ပၢင်ၵုမ်လူင် Conference လိၵ်ႈလူင် ၵမ်းထူၼ်ႈ 5 တေၸတ်းတီႈပၢင်လူင် ဝၼ်းတီႈ 27 ထိုင်ဝၼ်းတီႈ 31ၼႂ်း လိူၼ်တီႊသႅမ်ႊၿိူဝ်ႊ2017။


မိူဝ်ႈဝၼ်းတီႈ 15-16 /07/2017 ငဝ်ႈငုၼ်းမုၵ်ႉၸုမ်းလူင် သင်ၶၸိုင်ႈတႆး ၸုမ်းၾၢႆႇပၢႆးပၺ်ၺႃ ၸတ်းႁဵတ်းပၢင်ၵုမ် တီႈဝဵင်းပၢင်လူင် ၸိုင်ႈတႆးပွတ်းၸၢၼ်း ႁၢင်ႈႁႅၼ်းတႃႇ ၸတ်းႁဵတ်းပၢင်ၵုမ်လူင် “ၶွၼ်ႊၾရႅၼ်ႉ” လိၵ်ႈလူင်တႆး ပွၵ်ႈၵမ်း 5  သင်ၶၸဝ်ႈ၊ ၸရေးၽူႈၵတ်ႉၶႅၼ်ႇလႄႈ ၵူၼ်းၼုမ်ႇ လုၵ်ႈႁဵၼ်းၸၼ်ႉၸွမ် ၶဝ်ႈႁူမ်ႈမီး300 ပၢႆ။


ၼႂ်းပၢင်ၼႆႉဢုပ်ႇဢူဝ်းၵၼ်လၢႆလွင်ႈ တႃႇမႄးလၵ်းသုတ်ႇၵၢၼ်ႁဵၼ်း သင်ၶၸဝ်ႈ ၼွၵ်ႈလိူဝ်လိၵ်ႈ ပႃႇလိယဝ်ႉ ႁႂ်ႈမီးပႃးလိၵ်ႈဢင်းၵိတ်းလႄႈ လိၵ်ႈပၢႆးၼပ်ႉ ဝၢႆးမႃးႁႂ်ႈၵူၼ်းႁိူၼ်းၶဝ်ႈလဵပ်ႈႁဵၼ်းပႃး ၊ ပၢင်ၵုမ်လူင် ႁၢင်ႈႁႅၼ်းၶွၼ်ႊၾရႅၼ်ႊ လိၵ်ႈလူင်လႆႈၸႂ်ၵၼ်ဝႃႈ တေၸတ်းႁဵတ်းၼႂ်းဝၼ်းတီႈ 27- 31 / 12/2017 ။

တႃႇၸတ်းၶွၼ်ႊၾရႅၼ်ႊလိၵ်ႈလူင်ၼၼ်ႉ လႆႈၶွတ်ႇၽွတ်ႈပႃးၶွမ်ႊမတီႊၵူၼ်းႁိူၼ်း ႁူဝ်ပဝ်ႈလူင် လုင်းၸရေးၺႃႇၼႃႉ၊  ၵႅမ်ႁူဝ်ပဝ်ႈလုင်းၸရေး သၢင်ႇလဵၵ်ႉ ၊ ၶွတ်ႇၽွတ်ႈလႆႈၶွမ်ႊမတီႊသင်ၶၸဝ်ႈ ႁူဝ်ပဝ်ႈလူင် ၸဝ်ႈသြႃ ဝိၸႃႇရၼႃႉ ဝတ်ႉပိတၵၢတ်ႈဝဵင်းပၢင်လူင်။ ၵႅမ်ႁူဝ်ပဝ်ႈ 1 ၸဝ်ႈသြႃႇဢႃႇ လေႃးၵ ဝတ်ႉသုၶိတႃႇရူင် ဝဵင်းၼမ်ႉၸၢင်၊ ၽူႈမၢႆလူင် ၸဝ်ႈၶူးၼၼ်ႇတိယ ၵျွင်းၵွင်းမူးၵူင်ဝဵင်း ပၢင်လူင်ၸိူဝ်းၼႆႉ။


ၸဝ်ႈသုၶမ်း လၢတ်ႈဝႃႈ - “ယိူင်းဢၢၼ်းတႄႉ ႁဵတ်းႁႂ်ႈၵူၼ်းသႅၼ်းႁုၼ်ႈမႂ်ႇ ၶဝ်ႈၸႂ်မႃးၼႂ်းလိၵ်ႈလူင်။ လိၵ်ႈလူင်ၼႆႉ လူၸွမ်းပွႆးလူႇတၢၼ်းဢိတ်းဢွတ်းၵူၺ်း။ ၵူၼ်းထွမ်ႇၵေႃႈပဵၼ်ၵူၼ်းထဝ်ႈၵူၺ်း။ ၼင်ႇႁိုဝ် ၵူၼ်းပၢၼ်မႂ်ႇ တေမေႃထွမ်ႇလိၵ်ႈလူင်၊ ၸရေးၶဝ်ၸိူဝ်းမေႃလူလိၵ်ႈလူင်လႄႈ ၵူၼ်းၼုမ်ႇ ၸိူဝ်းမီးပၢႆးဝူၼ်ႉပေႃးတေၸၢင်ႈၵွင်ႉၵၼ် ၵွပ်ႈၼႆတေဢဝ် လွၵ်းလၢႆးၸၼ်ႉ ၸွမ်လႄႈ ပၢၼ်ၵဝ်ႇ မႃးႁွမ်းၵၼ်သေႁဵတ်းၵႂႃႇ” ဝႃႈၼႆ။


ပၢင်ၵုမ်လူင် Conference လိၵ်ႈလူင်ၼႆႉ လႆႈၸတ်းႁဵတ်းမႃး 4 ပွၵ်ႈယဝ်ႉ။ ၵမ်းတီႈ 1 ဝဵင်းတႃႈၵုင်ႈ ၵမ်းထူၼ်ႈ  2 ဝဵင်းလၢႆးၶႃႈ ၵမ်းထူၼ်ႈ 3  တီႈလႃႈသဵဝ်ႈ လႄႈၵမ်းထူၼ်ႈ 4 ဝဵင်းလိူဝ်ႇ။ ၵမ်းထူၼ်ႈ 5 ဢၼ်တေႁဵတ်းတီႈ ပၢင်လူင်ၼႆႉတႄႉ ဝၼ်းတီႈ 27-28 ၶူၼ်ႉၶႂႃႉလိၵ်ႈလူင်၊ 29 ၶူၼ်ႉၶႂႃႉပိုၼ်း။ ဝၼ်း လိုၼ်းသုတ်းသမ်ႉတေၵႂႃႇလဵပ်ႈႁဵၼ်း ၶူဝ်းၶွင်ၵဝ်ႇ တီႈၵိုၵ်းပိုၼ်းၼႂ်းမိူင်းၼၢႆး။