမ်ႈတင်းၼမ် ဝႃႈၼႆ။