လုၵ်ႈဢွၼ်ႇမၢင်ၵေႃႉမီးတၢင်းယၢမ်ႈလီ၊ မၢင်ၵေႃႉသမ်ႉမီးတၢင်းယၢမ်ႈဢမ်ႇလီ။ လုၵ်ႈဢွၼ်ႇမၢင်ၵေႃႉႁဵတ်းႁၢႆႉ ထိုင်တီႈပေႃႈမႄႈပေႃးဢမ်ႇလႆႈလပ်းလႆႈၼွၼ်း။ ႁႂ်ႈပေႃႈမႄႈပေႃးၶႂ်ႈၸႂ်သဵင်ႈၼိူဝ်လုၵ်ႈဢွၼ်ႇ။ ႁဵတ်းပၼ်ႁႃဢၼ်ၼိုင်ႈယဝ်ႉဢၼ်ၼိုင်ႈ။ ၸိူဝ်းၼႆႉၼႆႉ ၸွင်ႇမီးၶေႃႈၵႄႈတွပ်ႇမၼ်းႁိုဝ်။ သင်ၸိူဝ်ႉဝႃႈ ၵေႃႉဢၼ်ပဵၼ်ပေႃႈမႄႈလုၵ်ႈဢွၼ်ႇၶဝ် ၸွပ်ႇသွၵ်ႈႁႃပေႃးၼႆၸိုင် တေလႆႈမီးယူႇ၊ မီးလွၵ်းလၢႆးမီးၶေႃႈတွပ်ႇတႃႇပေႃႈမႄႈၵူႈၵေႃႉယူႇ။


လွင်ႈဝႃႈလုၵ်ႈဢွၼ်ႇတၢင်းယၢမ်ႈလီ ဢမ်ႇလီၼႆၼၼ်ႉ မၼ်းၵူၺ်းပဵၼ်လွင်ႈတုမ်ႉတွပ်ႇ ဢမ်ႇၼၼ် တၢင်းႁဵတ်းသၢင်ႈလုၵ်ႈဢွၼ်ႇၶဝ်ဢၼ်ၼိုင်ႈ ဢၼ်တုမ်ႉတွပ်ႇၶိုၼ်းၼိူဝ်လွင်ႈႁဵတ်းသၢင်ႈ ပေႃႈမႄႈၶဝ်ၼၼ်ႉၵူၺ်း။

လွင်ႈလုၵ်ႈဢွၼ်ႇႁႆႈ။ ၶႂ်ႈၵိၼ်လႄႈႁႆႈ။ ၶႂ်ႈလႆႈလႄႈဢမ်ႇလႆႈလႄႈႁႆႈ။ ႁဵတ်းႁႂ်ႈသဵင်ဢူၼ်ဢူၼ်မေႃးပၼ်း သမ်ႉပေႃးၶၢၼ်ႉငိၼ်း၊ ႁဵတ်းႁႂ်ႈဢိုတ်ႇဢတ်ႇၸႂ်ၸၵႂႃႇၸိူဝ်းၼႆႉ သင်ၸိူဝ်ႉဝႃႈၵေႃႉပဵၼ်ပေႃႈမႄႈသမ်ႉဝူၼ်ႉဝႃႈ ပေႃးမၼ်းတဵတ်ႇ၊ ပေႃးမၼ်းယဵၼ် ဢမ်ႇႁႆႈဢမ်ႇမေႃးၵေႃႈပေႃးယဝ်ႉၼႆသေ တေႃႉတႄႉၶျေႃးဝွၼ်း ဢဝ်ၶဝ်ႈမုၼ်းယဵတ်ႈပၼ်ႁႂ်ႈတဵတ်ႇၵူၺ်းပေႃးၼႆၸိုင် မိူၼ်ၵၼ်တင်းၵႂႃႇထႅင်ႈတၢင်းႁႅင်း သူၼ်းဢီးႁႂ်ႈလုၵ်ႈဢွၼ်ႇမီးတၢင်းယၢမ်ႈဢမ်ႇလီ ႁဵတ်းႁၢႆႉမႃးလိူဝ်ၵဝ်ႇၵူၺ်း။ ၵွပ်ႈသင်ပေႃးၼႆၸိုင် ၵွပ်ႈပိူဝ်ႈဝႃႈၶဝ်လႆႈႁူႉဝႃႈ သင်ၶဝ်ႁႆႈ၊ ႁဵတ်းဢူၼ်ဢၢၼ်ပၼ်းမေႃး ပေႃးၼႆၸိုင် ၶဝ်တေလႆႈၵိၼ်တၢင်းၵိၼ် ဢမ်ႇၼၼ် လႆႈၶူဝ်းသေဢၼ်ဢၼ်ၼၼ်ႉယဝ်ႉ။


ယွၼ်ႉၼၼ် ၼင်ႇႁိုဝ်လုၵ်ႈဢွၼ်ႇၶဝ် ပေႃးတေမီးတၢင်းယၢမ်ႈလီသေ ဢမ်ႇမီးတၢင်းယၢမ်ႈဢမ်ႇလီၼၼ်ႉ ထုၵ်ႇလီၸႂ်ႉတိုဝ်းၸၢမ်းတူၺ်းလွၵ်းလၢႆးသၢမ်ဢၼ် တီႈတႂ်ႈၼႆႉယူႇ။


ပိူင်လၢႆးပူၵ်းပွင်လုၵ်ႈဢွၼ်ႇ
လွၵ်း (႑) တွၼ်ႈသူးပၼ်မိူဝ်ႈလုၵ်ႈဢွၼ်ႇႁဵတ်းလီ (ပၼ်ၵမ်းလဵဝ်၊ၵမ်းၵမ်းၵႆႉပၼ်တႃႉ)
လွၵ်း (႒) ယႃႇပေတွၼ်ႈသူးမႅၼ်ႈလွင်ႈဢမ်ႇလီ ဢမ်ႇၼၼ် မိူဝ်ႈလုၵ်ႈဢွၼ်ႇႁဵတ်းလွင်ႈဢမ်ႇလီ။
လွၵ်း (႓) ပၼ်တၢမ်ႇမိူဝ်ႈလုၵ်ႈဢွၼ်ႇႁဵတ်းဢမ်ႇလီ (ႁႂ်ႈပဵၼ်တၢမ်ႇဢၼ်ၵိုင်ႇတၢၼ်ႇလႄႈဢၼ်ဢူၼ်ႈဢွၼ်ႇ၊ ယႃႇႁႂ်ႈပဵၼ်ဢၼ်လႆႈၸဵပ်းၼိူဝ်ႉၸဵပ်းတူဝ်ၸဵပ်းၸႂ်၊ ယႃႇပေႁႂ်ႈပဵၼ်ဢၼ်လုၵ်ႈဢွၼ်ႇလႆႈဢၢႆလႄႈလႆႈၵူဝ်ႁႄ)။


လွၵ်း (႑) တွၼ်ႈသူးပၼ်မိူဝ်ႈလုၵ်ႈဢွၼ်ႇႁဵတ်းလီ


လွင်ႈၸွႆႈထႅမ်ၵၢၼ်မူတ်းသႂ်တီႈႁိူၼ်း။ မေႃလၢတ်ႈၵႂၢမ်းဢေႃႈၸဝ်ႈဢေႃႈၶႃႈ။ ၵႂႃႇပႃႈၼႃႈၵူၼ်းလူင်ၵေႃႈ မေႃၵူမ်ႈမေႃၵွမ်း။ မိူဝ်ႈႁဵတ်းၽိတ်းသေလွင်ႈလွင်ႈၼၼ်ႉၵေႃႈ မေႃၵၼ်ႇတေႃးယွၼ်းၶႂၢင်ႉၶိုၼ်း။ မေႃၸွႆႈထႅမ်တႆးၵေႃႉလႄႈမေႃလဵၼ်ႈၵေႃႉၵၼ်လီလီ။ မေႃတူပ်ႉၶူဝ်းႁင်းၵူၺ်း။ မေႃလၢင်ႉဝၢၼ်ႇၶဝ်ႈ ႁင်းၵူၺ်းလႄႈ မေႃတူပ်ႉၽႃႈတူပ်ႉၶူဝ်းႁင်းၵူၺ်းၸဵမ်ၵႂႃႇ၊ သင်ပေႃႈမႄႈတွၼ်ႈသူးပၼ်မိူဝ်ႈၶဝ်ႁဵတ်းသၢင်ႈ ၸိူဝ်းၼႆႉ မိူဝ်ႈၶဝ်ႁဵတ်းလီၸိူဝ်းၼႆႉပေႃးၼႆၸိုင် လုၵ်ႈဢွၼ်ႇၶဝ်တေမေႃတွင်းသေႁဵတ်းသၢင်ႈ လွင်ႈၸိူဝ်းၼႆႉတႃႇသေႇ၊ တေၵႆႉၵႆႉႁဵတ်းသၢင်ႈလႄႈတေၵိုၵ်းၸပ်းတူဝ်ၶဝ်ၵႂႃႇယဝ်ႉ။


ယွၼ်ႉၼၼ် မိူဝ်ႈၶဝ်ႁဵတ်းလွင်ႈလီၵၢၼ်လီၼၼ်ႉ လွင်ႈလၢတ်ႈယွင်ႈ၊ ဢၢမ်း၊ လွင်ႈၵွတ်ႇပၼ်လွင်ႈဢုၼ်ႇတူဝ်ၸႂ်၊ လွင်ႈၸုပ်ႇႁွမ်ပၼ်၊ လွင်ႈလုပ်ႈႁူဝ်ၶဝ်ၸိူဝ်းၼႆႉႁွင်ႉဝႃႈ Social Reward ယဝ်ႉ။ လွင်ႈသိုဝ်ႉပၼ်တၢင်းၵိၼ်၊ သိုဝ်ႉပၼ်ၶူဝ်းၶွင်၊ သိုဝ်ႉပၼ်တၢင်းလဵၼ်ႈၸိူဝ်းၼႆႉႁွင်ႉဝႃႈ Material Reward ယဝ်ႉ။ လွင်ႈဢွၼ်ၵႂႃႇလႄႇသူၼ်သတ်း၊ သူၼ်မွၵ်ႇ၊ ဢွၼ်ၵႂႃႇတူၺ်းငဝ်းတူင်ႉ၊ ၵႂႃႇလဵၼ်ႈတၢင်ႈလဵၼ်ႈၸိူဝ်းၼႆႉႁွင်ႉဝႃႈ Activity Reward ယဝ်ႉ။ သူးသၢမ်ဢၼ်ၼႆႉပၼ်ၵမ်းလဵဝ်တႃႉ။ ၵမ်းၵမ်းၵႆႉပၼ်ၶဝ်တႃႉ။ လၢႆႈလၢႆးမၼ်းလၢႆႈမဵဝ်းမၼ်းသေယဝ်ႉၵေႃႈ ၵမ်းၵမ်းၵႆႉပၼ်ၶဝ်တႃႉ။


လွၵ်း (႒) ယႃႇပေတွၼ်ႈသူးမႅၼ်ႈလွင်ႈဢမ်ႇလီ ဢမ်ႇၼၼ် မိူဝ်ႈလုၵ်ႈဢွၼ်ႇႁဵတ်းလွင်ႈဢမ်ႇလီ။


မိူဝ်ႈလုၵ်ႈဢွၼ်ႇၶဝ်ႁဵတ်းလွင်ႈဢမ်ႇလီ၊ ႁဵတ်းႁၢႆႉ။ ဢူၼ်ပၼ်း၊ လိူင်း၊ လၢတ်ႈၵႂၢမ်းဢမ်ႇမေႃဢေႃႈၸဝ်ႈဢေႃႈၶႃႈ၊ လၢတ်ႈၵႂၢမ်းတႂ်ႈသိၼ်ႈတႂ်ႈသိူဝ်ႈ ပူၼ်ႉတီႈပူၼ်ႉလႅၼ်မၼ်းၸိူဝ်းၼႆႉ သင်ဝႃႈဢမ်ႇႁူႉသေၵိုင်ႉၵၢင်ႉၵႂႃႇ တွၼ်ႈပၼ်သူးၶဝ်ၼႆၸိုင် မိူၼ်တင်းသူၼ်းၽႆးပၼ်ႁႂ်ႈၶဝ်တိူဝ်းႁဵတ်းသၢင်ႈၵူၺ်းယဝ်ႉ။


လွၵ်း (႓) ပၼ်တၢမ်ႇမိူဝ်ႈလုၵ်ႈဢွၼ်ႇႁဵတ်းဢမ်ႇလီ


မိူဝ်ႈလုၵ်ႈဢွၼ်ႇၶဝ်ႁဵတ်းၽိတ်း၊ ႁဵတ်းလွင်ႈဢမ်ႇလီ၊ လၢတ်ႈမိူၵ်ႈလၢတ်ႈလိူင်း၊ ဢမ်ႇမေႃၵွမ်းဢမ်ႇမေႃၵိူင်း လၢတ်ႈယဝ်ႉၵေႃႈဢမ်ႇမေႃထွမ်ႇဢမ်မေႃတွင်း၊ ႁဵတ်းႁၢႆႉယဝ်ႉႁၢႆႉထႅင်ႈၼၼ်ႉ ၵေႃႉပဵၼ်ပေႃႈမႄႈၵိုင်ႇလီ ပၼ်တၢမ်ႇယူႇ။ သင်ဝႃႈဢမ်ႇတုမ်ႉဢမ်ႇတွႆႇ ဢမ်ႇပၼ်တၢမ်ႇသင်သေယူႇဝႆႉယဵၼ်ယဵၼ် ၶႂ်ႈပဵၼ်သင်ၵေႃႈပဵၼ်လႃႈ၊ တိူင်းမၼ်းလႃႈၼႆၵူၺ်းၸိုင် တေၸၢင်ႈမိူၼ်ၼင်ႇမုၵ်ႉၽႆးၼၼ်ႉသေ တေၸၢင်ႈမႆႈလၢမ်းထိုင်တင်းၸူဝ်ႈပၢၼ်လုၵ်ႈဢွၼ်ႇလႄႈ ပေႃႈမႄႈၸၢင်ႈတိူဝ်းလႆႈမႆႈၸႂ် ယၢပ်ႇယဵၼ်းတူဝ်ၸႂ်လိူဝ်ၵဝ်ႇမႃးယူႇယဝ်ႉ။


ဝႃႈၼၼ်သေတႃႉ တၢမ်ႇဢၼ်ပၼ်ၼၼ်ႉ ၵိုင်ႇလီလႄႈထုၵ်ႇလီႁႂ်ႈပဵၼ်တၢမ်ႇဢၼ်ၵိုင်ႇတၢၼ်ႇလႄႈ ဢၼ်ဢူၼ်ႈဢွၼ်ႇ၊ ယႃႇႁႂ်ႈပဵၼ်ဢၼ်လႆႈၸဵပ်းၼိူဝ်ႉၸဵပ်းတူဝ်ၸဵပ်းၸႂ်၊ ယႃႇပေႁႂ်ႈပဵၼ်ဢၼ်လုၵ်ႈဢွၼ်ႇ လႆႈၼႃႈတၢင်းဢၢႆလႄႈလႆႈၵူဝ်ႁႄ ထိုင်တီႈသမ်ႉပေႃးဢမ်ႇႁတ်းႁဵတ်းႁတ်းတူင်ႉ ႁတ်းလၢတ်ႈသင်ၼၼ်ႉၼင်ႇၵဝ်ႇ။


သင်ၸိူဝ်ႉဝႃႈ ပေႃႈမႄႈလုၵ်ႈဢွၼ်ႇမေႃၸႂ်ႉတိုဝ်းလွၵ်းလၢႆး ဢၼ်ထုၵ်ႇမႅၼ်ႈ၊ မေႃတွၼ်ႈသူးပၼ်မိူဝ်ႈၶဝ်ႁဵတ်းလီ၊ မေႃပၼ်တၢမ်ႇမိူဝ်ႈၶဝ်ႁဵတ်းဢမ်ႇလီၼၼ်ႉ ၼင်ႇသင်ႉတွၼ်ႈဢၼ်လၢတ်ႈၼၼ်ႉၼႆၸိုင် ယုမ်ႇယမ်ဝႃႈပေႃႈမႄႈ ၵူႈၵေႃႉ တေမီးလုၵ်ႈလၢင်းဢၼ်မီးတၢင်းယၢမ်ႈလီလႄႈ မေႃႁဵတ်းသၢင်ႈလီတွၼ်ႈတႃႇၼႃႈႁိူၼ်း၊ တေၸၢင်ႈလူတ်းယွမ်းပၼ်ၵၢၼ်တၢင်းႁူဝ်ၶႆႈလႄႈ လႆႈၼွၼ်းလပ်းလီမႃးလိူဝ်ၵဝ်ႇယူႇ။


ၸၢႆးဢွင်ႇၶမ်း (မိူင်းၵိုင်)
22nd June 23, 2017