ၸၢႆးသီႇႁၵျေႃႇ ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ တွင်ႈထၢမ်ၼႂ်းပၢင်ၵုမ်လူင်သၽႃး တီႈၼေပျီႇတေႃႇ လွင်ႈသဵၼ်ႈတၢင်းလႃႈသဵဝ်ႈ-မိူင်းယႆ ၶၢဝ်းၵႆ 55 လၵ်း - ဢၼ်လူဝ်ႇႁဵတ်းထႅင်ႈ 28 လၵ်း (မႄႈႁၢၼ်-မိူင်းယႆ) ၼၼ်ႉ မီးၽႅၼ်ၵၢၼ် ၸိူင်ႉႁိုဝ် ဝႃႈၼႆ။

ဝၼ်းတီႈ 12/07/2017 ၼၼ်ႉ ဢူးၵျေႃႇလိၼ်း ၵႅမ်ၽွင်းလူင် ၾၢႆႇၵေႃႇသၢင်ႈ တွပ်ႇလၢတ်ႈ ၵႂၢမ်းထၢမ် ၸၢႆးသီႇႁၵျေႃႇ ဝႃႈ - “ တေသႂ်ႇပၼ် ငိုၼ်းၽၢၼ်ႇတႃႇ ၼႂ်းသၽႃးမိူင်းတႆး ႁဵင်လၢၼ်ႉပၢႆသေ တေသိုပ်ႇႁဵတ်းၵႂႃႇ ၼႂ်းၶၢဝ်းတၢင်း 5 ပီ”  - ဝႃႈၼႆ။


သဵၼ်ႈတၢင်း လႃႈသဵဝ်ႈ - မိူင်းယႆ တင်းမူတ်းယၢဝ်းၵႆ-  55 လၵ်းပၢႆ  ၊ သဵၼ်ႈတၢင်း တွၼ်ႈ လုၵ်ႉမႄႈႁၢၼ်ႇထိုင် မိူင်းယႆ ယၢဝ်းၵႆ 28 လၵ်း ၼၼ်ႉ - တေဢမ်ႇႁဵတ်းႁႂ်ႈယဝ်ႉၵမ်းလဵဝ် ၼိုင်ႈပီတေၸႂ်ႉႁႅင်းငိုၼ်း ႁဵင်သႅၼ်ပၢႆပၢႆသေ တေႁဵတ်းၵႂႃႇပဵၼ်တွၼ်ႈ ၼိုင်ႈတွၼ်ႈမွၵ်ႈ 6 လၵ်းၵူၺ်း - ဝႃႈၼႆ။


ၸၢႆးသီႇႁၵျေႃႇ ႁိုဝ် ၸၢႆးႁၵ်ႉ ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ လၢတ်ႈဝႃႈ “ ပီ 2017-2018 ၼႆႉ ၾၢႆႇလူင်ပွင်ၸိုင်ႈ ဢမ်ႇတမ်းပၼ်မႃးငိုၼ်း၊ ယွၼ်ႉၼၼ် သမ်ႉတေႁဵတ်းႁိုဝ်ႁဵတ်း ဢၼ်ၼႆႉၶေႃႈၼိုင်ႈ။ မၢင်ပွတ်း မၢင်တွၼ်ႈ ႁဵတ်းပၼ်သဵၼ်ႈတၢင်းယဝ်ႉလီငၢမ်း သမ်ႉဢမ်ႇပေႃးမီးလူတ်ႉၵႂႃႇမႃးၼမ်၊ မိူၼ်ပွတ်း တွၼ်ႈႁဝ်းၶႃႈၼႆႉ ၵူၼ်းၵႂႃႇပႆၼမ် လူတ်ႉၵႃးၵေႃႈၼမ်၊ သဵၼ်ႈတၢင်းသမ်ႉဢမ်ႇမႄးႁဵတ်းပၼ်ႁႂ်ႈယဝ်ႉ  28 လၵ်းၵူၺ်း သမ်ႉတေ ၸႂ်ႉ ၶၢဝ်းယၢမ်း 5-6 ပီၵွၼ်ႇ ၸင်ႇယဝ်ႉၼႆႉဢမ်ႇပေႃးမႅၼ်ႈလၢႆးမၼ်း ” - ဝႃႈၼႆ။


သဵၼ်ႈတၢင်း ဢၼ်တေၵေႃႇသၢင်ႈၼႂ်းမိူင်းတႆး ၵမ်ႈပႃႈၼမ် ယူႇတီႇ လူင်ပွင်ၸိုင်ႈမၢၼ်ႈ ၼေႇပျီႇတေႃႇ သေ မွပ်ႈပၼ် လူင်ပွင်ၸိုင်ႈမိူင်းတႆး သူင်ႇဝႆႉပၼ်ငိုၼ်းတႃႇၸႂ်ႉၸၢႆႇဝႆႉယဝ်ႉ လႄႈ ၵၢၼ်မူၼ်ႉမႄး သိူဝ်ႇႁိၼ်သိူဝ်ႇယၢင် သဵၼ်ႈတႃႈ သၢႆ တၢင်း ၼႂ်းမိူင်းတႆး  ၵပ်းၵၢႆ လူင်ပွင်ၸိုင်ႈမိူင်းတႆး။ ၵွပ်ႈၼၼ် ၵၢၼ်ၵေႃႈသၢင်ႈသဵၼ်ႈတၢင်း ၼႂ်းမိူင်းတႆး လူင်ပွင်ၸိုင်ႈမိူင်းတႆး ၵႆႉမွပ်ႈပၼ် ႁွင်ႈၵၢၼ် ၾၢႆႇၵေႃႇသၢင်ႈ ႁပ်ႉပုၼ်ႈၽွၼ်းႁဵတ်း ။