ၼမ်ႉၶမ်းၸတ်းပၢင်ယုၵ်ႉယွင်ႈ ၸုမ်းပိတ်ႉမၢၵ်ႇၼင်Nam Kham FC ဢၼ်ၵႂႃႇၶႄႉလႆႈသူးတီႈၼိုင်ႈ မႃးၼႂ်းပၢင်ၶႄႉၶႅင်ႇပိတ်ႉမၢၵ်ႇၼင် တီႈမိူင်းၶွၼ် ၼႃႈလိၼ်ၽွင်းငမ်းတူဝ်ၵဝ်ႇတႆးတႂ်ႈၶူင်း ။


ဝၼ်းတီႈ 17/07/2017 ဝဵင်းၼမ်ႉၶမ်း ၸတ်းႁဵတ်းပၢင်ယုၵ်ႉယွင်ႈ ၸုမ်းပိတ်ႉမၢၵ်ႇၼင် ၼမ်ႉၶမ်း FC ဢၼ်ၵႂႃႇပိတ်ႉပႄႉပိူၼ်ႈမူတ်း တီႈမိူင်းၶွၼ်မႃး ပၢင်ယုၵ်ႉယွင်ႈ ၸတ်းႁဵတ်းတီႈ ႁွင်ႈႁပ်ႉၶႅၵ်ႇ(တႆး) ပွၵ်ႉ ၵွင်းၼွင်မူဝ် ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။ မီးၸုမ်းပိတ်ႉမၢၵ်ႇၼင်၊ ၵေႃလိၵ်ႈလၢႆး၊ၽူႈယႂ်ႇ ၵူၼ်း လူင်ၼႂ်းပွၵ်ႉၼႂ်းၾၢႆႇ၊ၽူႈပၼ်ႁႅင်းၸႂ်ၼႂ်းပွၵ်ႉ/ၼႂ်းၾၢႆႇမႃး ၶဝ်ႈႁူမ်ႈ 150ၵေႃႉ။

Photo : Nam Kham FC

ၸၢႆးမိၼ်ႉဢူး ႁူဝ်ၼႃႈၸုမ်းပိတ်ႉမၢၵ်ႇၼင်လၢတ်ႈဝႃႈ- “ယိူင်းဢၢၼ်းဢၼ်ႁဝ်းၶႃႈ ၸတ်းပၢင်ယုၵ်ႉ ယွင်ႈၼႆႉ ပိူဝ်ႈယုၵ်ႉယွင်ႈၼမ်ႉၸႂ်ၽူႈပိတ်ႉမၢၵ်ႇၼင်လႄႈ ႁႂ်ႈပဵၼ်တူဝ်ယၢင်ႇတႃႇၵူၼ်းမိူင်း ႁႂ်ႈသႂ်ႇ ၸႂ်ၼႂ်းၵၢၼ်လဵၼ်ႈဢဵၼ်ႁႅင်း၊ ယိၼ်းၸူမ်းထိုင်ၸဝ်ႈတႃႇၼ ဢၼ်လႆႈၵမ်ႉ ၸွႆႈပၼ်ႁဝ်း ၶႃႈလႄႈ ယိၼ်းၸူမ်းထိုင်ၽူႈၶဝ်ႈၸုမ်းၵူႈၵေႃႉ ဢၼ်လႆႈၽွမ်ႉၵၼ်ၶတ်းၸႂ် ထိုင်တီႈပေႃးလႆႈသူး မႃးပွၵ်ႈ ၵမ်းၼႆႉ” ဝႃႈၼႆ။


ၸုမ်း Nam Kham FC ၼႆႉ ၸုမ်းပိတ်ႉမၢၵ်ႇၼင်ဝဵင်းၼမ်ႉၶမ်း လၢႆၸုမ်းႁူမ်ႈၵၼ်သေ ၵႂႃႇၶႄႉတီႈ ပၢင်ၶႄႉ မိူင်းၶွၼ်ၼႃႈလိၼ်ၽွင်းငမ်းတူဝ်ၵဝ်ႇတႂ်ႈၶူင်း ၸႄႈမိူင်းယုၼ်ၼၢၼ်မိူင်းၶႄႇ ဢၼ်လႆႈႁပ်ႉ သူးရၢင်းဝလ်ႊတီႈ 1 မႃး ၵမ်းၼႆႉလႆႈငိုၼ်းၶႄႇ 20,000ယူၼ်ႊ။


ၸုမ်းပိတ်ႉမၢၵ်ႇၼင် Nam Kham FC ၼႆႉ ၵေႃႇတင်ႈမႃးမိူဝ်ႈ ပီ 2016 ၊ လုၵ်ႈၸုမ်းမီးမွၵ်ႈ50 ၵေႃႉ၊ မီးယိူင်းဢၢၼ်းလူင် ၼင်ႇႁိုဝ်ၵူၼ်းၼုမ်ႇတေမီးလွင်ႈမိုတ်ႈၵိုဝ်း ၸမ်ၸႂ်ၵၼ် မီးလွင်ႈတူင်ႉၼိုင် လဵၼ်ႈ ႁႅင်းႁႂ်ႈပၢႆးယူႇလီၶႅမ်ႉလႄႈ ႁႂ်ႈၵူၼ်းၼုမ်ႇၵႆယၢၼ်ယႃႈမဝ်းၵမ်ၸိူဝ်းၼႆႉ။