ၸၢႆးဢေႃးတ ပီႈၼွင်ႉႁႅင်းၵၢၼ်တႆး ႁဵတ်းၵၢၼ်ၼႂ်းမိူင်းထႆး ဝဵင်းၵဵင်းမႆႇ ႁေႃႈလူတ်ႉၶိူင်ႈၽႃႇသႂ်ႇၵႃး တၢႆထင်တီႈ။


ဝၼ်းတီႈ 07/07/2017 ယၢမ်းၵၢင်ၶိုၼ်း ၸၢႆးဢေႃးတ ဢႃယု 21 ပီ ၵူၼ်းမိူင်းၼၢႆး ၸိုင်ႈတႆးပွတ်းၸၢၼ်း- ႁေႃႈ လူတ်ႉၶိူင်ႈတမ်ၽႃႇသႂ်ႇလူတ်ႉၵႃး တီႈၼႃႈဝတ်ႉဝေႃႇႁိၼ် ၸႄႈဝဵင်းလွႆသၵဵတ်း ၼိူဝ်သဵၼ်ႈတၢင်း ၵဵင်းမႆႇ မႄႈသၢႆ ၸႄႈ တွၼ်ႈၵဵင်းမႆႇ ၸိုင်ႈထႆး။ ယွၼ်ႉပိူဝ်ႈၵႃးလႄႈ လူတ်ႉၶိူင်ႈ ႁေႃႈဝႆးၼင်ႇၵၼ် ၸၢႆးဢေႃးတ လႆႈလူမ်ႉတၢႆထင်တီႈ ၵမ်းလဵဝ်။

ၸၢႆးလိူၼ်ၶမ်း ၽူႈတူင်ႉၼိုင်ၼႂ်းၵၢၼ်တူင်ႉဝူင်းတႆး ၵဵင်းမႆႇလၢတ်ႈဝႃႈ “ ၸၢႆးဢေႃးတၼႆႉ ႁဵတ်း ၵၢၼ်သေပွၵ်ႈႁိူၼ်း ၶိုၼ်းယၢမ်းၵၢင်ၶမ်ႈ။ လဵပ်ႈႁေႃႈဝႆးတင်းသွင်၊ ၵဵဝ်ႇၵပ်းလွင်ႈၼႆႉ လႆႈဢဝ်တၢင်ႇလုမ်းဝႆႉတီႈႁူင်းပလိၵ်ႈ ၸႄႈဝဵင်းလွႆ သၵဵတ်းတႃႇၶိုၼ်ႈလုမ်းတြႃး။ ၵူၺ်းၵႃႈ တင်းသွင်ၾၢႆႇ ဢမ်ႇပႆႇတူၵ်း  လူင်းသင် တေႃႈလဵဝ် ႁဝ်းၶႃႈယွၼ်းႁူမ်ႈမိုဝ်း တင်းၾၢႆႇၸွႆႈထႅမ် ပီႈၼွင်ႉႁႅင်း ၵၢၼ်တႆးႁဝ်း ၽႂ်မီး ၽႂ်ႁူႉလွင်ႈ ၵူတ်ႇမၢႆ  ႁႂ်ႈမႃးၸွႆႈၵၼ်” ဝႃႈၼႆ။


သိုပ်ႇလၢတ်ႈထႅင်ႈဝႃႈ တေႃႈလဵဝ် ၾၢႆႇတင်းၸဝ်ႈလူတ်ႉၼၼ်ႉ ၶႂ်ႈပၼ်ၵႃႈသၢႆႈတႅၼ်းငိုၼ်းၼိုင်ႈမိုၼ်ႈၵူၺ်း ယွၼ်ႉ ၼၼ် တႃႇတေႁၢင်ႈႁႅၼ်းပူၼ်ႉၶၢပ်ႈတူဝ် ၼႂ်းပၢင်ၸႃပၼႃၵေႃႈဢမ်ႇပေႃး ၵွပ်ႈၼၼ်လႄႈ သင်ပီႈၼွင်ႉတႆး ၽႂ်သေ ဢမ်ႇဝႃႈ ၸုမ်းလႂ်သေဢမ်ႇဝႃႈ ဢၼ်ႁူႉလွင်ႈၵူတ်ႇမၢႆ ၵဵဝ်ႇၶွင်ႉလွင်ႈမၢႆမီႈလူတ်ႉလႄႈသင်၊ ၽေးၵိုင်ႉၵၢင်ႉ ၸိူင်ႉၼႆႉ လႄႈသင် ႁႂ်ႈႁဝ်းႁူမ်ႈမိုဝ်းၵၼ် ၸွႆႈထႅမ်ပၼ်ပီႈၼွင်ႉတႆးႁဝ်းၵႂႃႇ ဝႃႈၼႆ။


တေႃႈလဵဝ် တူဝ်တၢႆ ၸၢႆးဢေႃးတၼႆႉ ဝႆႉတီႈဝတ်ႉသၼ်မူင်ႈတႂ်ႈ/ ဝတ်ႉဢမ်းၽဝၼ်း ဢိူင်ႇသၼ်ပူးလူၺ်း ၸႄႈ ဝဵင်းလွႆသၵဵတ်း ၸႄႈတွၼ်ႈၵဵင်းမႆႇ ၸိုင်ႈထႆး။ တေပူၼ်ႉၶၢပ်ႈတူဝ် ႁွပ်ႇႁူဝ်ၶဝ်ႈႁဵဝ်ႈၼႂ်းဝၼ်းၽတ်း တီႈ 13/ 07/2017 ၼႆႉ။


ၸၢႆးဢေႃးတ ဢႃယု 21 ပီ ပဵၼ်လုၵ်ႈၸၢႆး လုင်းဢိင်ႇတႃႇ ပႃႈဢိင်ႇ ပဵၼ်ၵူၼ်းၸႃတိ ဝၢၼ်ႈႁူဝ်ၾၢႆ ၸႄႈဝဵင်းမိူင်းၼၢႆး ၶဝ်ႈမႃးႁဵတ်းၵၢၼ်မိူင်းထႆး 5 ပီ ပၢႆ။