လူင်ပွင်ၸိုင်ႈမိူင်းထႆး ပိုၼ်ၽၢဝ်ႇယွၼ်ႇယၢၼ်းယိုတ်ႈၶၢဝ်းယၢမ်းပၼ် ႁႂ်ႈႁႅင်းၵၢၼ် ၶပ်းၶိုင်လွင်ႈဝတ်း ဝႂ်လႄႈ ဢမ်ႇမီးဝတ်းဝႂ်ၼၼ်ႉၵေႃႈႁႂ်ႈပေႃႈလဵင်ႉၼၢႆးၸၢင်ႈၵႂႃႇတၢင်ႇယွၼ်း ႁဵတ်းလႆႈၼႆသေတႃႉ ႁႅင်းၵၢၼ်ယၢၼ်မိူင်းယင်းတိုၵ်ႉဢွၼ်ၵၼ် ပွၵ်ႈႁိူၼ်းယူႇၶိူဝ်းယႂ်း။


ဝၼ်းတီႈ 17/07/2017 ၶွင်ႇသီႇဢဝ်ၶိုၼ်းၸိုင်ႈတႆး RCSS ၵပ်းသၢၼ်တင်းၸုမ်းပႃႇတီႇၵၢၼ်မိူင်း တႆး ၊ ၸဝ်ႈၼႃႈတီႈၾၢႆႇၵူတ်ႇထတ်းၵူၼ်းၶဝ်ႈမိူင်းထႆး၊ မၢၼ်ႈ၊ ၸုမ်းတူင်ႇဝူင်းၵူၼ်း ၸိူဝ်းၼႆႉသေၶပ်း ၶိုင်ပၼ်ႁႅင်းၵၢၼ် ပွၵ်ႈၸူးမိူင်းတႆး။

ၸၢႆးလၢဝ်တွၼ်း ၸဝ်ႈၼႃႈတီႈၾၢႆႇၵပ်းသိုပ်ႇတင်း ၸဝ်ႈၼႃႈတီႈထႆး  လၢတ်ႈဝႃႈ - “ ႁႅင်းၵၢၼ်ၸိူဝ်း ဢမ်ႇမီးဝတ်းဝႂ်ထုၵ်ႇမႅၼ်ႈၸွမ်းမၢႆမီႈၼၼ်ႉၵေႃႈ ႁဵတ်းႁႂ်ႈထုၵ်ႇမႅၼ်ႈသေ ၸိူဝ်းဢမ်ႇမီးဝတ်းဝႂ်ၶႂ်ႈပွၵ်ႈ ႁိူၼ်းၼၼ်ႉၵေႃႈ ႁဝ်းၶႃႈတေၵပ်းသိုပ်ႇ ၸဝ်ႈၼႃႈတီႈလၢႆၾၢႆႇသေ တေဢဝ်မိူဝ်းသူင်ႇပၼ်တီႈ လႅၼ်လိၼ်ယူႇ  မိူဝ်ႈၼႆႉၵူၺ်းပွၵ်ႈထႅင်ႈ 30 ပၢႆ” ဝႃႈၼႆ။


ႁႅင်းၵၢၼ်ၸိူဝ်းဢၼ်ပွၵ်ႈမိူဝ်းၼၼ်ႉဢွၼ်ၵၼ်လၢတ်ႈဝႃႈ - “ ႁဝ်းၶႃႈယူႇမိူင်းထႆးၼႆႉလွင်ႈဝတ်းလွင်ႈဝႂ် မၼ်းသုၵ်ႉသၵ်ႉၼႃႇ ပေႃႇလႃႇသီႇမၼ်းၵေႃႈၵမ်းၵမ်းလႅၵ်ႈလၢႆႈယူႇတိၵ်းတိၵ်း ၵႃႈဝတ်းၵေႃႈသဵင်ႈၼမ် ၊ၵႃႈၸႂ်ႉၸၢႆႇလွင်ႈၵိၼ်၊လွင်ႈယူႇၵေႃႈၵႃႈ ငိုၼ်းလၢႆးဝၼ်းသမ်ႉလႆႈဢေႇ ယွၼ်ႉၼၼ်လႄႈႁဝ်းတေ ဢွၼ်ၵၼ်မိူဝ်းယူႇတီႈမိူင်းႁဝ်းၶိုၼ်းၵူၺ်းယဝ်ႉ” ဝႃႈၼႆ။


ဝၢႆးသေလူင်ပွင်ၸိုင်ႈထႆးပိုၼ်ၽၢဝ်ႇ ပၵ်းပိူင်မႂ်ႇတွၼ်ႈတႃႇႁႅင်းၵၢၼ် ပီ 2017 ဢွၵ်ႇမႃးဝႃႈ – ၽူႈလႂ် ၽႂ်ႁပ်ႉၵူၼ်းႁဵတ်းၵၢၼ် ဢမ်ႇမီးဝတ်းဝႂ်၊ ႁဵတ်းၵၢၼ်ၽိတ်းတီႈ၊ ႁဵတ်းၵၢၼ်ၽိတ်းပၵ်းပိူင်ၼႆၸိုင် တေ ၺႃးမႂ် 400,000 – 800, 000 ၿၢတ်ႇ တေႃႇၵူၼ်းႁဵတ်းၵၢၼ်ၼိုင်ႈၵေႃႉ။ ၾၢႆႇလူင်ပွင်ၸိုင်ႈယွၼ်ႇ ယၢၼ်းပၼ် 6 လိူၼ်ႁႂ်ႈလႆႈၶၢဝ်းယၢမ်းႁၢင်ႈႁႅၼ်းတူဝ်သေတႃႉ ၵူၼ်းႁဵတ်းၵၢၼ်မိူင်းထႆး ယင်းတိုၵ်ႉ ဢွၼ်ၵၼ် ပွၵ်ႈႁိူၼ်းယူႇၶိူဝ်းယႂ်း ။ ၸုမ်းတူင်ႉၼိုင် တူင်ႇဝူင်းတႆး၊ တပ်ႉသိုၵ်းတႆး RCSS/ SSPP/ ပႃႇတီႇၵၢၼ်မိူင်းတႆး SNLD / SNDP ၸိူဝ်းၼႆႉဢွၵ်ႇလိၵ်ႈယိုၼ်ႈမိုဝ်းၸွႆႈထႅမ်ႁႅင်းၵၢၼ်ၽွင်းပွၵ်ႈ ၶိုၼ်းႁိူၼ်း။