ၵူၼ်းပၢႆႈၽေးသိုၵ်း ၸိူဝ်းလုၵ်ႉတၢင်းထုင်ႉၾၢႆႇဢွၵ်ႇဝဵင်းၼမ်ႉတူႈ ၼႂ်းဢိူင်ႇလွႆပႄး မႃးယူႇ သဝ်းဝႆႉတီႈဝတ်ႉပူၵ်ႉ ပႃႇယူင်ႇ  ႁူဝ်ၵူၼ်း 400 ပၢႆ ပႆႇပဵၼ်ပွၵ်ႈၶိုၼ်းႁိူၼ်း။ ယွၼ်ႉပိူဝ်ႈတပ်ႉသိုၵ်းတဢၢင်း TNLA တင်း RCSS တိုၵ်ႉသိုပ်ႇ ပဵၼ်ပၢင်တိုၵ်းၵၼ်ယူႇ ယင်းပႆႇယဵၼ်။


ၶၢဝ်းတၢင်း 7 ဝၼ်း ၵူၼ်းပၢႆႈၽေးသိုၵ်း ၸိူဝ်းလုၵ်ႉတၢင်းဢိူင်ႇလွႆပႄး ဢွၼ်ၵၼ် ပၢႆႈၽေးထိုင်ၼမ်ႉတူႈယဝ်ႉသေတႃႉ  ယွၼ်ႉတပ်ႉသိုၵ်းတဢၢင်းတင်း TNLA တပ်ႉသိုၵ်းၸိုင်ႈတႆး RCSS/SSA သိုပ်ႇပဵၼ် ပၢင်တိုၵ်းၵၼ်ထႅင်ႈလႄႈ ၶဵင်ႈၶႅင် ၵၢၼ်သိုၵ်းတေႃႇၵၼ်။ ထႅင်ႈလွင်ႈၼိုင်ႈၵေႃႈ တင်းသွင် ၾၢႆႇတိုၵ်ႉၽိူမ်ႉထႅမ်ႁႅင်း သိုၵ်းထႅင်ႈ။ တေႃႈလဵဝ် ၵူၼ်းပၢႆႈ ၽေးသိုၵ်း လင်ႁိူၼ်း 112 လင်၊ ႁူဝ်ၵူၼ်း 400 ပၢႆ ၽူႈၸၢႆး 175 ၵေႃႉ၊ ၽူႈယိင်း 225 ၵေႃႉ ဢွၼ်ၵၼ်ပၢႆႈမႃးယူႇသဝ်းဝႆႉတီႈ ဝတ်ႉပူၵ်ႉပႃႇယူင်ႇ ပွၵ်ႉ 8 ၸႄႈဝဵင်း ၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇဝႆႉ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၾၢႆႇလူလွမ်ႉၸွႆႈထႅမ်ၵူၼ်းပၢႆႈၽေး ဝဵင်းၼမ်ႉတူႈလၢတ်ႈဝႃႈ “ တေႃႈလဵဝ်ၼႆႉ သိုၵ်းတင်းသွင်ၾၢႆႇ ယင်းတိုၵ်ႉလေႃႇၵၼ်ယူႇ ပႆႇယဵၼ်။ ပီႈၼွင်ႉၵူၼ်းပၢႆႈၽေးတႄႉ တိုၵ်ႉမီး ယူႇမိူၼ်ၵဝ်ႇၵူၺ်း ပႆႇပဵၼ်ပွၵ်ႈမိူဝ်း တိုၵ်ႉယူႇဝႆႉတီႈဝတ်ႉပူၵ်ႉပႃႇယူင်ႇယူႇ။ ယၢမ်းလဵဝ်သမ်ႉပဵၼ်ၶၢဝ်း ၼႂ်းဝႃႇယဝ်ႉ ၼႆလႄႈ လွင်ႈယူႇသဝ်းၵိၼ်သၢင်ႈၵူၼ်းပၢႆႈၽေးတႄႉ လႆႈဢုပ်ႇဢူဝ်းၸွမ်းၸဝ်ႈတူၼ်ၶူး ၽူႈၵွၼ်းဝတ်ႉသေ ပၼ်ၵၼ်ယူႇ။ ပေႃးထိုင်မႃးဝၼ်းသိလ်ၼႆၵေႃႈ ပူႇသိလ်ၼၢႆးသိလ်ၶဝ်သမ်ႉ ၼွၼ်းၼိူဝ်ဝိႁၢရ် ၵူၼ်းပၢႆႈၽေးၼွၼ်း တႂ်ႈလၢင်ႈဝိႁၢရ်လႄႈသႃလႃးၸလွပ်ႈၽွင်ႈ ၸဵမ်ၸိူဝ်းၼႆႉ” ဝႃႈၼႆ။


ၵဵဝ်ႇၵပ်းလွင်ႈတီႈယူႇၵူၼ်းပၢႆႈၽေးၼႆႉ ယူႇတီႈၶွမ်ႊမတီႊၸွႆႈထႅမ်ၵူၼ်းပၢႆႈၽေးၵေႃႈ ပႆႇႁဵတ်းတီႈ ယူႇတၼ်းသဝ်း ဝႆႉပၼ် ယွၼ်ႉဝႃႈ တိုၵ်ႉဢွၼ်ၵၼ်ပႂ်ႉတူၺ်းထွမ်ႇၶၢဝ်ႇယူႇဝႃႈ ပၢင်တိုၵ်းၼႆႉ တေပဵၼ်ၶၢဝ်းပွတ်း 4-5 ဝၼ်းၵူၺ်းၼႆ သေတႃႉ ထိုင်ယၢမ်းလဵဝ် ယင်းတိုၵ်ႉသိုပ်ႇပဵၼ်ၶိူဝ်းယႂ်းယူႇ။


လုင်းၸၢႆးပႃႉၺၢၼ်ႇ လၢတ်ႈဝႃႈ ႁဝ်းၶႃႈ တိုၵ်ႉထွမ်ႇၶၢဝ်ႇယူႇဝႃႈ ပၢင်တိုၵ်းတေယဵၼ်မိူဝ်ႈလႂ် ၵူၺ်းၵႃႈ ပၢင်တိုၵ်း ယဵၼ်ၵႂႃႇယဝ်ႉသေတႃႉ ႁဝ်းၶႃႈ ဢမ်ႇပႆႇပဵၼ်သူင်ႇၵူၼ်းပၢႆႈၽေးပွၵ်ႈၵမ်းလဵဝ် တေဢုပ်ႇဢူဝ်းထၢမ်တင်းသွင်ၾၢႆႇၵွၼ်ႇ ၸွင်ႇတေသူင်ႇၵူၼ်းပွၵ်ႈလႆႈ ဢမ်ႇပွၵ်ႈလႆႈ ယွၼ်ႉဝႃႈ ၼႃႈတီႈပဵၼ်ပၢင်သိုၵ်းၼၼ်ႉ ၵူဝ်ၵူၼ်းမိူင်း ၵႂႃႇယဵပ်ႇၺႃးမၢၵ်ႇ တႅၵ်ႇ။ ယွၼ်ႉၼၼ်လႄႈ သင်ဝႃႈ တပ်ႉသိုၵ်းတင်းသွင်ၾၢႆႇဝႃႈ ပွၵ်ႈမႃးလႆႈ/ မီးလွင်ႈလွတ်ႈၽေးယဝ်ႉၼႆၸိုင် ႁဝ်းၶႃႈ ၸင်ႇတေသူင်ႇပွၵ်ႈမိူဝ်းၶႃႈ ဝႃႈၼႆ။


ယွၼ်ႉတပ်ႉသိုၵ်းတဢၢင်းတင်း တပ်ႉသိုၵ်းၸိုင်ႈတႆး ပဵၼ်ပၢင်တိုၵ်းၵၼ် ႁိမ်းႁွမ်း ၼႂ်းဢိူင်ႇလွႆပႄး ၾၢႆႇဢွၵ်ႇ ဝဵင်း ၼမ်ႉတူႈ ယၢၼ်ၵႆဝဵင်း မွၵ်ႈ 10 လၵ်း။ မိူဝ်ႈပူၼ်ႉမႃး ဝၼ်းတီႈ 04/07/2017 ၼၼ်ႉ ၵူၼ်းပၢႆႈၽေးဢွၵ်ႇမႃး 290 ၵေႃႉ၊ ဝၼ်းတီႈ 05 သမ်ႉ ၽိူမ်ႉလိူဝ်မႃးထႅင်ႈ 110 ၵေႃႉ ႁူမ်ႈၵၼ်တင်းမူတ်း 400 ၵေႃႉလႄႈ လင်ႁိူၼ်း 112 လင် ဝႃႈၼႆ။