ပႃႇတီႇႁူဝ်သိူဝ် SNLD ဝဵင်းၼမ်ႉၶမ်း ၸတ်းပၢင် ႁူပ်ႉထူပ်းၵူၼ်းမိူင်း ၼႂ်းတိုဝ်ႉတၢင်း ဝၼ်းၶိုၼ်း ၽွတ်ႈပႃႇတီႇတဵမ် 1 ပီ။


ဝၼ်းတီႈ 24/06/2017 ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး ႁိုဝ် ပႃႇတီႇ ႁူဝ်သိူဝ် SNLD ၸႄႈဝဵင်းၼမ်ႉၶမ်း ႁူပ်ႉထူပ်းပီႈၼွင်ႉၵူၼ်းမိူင်းၼမ်ႉၶမ်း။ တီႈႁူင်းတူမ်ႈႁုင် တႅၼ်ႇမၢဝ်းၶမ်း ပွၵ်ႉတႅၼ်ႈမႃႉ ဝဵင်းၼမ်ႉၶမ်း ၸိုင်တႆးပွတ်းႁွင်ႇ။ ၼႂ်းပၢင်ၼႆႉ မီးၸၢႆးသိူဝ်ယွမ်(ၸၢႆးလႃႉၽေႇ) ႁူဝ်ပဝ်ႈ ႁူဝ်သိူဝ်ပွတ်းႁွင်ႇ၊ လုင်းၸၢႆးယီႈ ႁူဝ်ႈပဝ်ႈ ႁူဝ်သိူဝ် ဝဵင်းၼမ်ႉၶမ်း၊ ၸၢႆးယီႈပူး ၵႅမ်ႁူဝ်ပဝ်ႈ၊ ၽူႈၼမ်းၼႂ်းၵူႈလွင်ႈလွင်ႈ ၸၢႆးမၢဝ်းၶမ်း ၸိူဝ်းၼႆႉ မွၵ်ႇလၢတ်ႈၶေႃႈၵႂၢမ်း မီးၵူၼ်းဝၢၼ်ႈ ၵူၼ်းမိူင်း မႃးၶဝ်ႈႁူမ်ႈၸမ် 800 ၵေႃႉ ။

ၼႂ်းပၢင်ၼႆႉ ဢုပ်ႇလၢတ်ႈသပ်းလႅင်း လၢႆလွင်ႈမိူၼ်ၼင်ႇ လွင်ႈယူပ်ႈယွမ်းလႄႈ လွင်ႈၶိုၼ်ႈသင်ႉ ပႃႇတီႇ ၊ လွင်ႈႁဵတ်းၵၢၼ်ပႃႇတီႇ1ပီ လွင်ႈတူင်ႉၼိုင် မီးၸိူင်ႉႁိုဝ် ၊ လွင်ႈတူဝ်တႅၼ်းႁူဝ်သိူဝ်လႆႈၵႂႃႇ ၶဝ်ႈႁူမ်ႈ ပၢင်ၵုမ်လူင် ႁူဝ်ပၢၵ်ႇပီ21 ပၢင်လူင်၊ လွင်ႈၵႂႃႇဢႅဝ်ႇလဵပ်ႈႁဵၼ်းတီႈမိူင်းၶႄႇ ၊ လွင်ႈတႃႇ တေပူၵ်းပွင်ၼႂ်းဢိူင်ႇဝၢၼ်ႈ တေႁူမ်ႈမိုဝ်းၸွႆႈထႅမ်ၵၢၼ် တူင်ႇဝူင်းၵူၼ်းလႆႈၸိူင်ႉႁိုဝ် ၸိူဝ်းၼႆႉ။


ၸၢႆးယီႈပူး ၵႅမ်ႁူဝ်ပဝ်ႈ ပႃႇတီႇႁူဝ်သိူဝ် SNLD လၢတ်ႈဝႃႈ - “ပီႈၼွင်ႉၵူၼ်းမိူင်းတႆးႁဝ်း ပေႃးမီးပၢင် ႁူပ်ႉ ထူပ်း၊ ပၢင်ပၼ်တၢင်းႁူႉ၊ပၢင်ၵုမ် ၸိူဝ်းၼႆႉ ၶႅၼ်းတေႃႈဢွၼ်ၵၼ် ၶဝ်ႈႁူမ်ႈၼမ်ၼမ် ႁဝ်းမႃး ၸွႆႈၵၼ် ပူၵ်းပွင်ႁဵတ်းၵၢၼ် တူင်ႇဝူင်းၵူၼ်း” ဝႃႈၼႆ။


ပႃႇတီႇႁူဝ်သိူဝ် SNLD ဝဵင်းၼမ်ႉၶမ်းၼႆႉ ၶိုၼ်းၶွတ်ႇၽွတ်ႈၸုမ်းပွင်ၵၢၼ်ၸႄႈဝဵင်းၶိုၼ်း မိူဝ်ႈဝၼ်းတီႈ 29/05/2016  ႁူဝ်ပဝ်ႈပဵၼ်ၸၢႆးယီႈ ၊ ၵႅမ်ႁူဝ်ပဝ်ႈ ၸၢႆးယီႈပူး၊ ၽူႈၼမ်းၼႂ်းၵူႈလွင်ႈလွင်ႈ ပဵၼ်ၸၢႆးမၢဝ်းၶမ်း လုၵ်ႈၸုမ်းမီး 40 ပၢႆ။