ၵူၼ်းၼုမ်ႇတႆးၼႂ်းၸိုင်ႈတႆး 80 ပၢႆ ဢွၼ်ၵၼ်တၢင်ႇလဝ်ႈ ၶဝ်ႈလဵပ်ႈႁဵၼ်းလိၵ်ႈတႆးလိၵ်ႈဢိင်းၵလဵတ်ႈ ႁၢင်ႈ ႁႅၼ်းတူဝ် တႃႇၶဝ်ႈႁဵၼ်း ၸၼ်ႉၸွမ်တူင်ႇဝူင်းတႆး ဢၼ်တေပိုတ်ႇတီႈၵႃလီႉ ၼႂ်းလိူၼ်သႅပ်ႊထႅမ်ႊၿိူဝ်ႊ 2017 ၼႆႉ။


ဝၼ်းတီႈ 10/07/2017 ၵူၼ်းၼုမ်ႇၼႂ်းမိူင်းတႆး ဢွၼ်ၵၼ်မႃးယိုၼ်ႈလဝ်ႈၶဝ်ႈႁဵၼ်း လိၵ်ႈဢိင်းၵလဵတ်ႈလႄႈ လိၵ်ႈတႆးႁၢင်ႈႁႅၼ်းတူဝ် တႃႇၶိုၼ်ႈႁဵၼ်းၸၼ်ႉၸွမ် တူင်ႇဝူင်းတႆးဢၼ်တေ တႄႇပိုတ်ႇသွၼ် ၼႂ်းလိူၼ်သႅပ်ႊ ထႅမ်ႊၿိူဝ်ႊ 2017 ၼႆႉ။ တႃႇတေၶိုၼ်ႈႁဵၼ်း ၸၼ်ႉၸွမ်တူင်ႇဝူင်းတႆးၼႆႉ တေၶတ်းလိူၵ်ႈဢဝ်လုၵ်ႈႁဵၼ်းဢၼ် ၽွမ်ႉတႃႇၶိုၼ်ႈႁဵၼ်း 60 ၵေႃႉ ဝႃႈၼႆ။

ၼၢင်းႁဵဝ်းသႅင် ၽူႈၶဝ်ႈပႃးၶပ်းၶိုင်တႃႇၵေႃႇတင်ႈၸၼ်ႉၸွမ် လၢတ်ႈဝႃႈ - “ ပေႃးဝႃႈလွင်ႈၾိင်ႈယၢမ်ႈ ၊ လွင်ႈ လၢတ်ႈၵႂၢမ်းဢိင်းၵလဵတ်ႈ၊ လွင်ႈလိၵ်ႈတႆး ၵူၼ်းမိူင်းတႆးၵမ်ႈၼမ် ၶဝ်ႈၸႂ်ပႃးၸႂ်ယူႇ ၵူၺ်းၵႃႈၶဝ်သမ်ႉ ဢွၼ် ၵၼ်မႆႈၸႂ် လွင်ႈလႆႈလုၵ်ႈၸဝ်ႉႁႃႉ ၵူဝ်ၸၼ်ႉၸွမ်ႁဝ်းဢမ်ႇၶဝ်ႈပိူင်တြႃးႁႃႉၸိူဝ်းၼႆႉ”  ။


တီႈၸၼ်ႉၸွမ်တူင်ႇဝူင်းၵူၼ်းတႆး (College ) ၼႆႉပီဢွၼ်တၢင်းသုတ်းတေတႄႇသွၼ် 2 ပၢႆး မိူၼ် ၼင်ႇ 1. ပၢႆးသၢႆႈတူင်ႇဝူင်းၵူၼ်း Social Science ၊ 2. ပၢႆးၸတ်းပွင်ၵၢၼ်မၢၵ်ႈမီး Business Admi nistration မိူဝ်းၼႃႈ မႃးတေၽိူမ်ႉၼမ်မႃးလိူဝ်ၼႆႉ။ ၶူးပူင်သွၼ်ပဵၼ်ၵူၼ်းၼႂ်းၸုမ်း ၵေႃတႆး ဢၼ်ၵႂႃႇယဝ်ႉ ၸၼ်ႉၸွမ် ၼွၵ်ႈမိူင်းမႃး မိူၼ်ၼင်ႇ ၼၢင်းၶႅမ်ဝၼ်း၊ ၼၢင်းႁဵဝ်းသႅင်၊ ၸၢႆးထုၼ်းသႃႇ ၊ ၼၢင်းမူၺ်သႅင်၊ ၼၢင်းဝၼ်းလီ ၸိူဝ်းၼႆႉ တင်းမူတ်း မီးမွၵ်ႈ 16 ၵေႃႉ။


လုၵ်ႈႁဵၼ်းဢၼ်တေမႃးၶိုၼ်ႈႁဵၼ်းတီႈဢေႇသုတ်းႁႂ်ႈထိုင်ၸၼ်ႉ 10 ပီတီႈၼိုင်ႈတေႁပ်ႉ60 ၵေႃႉ။  ၼိုင်ႈ ၵေႃႉတေလႆႈၸွႆႈၵႃႈၸႂ်ႉၸၢႆႇၵၢၼ်ႁဵၼ်းၵၢၼ်သွၼ် 10 သႅၼ် ၵျၢတ်ႉ တေႃႇ1 ၼိုင်ႈထိူမ်ႊ (ၼိုင်ႈထိူမ်ႊ5လိူၼ် 1 ပီ2ထိူမ်ႊ) ႁူမ်ႈပႃးၵႃႈၵိၼ်ၵႃႈယူႇၵႃႈဢွၵ်ႇတၢင်းလဵပ်ႈႁဵၼ်းၶူၼ်ႉၶႂႃႉ ၶၢဝ်းႁဵၼ်းတေႃႇယဝ်ႉ တေႁိုင် 3 ပီ ။