ၼႂ်းၸိုင်ႈတႆးပွတ်းၸၢၼ်း ၸႄႈဝဵင်းမိူင်းၼၢႆး ၵျွင်းဢုတ်ႇ ၽူႈၼင်ႈၵျွင်း ၸဝ်ႈတူၼ်ၶူးၸဝ်ႈၼိုင်ႈ မႆႈၸႂ်ၸွမ်းလုၵ်ႈၼွင်ႉပွင်ပၢႆသေၵႂႃႇပႂ်ႉႁပ်ႉႁူဝ်ဝၢၼ်ႈ ၺႃးၵူၼ်းႁၢႆႉႁႅမ်တၢႆသေ ဢဝ်ရူတ်ႉၶိူင်ႈမၼ်း ၸဝ်ႈၵႂႃႇ မိူဝ်ႈဝၼ်းတီႈ 12/07/2017 ၶၢဝ်းယၢမ်းၵၢင်ၶမ်ႈ 5 မူင်း။


မၼ်းၸဝ်ႈၶီႇရူတ်ႉၶိူင်ႈသႅၼ်း New Kenpo ၵႂႃႇပႂ်ႉႁပ်ႉၸဝ်ႈသၢင်ႇ ဢၼ်ယူႇတီႈဝတ်ႉသေၵႂႃႇထႅင်ႈ ဝၢၼ်ႈၼိုင်ႈ တၢင်းတူၵ်းဝဵင်းမိူင်းၼၢႆး မၼ်းၸဝ်ႈၵႂႃႇပႂ်ႉတၢင်းၼွၵ်ႈဝၢၼ်ႈ ယၢမ်းႁူဝ်ၶမ်ႈ5 မူင်း ၵူၼ်း ႁၢႆႉႁႅမ်တၢႆတီႈၼၼ်ႈသေ ဢဝ်ရူတ်ႉၶိူင်ႈမၼ်းၸဝ်ႈၵႂႃႇ။

ၽိူဝ်ႇၸဝ်ႈသၢင်ႇပွၵ်ႈမႃး မႃးႁၼ်တူဝ်တၢႆၸဝ်ႈသြႃႇမၼ်းၸဝ်ႈသေ ၵႂႃႇႁွင်ႉဢဝ်ၵူၼ်းဝၢၼ်ႈ လွႆဝႄႈ မႃးဢဝ်ၶၢပ်ႈတူဝ်မၼ်းၸဝ်ႈၵႂႃႇတီႈၵျွင်း။


ၸၢႆးထုၼ်းလႃႉ ႁူဝ်ပဝ်ႈၸုမ်းၶႅၵ်ႇလီပၢင်ၸႃႉၼမ်ႉၶူင်း လၢတ်ႈဝႃႈ  - “ၸဝ်ႈသၢင်ႇၶဝ်ၵႂႃႇႁႃ သိုဝ်ႉရူတ်ႉ ၶိူင်ႈတၢင်းဝၢၼ်ႈၽူးလႅင်  ၾၢႆႇတူၵ်းဝဵင်းမိူင်းၼၢႆး ၸမ်တေလပ်းသိင်ႇယဝ်ႉၶဝ်သမ်ႉဢမ်ႇပွၵ်ႈလႄႈ ၸဝ်ႈတူၼ်ၶူးၵေႃႈမႆႈၸႂ်ၵႂႃႇပႂ်ႉႁပ်ႉ သေၸင်ႇၺႃးၶႃႈတၢႆ ၾၢႆႇပလိၵ်ႈၶဝ်ထတ်းတူၺ်းတႄႉဝႃႈ ၺႃးဢဝ်လဵၵ်းလႅမ်တမ်ၾၢႆႇသၢႆႉပွင်ႇထိုင်မၢၵ်ႇႁူဝ်ၸႂ်၊တပ်းသေသဵင်ႈၵႂႃႇ ” ဝႃႈၼႆ။


ၼႂ်းၸႄႈဝဵင်းမိူင်းၼၢႆးၼႆႉ ၵူၼ်းသူႇသမ်းၵိၼ်ယႃႈၼမ် ၵွပ်ႈၼၼ်လႄႈပဵၼ်ၵူၼ်းသူႇသမ်းၵိၼ်ယႃႈ ၶဝ်ႁႅမ်တၢႆႁိုဝ် ပႆႇၸၢင်ႈဝႃႈ ၾၢႆႇပလိၵ်ႈတေၵူတ်ႇထတ်း ႁႃတီႉတူဝ်ၵူၼ်း ႁၢႆႉၼႆႉၵႂႃႇဝႃႈၼႆ။


ၵေႃႉပဵၼ်မႄႈမၼ်းၸဝ်ႈလၢတ်ႈဝႃႈ -  “ ႁဝ်းၶႃႈမီးဝူတ်ႈဝၼ်းလင်သင် တီႈၵၼ်မၼ်းၵိုင်ႇထိူၵ်ႈလႆႈ မႃးတွပ်ႇတႅၼ်းၵၼ်ၵေႃႈႁႂ်ႈမၼ်းယဝ်ႉၵႂႃႇတီႈၼႆႈသေ ၸဝ်ႈတူၼ်ၶူးၼႆႉၶႂ်ႈႁဵတ်းၸဝ်ႈသၢင်ႇၸဵမ်လဵၵ်ႉ ၼုင်ႈသၢင်ႇၵၢၼ်းမႃးၸဵမ်မိူဝ်ႈဢႃယု10 ၶူပ်ႇတေႃႇထိုင်ယၢမ်းလဵဝ် မၼ်းၸဝ်ႈၼႆႉဝႃႈငၢႆႈလၵ်းလႅမ် လၢတ်ႈတီႈပေႃႈမႄႈမၼ်းၸဝ်ႈဝႃႈယႃႇပေႁႂ်ႈမၼ်းၸဝ်ႈလႆႈထၢၵ်ႈ လူင်းၵျွင်းႁႂ်ႈလႆႈယူႇ ၼႂ်းသၢင်ႇ ၵၢၼ်းသေႁဵတ်းပဵၼ်ရႁၢၼ်းၵႂႃႇ မႄႈမၼ်းၸဝ်ႈၵေႃႈၸွမ်းၸႂ်သေ ထိုင်တီႈပေႃးလႆႈ ပဵၼ်ၸဝ်ႈ ၵွၼ်းၵျွင်း” ဝႃႈၼႆ။


ၸဝ်ႈတူၼ်ၶူးၵေႇလႃႇသ ဢၼ်ၺႃးၶႃႈတၢႆၼႆႉ ဢႃယု30 ပီဝႃႇသႃ 10 ပီ မၼ်းၸဝ်ႈၼႆႉၼပ်ႉထိုဝ် ၶေႃႈသင်ႇသွၼ်ပုတ်ထၸဝ်ႈ မေႃပွၼ်ႈမေႃသွၼ်လုၵ်ႈၼွင်ႉပွင်ႈပၢႆ သူင်ႇၵႂႃႇႁဵၼ်းမိူင်းမၢၼ်ႈ မီးယူႇ လၢႆပႃး။


ထႅင်ႈလွင်ႈၼိုင်ႈ မိူဝ်ႈဝၼ်းတီႈ 12/07/2017 မီးၼၢင်းယိင်းပႅၵ်ႇၼႃႈၵေႃႉၼိုင်ႈၶဝ်ႈလၵ်ႉ ၶူဝ်းႁိူၼ်းၵူၼ်းမိူင်းၼၢႆး လႆႈၵႂႃႇငိုၼ်း၊ၾူၼ်းလႄႈမႂ်ထႅမ်ငိုၼ်းၾူၼ်းၸိူဝ်းၼႆႉတင်းၼမ်ဝႃႈၼႆ။