ၸုမ်းၵူၼ်းၼုမ်ႇတႆး Tai Youth Organization ဢိၵ်ႇတင်း ပေႃႈမႄႈပီႈၼွင်ႉၵူၼ်းမိူင်း ၸႄႈဝဵင်းလႃႈသဵဝ်ႈ ႁူမ်ႈၵၼ် သၢၼ်ၶတ်း လိုပ်ႈႁေႃႈ ၵူၼ်းလွၵ်ႇၵဝ်းၵူၼ်းဝၢၼ်ႈ ယိုတ်းဢဝ်တီႈလိၼ်ၵူၼ်းဝၢၼ်ႈ။


ဝၼ်းတီႈ 16/07/2017 ယၢမ်းၵၢင်ဝၼ်း 10 မူင်း ထိုင် 1 မူင်းဝၢႆးဝၼ်း ၸုမ်းၵူၼ်းၼုမ်ႇတႆး TYO တင်း ၵူၼ်းဝၢၼ်ႈ ဝၢၼ်ႈၵွင်းယူမ်း၊ မၢၼ်ႈပႅၼ်ႈလႄႈ ဝၢၼ်ႈမိူင်းမေႃး ဢဵၼ်ႁႅင်း 500 ပၢႆ ဢွၼ်ၵၼ်သၢၼ်ၶတ်း လိုပ်ႈႁေႃႈ ပႅတ်ႈဢူး လေးမိၼ်ႉ ဢွၵ်ႇၼွၵ်ႈပိုၼ်ႉတီႈ ၼႂ်းမိူင်းတႆးၵႂႃႇ။ ပၢင်ၼႄၵၢင်ၸႂ်ၼႆႉ ၸတ်းႁဵတ်းတီႈၵွင်း 11 လၵ်း ႁိမ်းဝၢၼ်ႈ ၵွင်းယူမ်း ဢိူင်ႇမၢၼ်ႈပႅၼ်ႈ ထုင်ႉၼမ်ႉပွင်ႈ ၼိူဝ်သဵၼ်ႈတၢင်း လႃႈသဵဝ်ႈ- တၢင်ႉယၢၼ်း ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ဝႃႈၼႆ။

Photo: ၸၢႆးတိုၼ်းလႅင်း ၸုမ်းၵူၼ်းၼုမ်ႇတႆး TYO

ၸၢႆးႁၢၼ်ႇ ႁူဝ်ပဝ်ႈၸုမ်းၵူၼ်းၼုမ်ႇတႆး ပွတ်းႁွင်ႇ TYO လၢတ်ႈဝႃႈ “ လွင်ႈဢၼ်ႁဝ်းၶႃႈ ဢွၵ်ႇၼႄၵၢင်ၸႂ်ၵႂႃႇၼႆႉ ယိူင်း ဢၢၼ်းမီးယူႇ 2 လွင်ႈ။ ၶေႃႈတီႈၼိုင်ႈတႄႉ ဢူးလေးမိၼ်ႉ ဢၼ်ဝႃႈၼၼ်ႉ မၼ်းမႃးၵဝ်းၼႂ်း ဝၢၼ်ႈၼႂ်း သူၼ်သေ လွၵ်ႇဢဝ်တီႈလိၼ်ၶျေႃး ၵူၼ်းဝၢၼ်ႈလူင်းလၢႆးမိုဝ်းပၼ် ။ ၼွၵ်ႈလိူဝ်ၼၼ်ႉ မၼ်းၸၢႆးသမ်ႉ မႃးၵဝ်းသေႃႇသူၼ်း ၵူၼ်း ဝၢၼ်ႈႁဝ်း ဝၢၼ်ႈၵွင်းယူမ်း၊ မၢၼ်ႈပႅၼ်ႈလႄႈ ဝၢၼ်ႈၵုင်းမေႃး ၽိတ်းၵၼ်ထႅင်ႈၶႃႈဢေႃႈ၊ ယူႇတီႈႁဝ်းၶႃႈ ၸုမ်းၵူၼ်း ၼုမ်ႇတႆးလႄႈ ပီႈၼွင်ႉၵူၼ်းမိူင်း တုၵ်းယွၼ်းထိုင် လူင်ပွင်ၸိုင်ႈ ႁႂ်ႈမီးမဵတ်ႉတႃႇဢေးလူသေလႄႈ တီႈလိၼ်ၸိူဝ်းၼႆႉ ႁႂ်ႈပၼ်ၶိုၼ်းၸဝ်ႈၶွင်ၵူၼ်းမိူင်းၶိုၼ်းသေၵမ်း ဝႃႈၼႆ။


ၵွပ်ႈၼၼ် ယူႇတီႈၵူၼ်းၼႂ်းပိုၼ်ႉတီႈလႄႈ ၸုမ်းၵူၼ်းၼုမ်ႇတႆး ဢွၼ်ၵၼ်သၢၼ်ၶတ်း လိုပ်ႈႁေႃႈ ၵူၼ်းတၢင်ႇတီႈသီႇ လႅၼ်သေ တေမႃးယႃႉၵဝ်းၵူၼ်းဝၢၼ်ႈၽိတ်းၽႅၵ်ႇၵၼ်သေဢမ်ႇၵႃး တေဢဝ်ၵူၼ်း တၢင်ႇတီႈသီႇလႅၼ် ၶဝ်ႈမႃးပၵ်း ယူႇသဝ်း ၼႂ်းမိူင်းတႆး ၸိူဝ်းၼႆႉၸိုင် တေမီးလွင်ႈတုမ်ႉတိူဝ်ႉ ၽိတ်းမေႃး ၵၼ်လႄႈ ၸင်ႇဢွၼ်ၵၼ်သၢၼ် ၶတ်းႁၢဝ်ႈ ႁႅင်းၵႂႃႇ ဝႃႈၼႆ။


ဢူးလေးမိၼ်ႉၼႆႉ ယိုတ်းဢဝ်/ၶျေႃးဝွၼ်းဢဝ်တီႈလိၼ် ၵူၼ်းဝၢၼ်ႈမၢၼ်ႈပႅၼ်ႈလႄႈ ဝၢၼ်ႈၵွင်းယူမ်း တင်းမူတ်း မီး 200 ဢေႊၶိူဝ်ႊ မိူဝ်ႈပီ 200202003။ ဢဝ်ၽုၵ်ႇမၢၵ်ႇမၼ်းယႆးသေတႃႉ ဢမ်ႇပၼ်ၶိုၼ်းၵူၼ်းမိူင်း။


ဢူးလေးမိၼ်ႉၼႆႉ ၸႃတိတၢင်းတိူင်းပႃႇၵိူဝ် ၶၢႆႉမႃးယူႇမိူင်းတႆးပႆႇႁိုင်၊ မၼ်းၸၢႆးၵႂႃႇႁွင်ႉဢဝ်ၵူၼ်းတၢင်ႇတီႈသီႇလႅၼ်၊ ဝႃႈပဵၼ်ၵူၼ်းၺႃးၽေးသိုၵ်းၼႆသေ မႃးၸၵ်းထႅၵ်ႇဢဝ်လိၼ်သူၼ်ၵူၼ်းဝၢၼ်ႈ ပၼ်ၵူၼ်းၸိူဝ်းၼၼ်ႉ 40 လင်ႁိူၼ်း ပၢႆ/ တူဝ်မၼ်းၸၢႆးၵေႃႈ ပၵ်းႁိူၼ်းယူႇသဝ်းဝႆႉတီႈၼၼ်ႈ၊ ယွၼ်ႉဢမ်ႇထၢမ်ၵၢင်ၸႂ် ၵူၼ်းဝၢၼ်ႈသေ ၸတ်းသၢင်ႈ ႁင်းၵူၺ်း၊ ႁဵတ်းႁႂ်ႈမီးပၼ်ႁႃလႄႈ ၸင်ႇလႆႈသၢၼ်မိုဝ်းၵၼ် သၢၼ်ၶတ်းလိုပ်ႈႁေႃႈမၼ်းၸၢႆး ဝႃႈၼႆ။