ၵူၼ်းဝၢၼ်ႈၵူၼ်းမိူင်း၊ ပႃႇတီႇၵၢၼ်မိူင်း၊ ၾၢႆႇလူင်ပွင်ၸိုင်ႈ ဝဵင်းၼမ်ႉလၼ်ႈ ႁူပ်ႉဢုပ်ႇၵၼ်တႃႇတေ ၵေႃႇသၢင်ႈၵၢတ်ႇမႂ်ႇၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။


ဝၼ်းတီႈ 13/07/2017 ၸၢႆးၶမ်းဢွင်ႇ ၽူႈတႅၼ်းၸႄႈမိူင်းမၢႆ2 သီႇပေႃႉ၊ ဢူးသၢၼ်းမိၼ်းထုတ်ႉ ၵႅမ်ၽူႈၵွၼ်းၸႄႈဝဵင်းသီႇပေႃႉ၊ၽူႈၵွၼ်းပွၵ်ႉဢိူင်ႇဝၢၼ်ႈ ၸုမ်းတူင်ႉၼိုင်တူင်ႇဝူင်းၵူၼ်းလႄႈၵူၼ်း ဝၢၼ်ႈၶဝ်ႈႁူမ်ႈမွၵ်ႈ 80 ၵေႃႉ ၸတ်းႁဵတ်းပၢင်ၵုမ် တီႈလုမ်းၾၢႆႇလိူမ်ႈလႆႇ ဝဵင်းသီႇပေႃႉ ၸႄႈတွၼ်ႈ ၵျွၵ်ႉမႄး ၸိုင်ႈတႆးပွတ်းႁွင်ႇ ။

Photo : Northern Plateau

ဢုပ်ႇဢူဝ်းၵၼ်လၢႆလွင်ႈမိူၼ်ၼင်ႇ တႃႇႁဵတ်းၵၢတ်ႇမႂ်ႇ၊ တိုၵ်ႉတႅမ်ႈပိူင်ၾၢင်ယုၵ်းယၢင်ႇၵၢတ်ႇတႃႇ တႅမ်ႈလိၵ်ႈတၢင်ႇထိုင်လူင်ပွင်ၸိုင်ႈ၊ လွင်ႈတႃႇတေၸၢင်ႈၶွမ်ႊပၼီႊ ႁပ်ႉၵေႃႇသၢင်ႈၼပ်ႉသွၼ်ႇၵႃႈၸႂ်ႉ ၸၢႆႇတေသဵင်ႈတေတူၵ်းမွၵ်ႈၵႃႈႁိုဝ်။ ငိုၼ်းဢၼ်တမ်းဝႆႉတႄႉ မီးသႅၼ် 8,000 – 10,000 သႅၼ် ၵျၢတ်ႉ။


ၸၢႆးသၢမ်လႅင်း ႁူဝ်ပဝ်ႈႁူဝ်သိူဝ်ၼမ်ႉလၼ်ႈလၢတ်ႈဝႃႈ - “တႃႇတေႁဵတ်းၵၢတ်ႇၼႆႉႁဝ်းၶႃႈဢုပ်ႇၵၼ်မႃး ပွၵ်ႈၼႆႉပဵၼ်ပွၵ်ႈတီႈ 18 ယဝ်ႉ ပွၵ်ႈၼႆႉတႄႉတေလႆႈဝႃႈ မီးလၢႆၾၢႆႇၶဝ်ႈႁူမ်ႈဢုပ်ႇဢူဝ်းၵၼ်လႆႈဝႃႈ ၶိုပ်ႈၼႃႈ ။ တႃႇတေၵေႃႇသၢင်ႈၼၼ်ႉ ယွၼ်ႉမၼ်းမီးလၢႆၶၵ်ႉတွၼ်ႈလႄႈ တေလႆႈၸႂ်ႉၶၢဝ်းတၢင်းႁိုင် တေယဝ်ႉတူဝ်ႈၵေႃႈ မွၵ်ႈႁၢင်ပီ 2017 ပူၼ်ႉယဝ်ႉ။ ၵွပ်ႈၼၼ်ယွၼ်းႁႂ်ႈၵူၼ်းမိူင်းပွင်ႇၸႂ်ပၼ်သေၵမ်း ဢၼ်ဝႃႈၵူဝ်မီးလွင်ႈ ၵိၼ်ၸိၵ်းတွၵ်ႇၸွၵ်းၼၼ်ႉၵေႃႈ ဢမ်ႇလူဝ်ႇမႆႈၸႂ် ”ဝႃႈၼႆ။


ပိုၼ်ႉတီႈဢၼ်တေၵေႃႇတင်ႈၵၢတ်ႇၼႆႉ  ပဵၼ်တီႈၵၢတ်ႇဢၼ်ၵဝ်ႇ ဢၼ်ၺႃးၾႆးမႆႈမိူဝ်ႈ ဝၼ်းတီႈ 06/11/2016။  ၵၢတ်ႇလူင်ၼမ်ႉလၼ်ႈၼႆႉ ႁွင်ႉဝႃႈပွၵ်ႉၵၢတ်ႇ၊ မီးႁိမ်းၼမ်ႉလိၼ်းၶၢင်။ ၾၢႆႇတူၵ်း ၵၢတ်ႇ မီးဝၢၼ်ႈလူင်၊ ၾၢႆႇဢွၵ်ႇၵၢတ်ႇ မီးၼမ်ႉလိၼ်းၶၢင်၊ ၾၢႆႇႁွင်ႇမီးပွၵ်ႉႁွင်ႇ၊ ၾၢႆႇၸၢၼ်း မီးပွၵ်ႉ ၸၢၼ်း- ၼႆယဝ်ႉ။