ၸဝ်ႈၼႃႈတီႈ ပလိၵ်ႈထႆးလၢႆၾၢႆႇ ႁူမ်ႈၵၼ်သေၵူတ်ႇထတ်းတီႉၺွပ်း ႁႅင်းၵၢၼ်ၶဝ်ႈမိူင်း ၽိတ်းပၵ်းပိူင် မၢႆမီႈလႄႈ ႁဵတ်းၵၢၼ်ၽိတ်းတီႈ 300 ပၢႆ။


ဝၼ်းတီႈ 22/06/2017 သိုဝ်ႇၶၢဝ်ႇထႆး ၶူမ်ၶျတ်ႉလိုၵ်ႉ Kom Chad Luek ပိုၼ်ၽၢဝ်ႇဝႃႈ- ၸဝ်ႈၼႃႈ တီႈပလိၵ်ႈထႆး ၾၢႆႇဢုပ်ႉပိူင်ႇ ႁူမ်ႈလၢႆၾၢႆႇဢဵၼ်ႁႅင်းမွၵ်ႈ 50 ၵေႃႉ ဢွၼ်ၵၼ်ၵႂႃႇၵူတ်ႇထတ်းတီႉၺွပ်း ႁႅင်းၵၢၼ် ၽိတ်းမၢႆမီႈ  တီႈဢိူင်ႇၼွင်ပိုဝ်ႊ ၸႄႈဝဵင်းၿၢင်ႊလမုင်ႊ ၸႄႈတွၼ်ႈ ၶျူၼ်ႊၿူႊရီႊ ။

Photo - Nation

ထူပ်းႁၼ်ႁႅင်းၵၢၼ်မၢၼ်ႈ၊ ၶႅမ်ၿေႃႊတီႊယႃႊ ဢမ်ႇမီးဝတ်းဝႂ်သင် 253 ၵေႃႉၸၢႆး146၊ ယိင်း107၊ ႁဵတ်းၵၢၼ်ၽိတ်းတီႈ 57ၵေႃႉ ၸၢႆး39 ၵေႃႉယိင်း18 ၵေႃႉ၊ ႁူမ်ႈၵၼ်တင်းမူတ်း 310 ၵေႃႉ။ ၸဝ်ႈၼႃႈ တီႈၸင်ႇတီႉၺွပ်း ႁႅင်းၵၢၼ်တင်းမူတ်း သူင်ႇႁူင်းပလိၵ်ႈ ပၼ်တူတ်ႈတၢမ်ႇ ၸွမ်းၼင်ႇပၵ်းပိူင်မၢႆမီႈ ဝၢၼ်ႈမိူင်းမီးၼၼ်ႉ  ဝႃႈၼႆ။


ၼရိတ်သ်ႊ ၼိရႃႊမႆႊဝူင်ႊ ၽူႈၵွၼ်း ၸႄႈဝဵင်း ၿၢင်ႊလႃႊမုင်ႊ လၢတ်ႈဝႃႈ - “ ဢိင်ၼိူဝ်ႁဝ်းၶႃႈလႆႈ ငိၼ်းၵူၼ်းဝၢၼ်ႈမႃးၸႅင်ႈဝႃႈ မီးၵူၼ်းႁႅင်းၵၢၼ်ယၢၼ်မိူင်း မႃးယူႇတင်းၼမ်တင်းလၢႆလႄႈ မႆႈၸႂ် ယွၼ်ႉ ၵူဝ်မႃးႁဵတ်းလွင်ႈဢမ်ႇၼိမ်သဝ်း ၼႂ်းဝၢၼ်ႈမိူင်း ၼႆလႄႈ ၸင်ႇတၢင်ႇလၢတ်ႈမႃး တီႈႁဝ်း ၶႃႈသေ ႁဝ်းၶႃႈၸင်ႇဢွၼ်ၵၼ်မႃးတီႉၺွပ်း” ဝႃႈၼႆ။


ႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်း ပိုၼ်ၽၢဝ်ႇ ပၵ်းပိူင်မၢႆမီႈၵဵဝ်ႇလူၺ်ႈႁႅင်းၵၢၼ် ပီ 2017 ၼၼ်ႉ တႅမ်ႈဝႆႉဝႃႈ-  ၽူႈလႂ်ၽႂ်ႁပ်ႉၵူၼ်းႁဵတ်းၵၢၼ် ဢမ်ႇမီးဝတ်း၊ ႁဵတ်းၵၢၼ်ၽိတ်းတီႈ၊ ႁဵတ်းၵၢၼ်ၽိတ်း ပၵ်းပိူင်ၼႆၸိုင် မီးတၢမ်ႇမႂ်ငိုၼ်း 400,000 – 800,000 ၿၢတ်ႇ တေႃႇၵူၼ်းႁဵတ်းၵၢၼ် ၼိုင်ႈၵေႃႉ။ ၽႂ်ၸၢင်ႈၵူၼ်းႁဵတ်းၵၢၼ် ဢမ်ႇမႅၼ်ႈၸွမ်းၼင်ႇၼႂ်းဝတ်းဝႂ် မီးတၢမ်ႇ မႂ်ငိုၼ်း 400,000 ၿၢတ်ႇ၊ ၽူႈလႂ် ယိုတ်းဢဝ်ဝတ်းဝႂ်ႁႅင်းၵၢၼ်ဝႆႉ တူၵ်းၶွၵ်ႈ 6 လိူၼ် မႂ်ငိုၼ်း 100,000 ၿၢတ်ႇ ႁႅင်းၵၢၼ်ၵေႃႉလႂ် ႁဵတ်း ၵၢၼ်ဢမ်ႇမႅၼ်ႈ ၸွမ်းၼင်ႇၼႂ်းဝတ်းဝႂ် ဢမ်ႇၼၼ်ႁဵတ်းၵၢၼ်ဢၼ် ပၵ်းပိူင်ႁႄႉႁၢမ်ႈဝႆႉ မီးတူတ်ႈ တၢမ်ႇ မႂ်ငိုၼ်း 2,000 – 100,000 ၿၢတ်ႇ။

ၶဝ်ႈဢၢၼ်ႇလၢႆးႁူဝ်ယွႆႈလႆႈတီႈ : https://www.doe.go.th/prd/alien/news/param/site/152/cat/7/sub/0/pull/detail/view/detail/object_id/7720