ၸုမ်းတူင်ႉၼိုင်တူင်ႇဝူင်းတႆး ပႃႇတီႇၵၢၼ်မိူင်း၊ တပ်ႉသိုၵ်း၊ ၵေႃလိၵ်ႈလၢႆးၸိူဝ်းၼႆႉဢွၼ်ၵၼ် ႁႃတၢင်းၸွႆႈထႅမ် တႆးၸိူဝ်းၵႂႃႇႁဵတ်းၵၢၼ်မိူင်းထႆးသေ ထူပ်းတၢင်းယၢပ်ႇၽိုတ်ႇ ၶၢဝ်းတၢင်းပွၵ်ႈႁိူၼ်း။


ဝၼ်းတီႈ 06/07/2017 ၸုမ်းတူင်ႉၼိုင်တူင်ႇဝူင်းတႆးလၢႆၸုမ်း မိူၼ်ၼင်ႇ ၸုမ်းၵေႃလိၵ်ႈလၢႆး၊ ၸုမ်းတူင်ႇဝူင်း ၵူၼ်း၊ ပႃႇတီႇႁူဝ်သိူဝ် SNLD/ ပႃႇတီႇသိူဝ်ၽိူၵ်ႇ SNDP ၸိူဝ်းၼႆႉဢိၵ်ႇၸုမ်းလူင်ပွင်ၸိုင်ႈမိူင်းႁူမ်ႈတုမ်မၢၼ်ႈ ဢွၼ်ၵၼ်ပႂ်ႉႁပ်ႉတွၼ်ႈပီႈၼွင်ႉႁႅင်းၵၢၼ် ၸိူဝ်းၵႂႃႇႁဵတ်းၵၢၼ်ၼႂ်းမိူင်းထႆး ႁူပ်ႉတၢင်းယၢပ်ႇသေ ပွၵ်ႈၶိုၼ်း ဝၢၼ်ႈ ၵဝ်ႇ။

ၼၢင်းငူၺ်ႇမျႃႉ ႁူဝ်ပဝ်ႈသိူဝ်ၽိူၵ်ႇ ၸိုင်ႈတႆးပွတ်းဢွၵ်ႇ လၢတ်ႈဝႃႈ - “ ဢမ်ႇဝႃႈႁႅင်းၵၢၼ် ၸၢဝ်းၶိူဝ်းသင်ပေႃးမႃး ႁွတ်ႈထိုင် တႃႈၶီႈလဵၵ်းၼႆ လွင်ႈယူႇ၊ လွင်ႈၵိၼ်၊ လွင်ႈၵႂႃႇမႃးၸိူဝ်းၼႆႉ ႁဝ်းၶႃႈတေၸွႆႈထႅမ်ပၼ်။ ၸိူဝ်းဢၼ် ဢမ်ႇမီးဝတ်းဝႂ် (မၢတ်ႈပုင်ႇတိၼ်ႇ) ၼၼ်ႉၵေႃႈ ႁႂ်ႈၵႂႃႇႁႃလုမ်းပႃႇတီႇသိူဝ်ၽိူၵ်ႇႁဝ်းၶႃႈလႆႈၵူႈဝဵင်း ႁဝ်းၶႃႈ တေဢွၼ်ၵႂႃႇႁဵတ်း မၼ်းတေဢမ်ႇလႆႈသဵင်ႈၵႃႈၸႂ်ႉၸၢႆႇၼမ် ”ဝႃႈၼႆ။


ၼင်ႇႁိုဝ်ႁႅင်းၵၢၼ် ပေႃးတေမီးလွင်ႈငၢႆႈလူမ်ၸႂ် ၽွင်းပွၵ်ႈၶိုၼ်းႁိူၼ်းၼႆသေ ၸုမ်းၵူၼ်းၼုမ်ႇတႆးလၢႆးၶႃႈ၊ ၸုမ်း ၵေႃပွင်ၵၢၼ်ၽွမ်ႉႁူမ်ႈပီႈၼွင်ႉတႆး မိူင်းၵွၵ်ႇ ဢွၼ်ၵၼ်တႅမ်ႈလိၵ်ႈထိုင် SNDP/ SNLD/SSPP/ RCSSၸိူဝ်းၼႆႉ ႁႂ်ႈၸွႆႈထႅမ်ပၼ်ႁႅင်းၵၢၼ် ၽွင်းပွၵ်ႈၶိုၼ်းႁိူၼ်း။


ၶုၼ်ၼုမ်ႇႁၵ်ႉတႆး ၸဵတ်းၸွမ်ၸၢႆး ၵႅမ်ႁူဝ်ပဝ်ႈၵေႃပွင်ၵၢၼ်ၽွမ်ႉႁူမ်ႈပီႈၼွင်ႉတႆး မိူင်းၵွၵ်ႇလၢတ်ႈဝႃႈ - “ ၽူႈယႂ်ႇ ၵူၼ်းလူင်ၼႂ်းဝၢၼ်ႈမိူင်း ဢမ်ႇဝႃႈပႃႇတီႇ/ တပ်ႉသိုၵ်းၸိူဝ်းၼႆႉ ၵၢၼ်တူၺ်းထိုင်၊ၸွႆႈထႅမ်ၵူၼ်းမိူင်းၼႆႉ မၼ်း ပဵၼ်ပုၼ်ႈၽွၼ်းၶဝ်ယဝ်ႉ၊ ပေႃးၵူၼ်းမိူင်းထူပ်းတၢင်းယၢပ်ႇ ၊ တၢင်းလိူတ်ႇမႆႈ တီႈလႂ်သေဢမ်ႇဝႃႈ ထုၵ်ႇလီႁိပ်ႈ ႁိပ်ႈၼႅတ်ႈၼႅတ်ႈယိုၼ်ႈမိုဝ်းၸွႆႈထႅမ် ၵႄႈလိတ်ႈပၼ်ႁႃပၼ်ၵမ်းလဵဝ်။  မိူဝ်းၼႃႈမႃးမီးသေၸုမ်းၸုမ်းတႅမ်ႈ လိၵ်ႈတုၵ်းယွၼ်းသေယဝ်ႉ ၸင်ႇဢွၵ်ႇလိၵ်ႈယိုၼ်ႈမိုဝ်းၸွႆႈၼၼ်ႉ ဢမ်ႇထုၵ်ႇလီပဵၼ် ” ဝႃႈၼႆ။


ဝၢႆးသေလူင်ပွင်ၸိုင်ႈထႆးပိုၼ်ၽၢဝ်ႇ ပၵ်းပိူင်မႂ်ႇတွၼ်ႈတႃႇႁႅင်းၵၢၼ် ပီ 2017 ဢွၵ်ႇမႃးဝႃႈ – ၽူႈလႂ်ၽႂ်ႁပ်ႉၵူၼ်း ႁဵတ်းၵၢၼ် ဢမ်ႇမီးဝတ်းဝႂ်၊ ႁဵတ်းၵၢၼ် ၽိတ်းတီႈ၊ ႁဵတ်းၵၢၼ်ၽိတ်းပၵ်းပိူင်ၼႆၸိုင် တေၺႃးမႂ် 400,000 – 800, 000 ၿၢတ်ႇ တေႃႇၵူၼ်းႁဵတ်း ၵၢၼ်ၼိုင်ႈၵေႃႉ။ ၾၢႆႇလူင်ပွင်ၸိုင်ႈယွၼ်ႇယၢၼ်းပၼ် 6 လိူၼ်ႁႂ်ႈလႆႈၶၢဝ်း ယၢမ်းႁၢင်ႈ ႁႅၼ်းတူဝ်သေတႃႉ  ၵူၼ်းႁဵတ်းၵၢၼ်မိူင်းထႆး ယင်းတိုၵ်ႉဢွၼ်ၵၼ် ပွၵ်ႈႁိူၼ်းယူႇၶိူဝ်းယႂ်း ။ တၢင်းမႄႈသွတ်ႇ၊ ရၼွင်း၊ မႄႈသၢႆၸိူဝ်းၼႆႉ လၢႆၸုမ်းၾၢႆႇတၢင်းမိူင်းႁူမ်တုမ်မၢၼ်ႈ ဢွၼ်ၵၼ်မႃးပႂ်ႉႁပ်ႉတွၼ်ႈ ၸွႆႈထႅမ်လွင်ႈ ၶဝ်ႈၼမ်ႉတၢင်းၵိၼ်၊ လွင်ႈသူင်ႇပွၵ်ႈ ႁိူၼ်းၸိူဝ်းၼႆႉ။