ၶွမ်ႊမတီႊယိုၼ်ႈၶူၼ်ႉႁႃၵဵပ်းႁွမ် ၶူဝ်းၶွင်ၵဝ်ႇမိူင်းတႆး ဢၼ်ၶွတ်ႇၽွတ်ႈဝႆႉၸူဝ်ႈၶၢဝ်း တီႈဝဵင်းၵဵင်းတုင်ၼၼ်ႉ  လႆႈတၢင်ႇမၢႆၾၢင် တီႈလူင်ပွင်ၸိုင်ႈ ႁႂ်ႈမူႇၸုမ်းပဵၼ်တၢင်းၵၢၼ်(ၶဝ်ႈ ၶႂၢင်ႇတြႃး) ႁဵတ်းၵၢၼ်လႆႈထၢင်ႇႁၢင်ႈ။


လုင်းၸၢႆးသၢမ်တိပ်ႉသိူဝ် ၵႅမ်ၽူႈၼမ်း ၼႂ်းၶွမ်ႊမတီႊ လၢတ်ႈဝႃႈ “ တေႃႈလဵဝ် တိုၵ်ႉပဵၼ်ၶၵ်ႉတွၼ်ႈ တၢင်ႇမၢႆၾၢင်ဝႆႉ။ ၵူၺ်း ၵႃႈ လိူၼ်ၼႆႉ တေလူင်းမႃးယဝ်ႉ။ လူဝ်ႇႁွင်ႉၵူၼ်းဝၢၼ်ႈၵူၼ်းမိူင်း မႃး ဢုပ်ႇဢူဝ်းၵၼ်သေ တႄႇႁဵတ်းၵၢၼ်ၵႂႃႇ။ မိူဝ်ႈဢွၼ်တၢင်း ႁဝ်းလႆႈၸႂ်ၵၼ်သေ ၶွတ်ႇၽွတ်ႈဝႆႉ ၶွမ်ႊမတီႊ ၾၢႆႇၶူၼ်ႉႁႃၶိုၼ်း ၶူဝ်းၶွင်ၵဝ်ႇမိူင်းတႆး ဝႆႉၸူဝ်ႈၶၢဝ်း။ ၵမ်းၼႆႉ ပေႃးမၢႆၾၢင်လူင်းမႃးယဝ်ႉၸိုင် တေပဵၼ်ၸုမ်းပဵၼ်တၢင်းၵၢၼ် တႃႇၶူၼ်ႉႁႃၵဵပ်းဢဝ် ၶိုၼ်းၶူဝ်းၶွင်ၵဝ်ႇ မိူင်တႆးႁဝ်း” ဝႃႈၼႆ။

ပီႈၼွင်ႉၵူၼ်းမိူင်းၵဵင်းတုင်လႄႈ ၽူႈဢွၼ်ႁူဝ်ၾၢႆႇပႃႇတီႇၵၢၼ်မိူင်း ႁူမ်ႈၵၼ်သေ ၶွတ်ႇၽွတ်ႈၶွမ်ႊမတီႊတႃႇ တေ ၶိုၼ်း ယုၵ်ႉမုၼ်း ၶူၼ်ႉႁႃၶူဝ်းၶွင်ၵဝ်ႇမိူင်းတႆး ပိူင်လူင် တႃႇတေ တုၵ်း ယွၼ်း ၶိုၼ်းတီႈလိၼ်လႄႈ ႁေႃလူင်ၵဵင်းတုင် ႁႂ်ႈလႆႈဢၼုၺၢတ်ႈ တႃႇၵေႃႇသၢင်ႈ ၶိုၼ်းႁႂ်ႈမိူၼ်ႁေႃလူင်ဢၼ်ၵဝ်ႇလႄႈ တေတုၵ်း ယွၼ်းထႅင်ႈလွင်ႈလႆႈလူႉသုမ်း ၵႂႃႇတင်းမူတ်းတင်းသဵင်ႈ ဝႃႈၼႆ။


ၶွမ်ႊမတီႊဢၼ်လႆႈၶွတ်ႇၽွတ်ႈဝႆႉၸူဝ်ႈၶၢဝ်း  မိူဝ်ႈဝၼ်းတီႈ 10/06/2017 တီႈလုမ်းပႃႇတီႇၵွင်ၸႆး ၸႄႈဝဵင်းၵဵင်း တုင်ၼၼ်ႉ  တင်းမူတ်းမီးၵူၼ်း 17 ၵေႃႉ ႁူမ်ႈၵၼ်သေ ၶွတ်ႇၽွတ်ႈၶိုၼ်ႈမႃး၊ ႁူဝ်ပဝ်ႈပဵၼ် လုင်း ၸၢႆးႁွင်ၶမ်း၊ ၵႅမ်ႁူဝ်ပဝ်ႈသြႃႇၸၢႆးသႅင်ၶမ်း၊ ၽူးၼမ်းၼႂ်း လုင်းၸၢႆးဝိၼ်းမိၼ်ႉ၊ ၵႅမ်ၽူႈၼမ်းၼႂ်း လုင်းၸၢႆးသၢမ်တိပ်ႉသိူဝ်။ လိူဝ်ၼၼ်ႉ တေမီးမိူၼ်ၼင်ႇ ၸဝ်ႈသီရိ၊ လုင်းၸၢႆးလူင်၊ ၻွၵ်ႊတိူဝ်ႊၸၢႆးသႅင်တိပ်ႉ၊ လုင်းၸၢႆးယီႈတိပ်ႉဝူင်း၊ လုင်းၸၢႆးလူင်ယီး၊ လုင်းၸၢႆးၼုတ်း၊ လုင်းၸၢႆးသၢမ်တိပ်ႉပုၼ်ႉ၊ ၼၢင်းႁွမ်ၼူၼ်းၶမ်း၊ လုင်းၸၢႆးထေးဢွင်ႇ၊ ၸၢႆးသၢမ်လွတ်ႈ၊ ၸၢႆးၶိတ်ႉဢေး တူဝ် တႅၼ်းတႃႈၵုင်ႈလႄႈ လုင်းၸၢႆးၼုတ်း တူဝ်တႅၼ်းတူၼ်ႈတီး ၸဵမ်ၸိူဝ်းၼႆႉ။


ယိူင်းဢၢၼ်းတႄႉၵေႃႈ တႃႇၵပ်းသိုပ်ႇၵပ်းသၢၼ်တင်းလူင်ပွင်ၸိုင်ႈမိူင်းတႆးသေ ႁဵတ်းၵၢၼ်ၵႂႃႇ တႃႇတေႁူၺ်း သူၼ်း ပီႈၼွင်ႉ ၵူၼ်းမိူင်း ၵဵင်းတုင်သေဢမ်ႇၵႃး ပီႈၼွင်ႉၵဝ်ႈၸႄႈဝဵင်းၼႂ်းမိူင်းတႆးပွတ်းဢွၵ်ႇၶူင်း။ လိူဝ်သေ ၼၼ်ႉၵေႃႈ ပီႈၼွင်ႉၵူၼ်းမိူင်းတႆး ပတ်းပိုၼ်ႉ။ ယဝ်ႉၵေႃႈ တေႁူၺ်းသူၼ်းပႃး ၸိူဝ်ႉႁိူဝ်ႇငိူၼ်ႈၶႆးၸဝ်ႈၾႃႉတႆး ၸိူဝ်းႁွတ်ႈၵႂႃႇ မီးဝႆႉၼွၵ်ႈမိူင်းလႄႈသင်၊ ပီႈၼွင်ႉ ၵူၼ်းမိူင်းတင်းမူတ်းတင်းသဵင်ႈလႄႈသင် တေႁူၺ်းသူၼ်းၵႂႃႇ ဝႃႈၼႆ။


ႁေႃလူင်ၵဵင်းတုင်ၼႆႉ ပဵၼ်ႁေႃလူင်ဢၼ်ၸိုဝ်ႈသဵင်ယႂ်ႇၵိုၵ်းၵပ်းမိူင်းတႆး။ ၸွမ်သိုၵ်းမွင်ႇဢေး ၸီႈသင်ႇႁႂ်ႈ ၽူႈၵွၼ်း တိူင်းသိုၵ်း ဝၼ်းဢွၵ်ႇ ၽူႈၵွၼ်းတပ်ႉမ 77 ၸွမ်ႁၢၼ် ၵႅတ်ႉသဵင်ႇ ယႃႉၵူၼ်ႇပႅတ်ႈ မိူဝ်ႈဝၼ်းတီႈ 9 လိူၼ်ၼူဝ်ႊဝႅမ်ႊ ၿိူဝ်ႊ ပီ 1991 ။ ဝၢႆးလင်ယႃႉၵူၼ်ႇပင်းႁေႃလူင်ၵဵင်းတုင်ယဝ်ႉ ၵေႃႇသၢင်ႈ ႁူင်းႁႅမ်းၵဵင်းတုင် Kengtong Hotel တႅၼ်း သႂ်ႇတီႈႁေႃလူင် ၵဵင်းတုင်ၼၼ်ႉဝႆႉ ႁၢၼ်ႉတေႃႇယၢမ်းလဵဝ်။