ၸုမ်းမုလ်ၼိထိ မႅပ်ႇ(MAP Foundation) ဢွၼ်ႁူဝ်ၼမ်းၼႃႈ ၸတ်းႁဵတ်းပၢင်ဢုပ်ႇၵုမ် ၽူႈႁၢပ်ႇၵၢၼ် သိုဝ်ႇတႆး (ၼွၵ်ႈမိူင်း/ၼႂ်းမိူင်း) တီႈဝဵင်းၵဵင်းမႆႇ ၸိုင်ႈထႆး ၼႂ်းၶၢဝ်းတၢင်း သွင်ဝၼ်း မီးၸုမ်းသိုဝ်ႇၶၢဝ်ႇတႆး၊ ၸုမ်းတူင်ႉၼိုင်တူင်ႇ ဝူင်းတႆးလႄႈ သုၼ်ႇ တူဝ် ဢွၼ်ၵၼ်ၶဝ်ႈႁူမ်ႈ ၶွတ်ႇၽွတ်ႈၵေႃႇတင်ႈၶိုၼ်ႈမႃး ၸုမ်းၵေႃသိုဝ်ႇၶၢဝ်ႇတႆး။


ပူၼ်ႉမႃး ဝၼ်းတီႈ 22-23/06/2017 ယၢမ်းၵၢင်ၼႂ် 09:00-16:30 မူင်း ၸုမ်းမုလ်ၼိထိမႅပ်ႇ (MAP Foundation) ဢွၼ်ႁူဝ်ၸတ်းႁဵတ်း ပၢင်ဢုပ်ႇၵုမ် ၽူႈႁၢပ်ႇၵၢၼ် သိုဝ်ႇတႆး တီႈႁူင်းသဝ်း ႁေႃႊလီႊၻေႊၵႃႊၻဵၼ်ႊ ဝဵင်းၵဵင်းမႆႇ ၸိုင်ႈထႆး ယိူင်းဢၢၼ်းႁႂ်ႈၸုမ်းသိုဝ်ႇၶၢဝ်ႇတႆး မိုတ်ႈၵိုဝ်းၸမ်ၸႂ်ၵၼ်၊ ၼင်ႇႁိုဝ် ၸုမ်းသိုဝ်ႇၶၢဝ်ႇတႆး ပေႃးတေႁဵတ်း ၵၢၼ်ၶၢဝ်ႇလႆႈထၢင်ႇႁၢင်ႈလွတ်ႈလႅဝ်း၊ မီးလွင်ႈလွတ်ႈၽေးလႄႈ ပၼ်တၢင်း ႁူႉၵူၼ်းမိူင်း ၸဵမ်ၸိူဝ်းၼႆႉ။

ၸၢႆးတုမ်ႇမွၵ်ႇႁၢၼ် ၽူႈၵွၼ်းႁွင်ႈၵၢၼ်ၾၢႆႇသိုဝ်ႇ ၸုမ်းမုလ်ၼိထိမႅပ်ႇ(MAP Foundation) လၢတ်ႈဝႃႈ “ ယိူင်းဢၢၼ်း လူင် သုတ်းသုင်တႄႉၵေႃႈ ၼင်ႇႁိုဝ် ၸုမ်းၽူႈသိုဝ်ႇၶၢဝ်ႇတႆးႁဝ်းၶႃႈ တင်းမူတ်း ပေႃးတေႁဵတ်းၵၢၼ်လႆႈထၢင်ႇႁၢင်ႈ လွတ်ႈလႅဝ်း၊ ၼင်ႇႁိုဝ်ႁဝ်းၶႃႈ တေမီးလွင်ႈလွတ်ႈၽေး၊ ထႅင်ႈဢၼ်ၼိုင်ႈသမ်ႉ တၢင်းယၢပ်ႇ ၽိုတ်ႇ ၵူၼ်းမိူင်း ၼင်ႇႁိုဝ် ပေႃးတေသူင်ႇၸူးထိုင်တီႈၽူႈမီးပုၼ်ႈၽွၼ်း လူင်ပွင်ၸိုင်ႈၶဝ်ၼႄႇ ၽူႈဢၼ်ၵဵဝ်ႇၶွင်ႈလႄႈ ပဵၼ်ၶၢဝ်ႇ ပၼ်တၢင်းႁူႉ ၵူၼ်းမိူင်း ၸႃႉၵႂႃႇ ၸဵမ်ၸိူဝ်းၼႆႉ။ ႁဝ်းၶႃႈ ၸင်ႇလႆႈၶွတ်ႇၽွတ်ႈဝႆႉ ၵေႃပွင်ၵၢၼ်ၸူဝ်ႈၶၢဝ်း တႃႇတေႁဵတ်းၵၢၼ်ၵႂႃႇ ၼႂ်း ၶၢဝ်းတၢင်း 3 လိူၼ်ႁႃႉ၊ 6 လိူၼ်ႁႃႉ။ ယဝ်ႉၵေႃႈ တေဢွၼ်ၵၼ်ၶဵၼ်ႇတႅမ်ႈပၵ်းပိူင် ၼႂ်းၸုမ်းၵေႃသိုဝ်ႇၶၢဝ်ႇတႆး ဢၼ် ၶွတ်ႇၽွတ်ႈၶိုၼ်ႈမႃးၼႆႉ ၸင်ႇလႆႈပၼ်ပုၼ်ႈၽွၼ်းၵၼ် ၶဵၼ်ႇတႅမ်ႈမႃး ပိူင်ယုၵ်းယၢင်ႇ တႃႇၶၢဝ်းတၢင်း 2 လိူၼ်” ဝႃႈၼႆ။


ပၢင်ဢုပ်ႇၵုမ် ၽူႈႁၢပ်ႇၵၢၼ် သိုဝ်ႇတႆး ၼႂ်းၶၢဝ်းတၢင်း 2 ဝၼ်းၼႆႉ ႁူမ်ႈၵၼ် ၶွတ်ႇၽွတ်ႈၶိုၼ်ႈမႃး ၸုမ်းသိုဝ်ႇၶၢဝ်ႇတႆး တၢင်းၾၢႆႇတႆး ႁွင်ႉဝႃႈ ၵေႃသိုဝ်ႇၶၢဝ်ႇတႆး၊ တင်းၾၢႆႇဢင်းၵိတ်း Tai Journalist Association ၊ တင်းၾၢႆႇမၢၼ်ႈ သျှမ်းသတင်းစာဆရာများအသင်းလႄႈ ၾၢႆႇထႆးတႄႉ လိူၵ်ႈဝႆႉၸိုဝ်ႈသဵင်လၢႆလၢႆဢၼ်သေတႃႉ ယင်းပႆႇတႅပ်းတတ်း တေၸႂ်ႉတိုဝ်းၸိုဝ်ႈဢၼ်လႂ်။


ၼႂ်းပိူင်ၶွတ်ႇၽွတ်ႈၸုမ်းၼၼ်ႉ မိူၼ်ၼင်ႇ ယိူင်းမၢႆ၊ မုင်ႈမွင်း၊ ၽူႈၶဝ်ႈၸုမ်း၊ ၵၢၼ်တူင်ႉၼိုင်၊ ပၵ်းပိူင်၊ တီႈၵိူဝ်းၵုမ်၊ ငိုၼ်းၵွင်ၵၢင်၊ ပၼ်ႁႃလႄႈ ၽွၼ်းလီ ဢၼ်တေလႆႈႁပ်ႉမီးသင် ၸဵမ်ၸိူဝ်းၼႆႉ။ ၼႂ်းၼၼ်ႉ ႁူဝ်ၶေႃႈ ဢၼ်ဝႃႈ ပၵ်းပိူင် ၸုမ်းၼႆၼၼ်ႉ လႆႈၶွတ်ႇ ၽွတ်ႈၸုမ်း ပွင်ၵၢၼ်ၸူဝ်ႈၶၢဝ်း ႁႂ်ႈဢွၼ်ၵၼ်ၶဵၼ်ႇတႅမ်ႈမႃး ပိူင်ယုၵ်းယၢင်ႇ ၶၢဝ်းတၢင်း 2 လိူၼ် သူင်ႇပၼ်ၵူႈမူႇၵူႈၸုမ်းထတ်း သၢင် ၸဵမ်ၸိူဝ်းၼႆႉ ဝႃႈၼႆ။


ပၢင်ဢုပ်ႇၵုမ် ၽူႈႁၢပ်ႇၵၢၼ် သိုဝ်ႇတႆးၼႆႉ မီးၽူႈၶဝ်ႈႁူမ်ႈ 30 ပၢႆ မိူၼ်ၼင်ႇ တူဝ်တႅၼ်း ၸုမ်းမုလ်ၼိထိ မႅပ်ႇ(MAP Foundation) ၊ ၸုမ်းၵပ်းသၢၼ်လွင်ႈၼၢင်းယိင်းတႆး (SWAN)၊ ၸုမ်းၵေႃသိုဝ်ႇၶၢဝ်ႇၵူၼ်းမိူင်းတႆး၊ ၸုမ်းႁူမ်ႈတုမ် ႁႅင်းၵၢၼ်ယၢၼ်မိူင်း(WMF) ၊ ၸုမ်းသိုဝ်ႇႁႅင်းၼုမ်ႇ၊ မုၵ်ႉၸုမ်းၸၢဝ်းၶိူဝ်းတႆး၊ ၸုမ်းၶၢဝ်ႇသႅၼ်ပၢႆး၊ ၸုမ်းၶၢဝ်ႇ Tai TV Online၊ ၸုမ်းၶၢဝ်ႇတႆးလွတ်ႈလႅဝ်း၊ ႁူင်းပွႆႇသဵင် AM 1475 KHZ၊ ၸုမ်းႁူင်းပွႆႇသဵင် တႆးႁုၼ်ႈမႂ်ႇ၊ ၸုမ်းၶၢဝ်ႇသဵင်သၼ် လွႆလႄႈၸုမ်းၶၢဝ်ႇၽူႈတွႆႇႁွၵ်ႈ(ပၢင်လူင်) ၸဵမ်ၸိူဝ်းၼႆႉ။