ၾႆးမႆႈၶႅမ်ႉပၢင်သဝ်း ၵူၼ်းပၢႆႈၽေး တီႈၼႃးသွႆ ၸႄႈတွၼ်ႈမႄႈႁွင်ႈသွၼ် ၸိုင်ႈထႆးပွတ်းႁွင်ႇ လင်ႁိူၼ်း 30 ပၢႆ ၺႃးၾႆးမႆႈလႄႈ ႁူဝ်ၵူၼ်း 300 ပၢႆ ၺႃးၽေးၾႆး ဝႃႈၼႆ။


ဝၼ်းတီ 05/07/2017 ယၢမ်းၵၢင်ၶိုၼ်း 10 မူင်းထိုင် 12 မူင်း ၵၢင်ၶိုၼ်း ၶႅမ်ႉပၢင်သဝ်း ၵူၼ်းပၢႆႈၽေး တီႈၼႃးသွႆ ပွၵ်ႉ 5 ၸႄႈတွၼ်ႈမႄႈႁွင်ႈသွၼ် ၾႆးမႆႈ။ လင်ႁိူၼ်း ၵူၼ်းပၢႆႈၽေး 33 လင်၊ ႁူဝ်ၵူၼ်း မွၵ်ႈ 300 လႆႈပၢႆႈၽေးၾႆး။ မီး ၵူၼ်းမႃးၸွႆႈထႅမ်ၶဝ်ႈၼမ်ႉတၢင်းၵိၼ် ၽႃႈယၢင် ၸဵမ်ၸိူဝ်းၼႆႉ သေတႃႉ ယင်းတိုၵ်ႉႁူပ်ႉတၢင်းယၢပ်ႇယူႇ ဝႃႈၼႆ။

လုင်းသျႃးလေႇ ဢႃယု 50  ပဵၼ်ၵူၼ်းယူႇၼႂ်းၶႅမ်ႉပၢင်သဝ်း ၼႃးသွႆ လၢတ်ႈဝႃႈ “ ႁဵတ်းႁိုဝ်လႄႈမႆႈဢၼ်ဝႃႈၼၼ်ႉ ပႆႇလႆႈႁူႉ။ ယွၼ်ႉၾႆးၽြႃးႁႃႉ၊ ၾႆးတဵၼ်းႁႃႉ ယင်းပႆႇႁူႉ။ ထႅင်ႈပိူင်ၼိုင်ႈၵေႃႈ ၵူၼ်းၼႂ်းမူႇဝၢၼ်ႈ ဢွၼ်ၵၼ် ၼွၼ်း လပ်းယဵၼ်မူတ်းယဝ်ႉ ။ လင်ႁိူၼ်းဢၼ်ၾႆးတႄႇမႆႈၼၼ်ႉ သင်ဢမ်ႇၵႂႃႇပူၵ်းၶဝ် ထၢင်ႇတႄႉ ၶႄးတေပႃးၵႂႃႇၸွမ်း ၾႆးလူးၵွၼ်ႇ လင်ႁိူၼ်းတိတ်းၵၼ်လႄႈ ၾႆးမႆႈၵႂႃႇ 33 လင်၊ လိူဝ်ၼၼ်ႉ လင်ၶႃး ႁိူၼ်းၸိူဝ်းၵွၵ်းဢွၵ်ႇႁႄႉၽေး ၾႆးသမ်ႉ 38 လင်။ ႁူင်းႁဵၼ်းလင်ၼိုင်ႈၵူၺ်း” ဝႃႈၼႆ။


ပၢင်သဝ်းၶႅမ်ႉပၢင်ၽေးၼႆႉ ဝၢႆးလင် ပီ 2010 မႃး ထုၵ်ႇၾႆးမႆႈၵႂႃႇ သၢမ်ပွၵ်ႈယဝ်ႉ ဝႃႈၼႆ။


ၼၢင်းမေႃႇမျႃႇ ၵူၼ်းၼႂ်းၶႅမ်ႉပၢင်သဝ်း လၢတ်ႈဝႃႈ  “ၵမ်းၾႆးမႆႈၼႆႉ ၵူၼ်းလူႉတၢႆ ဢမ်ႇမီး တေလႆႈဝႃႈ ပဵၼ်ဢၼ် ၵုသူလ်လီတႄႉၶႃႈ။ ၵူၺ်းၵႃႈ လွင်ႈၾႆးမႆႈၼႆႉသေ ဢၼ်တုမ်ႉတိူဝ်ႉပၢႆးၸႂ် ၵူၼ်းပၢႆႈၽေးတႄႉ မီးယူႇ။ လူတ်ႉၵႃး ၶေၾႆးၵေႃႈ ဢမ်ႇမႃး။ ယွၼ်ႉဝႃႈ ၵႆဝဵင်းမႄႈႁွင်ႈသွၼ်ဝႆႉ” ဝႃႈၼႆ။


မိူဝ်ႈပီ 2013 ၼၼ်ႉ ၾႆးမႆႈပၢင်သဝ်းၶႅမ်ႉၵူၼ်းပၢႆႈၽေး တီႈပွၵ်ႉ 2 ၵူၼ်းမိူင်းလႆႈလူႉတၢႆ 40 ပၢႆလႄႈ လင်ႁိူၼ်း ဢၼ်ထုၵ်ႇၾႆးမႆႈၵႂႃႇတင်းမူတ်း 400 ပၢႆ ၼႆယဝ်ႉ။