ၼမ်ႉႁူၺ်ႈၼွင်း ႁိူၼ်းၵူၼ်းဝၢၼ်ႈၵူၼ်းသူၼ် ၼႂ်းဝဵင်းၼမ်ႉလၼ်ႈ ၼမ်ႉထူမ်ႈ-ၶူဝ်းၶွင်ႁိူၼ်းယေး လူႉသုမ်းၼမ် ႁူင်းႁဵၼ်းလူင်ပွင်ၸိုင်ႈ မၢင်တီႈမၢင်လင် လႆႈဢိုတ်းယင်ႉဝႆႉၸူဝ်ႈၶၢဝ်း ဝႃႈၼႆ။


ဝၼ်းတီႈ 27/06/2017 ယၢမ်းၵၢင်ၼႂ် ၼမ်ႉထူမ်ႈႁိူၼ်းၵူၼ်းဝၢၼ်ႈၵူၼ်းသူၼ် ၼႂ်းပွၵ်ႉမၢၵ်ႇမူင်ႈႁိင်ႇ တင်းဝၢၼ်ႈ ပၢင်ႇႁႆႈ ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ယွၼ်ႉၾူၼ်လူင်တူၵ်းႁၢဝ်ႈႁႅင်း ၼႂ်းၶမ်ႈၶိုၼ်း ဝၼ်းတီႈ 26။ ၼမ်ႉႁူၺ်ႈၼမ်ႉပႃႇၼွင်း ထူမ်ႈလင်ႁိူၼ်းၵူၼ်းဝၢၼ်ႈ တင်း ႁူင်းႁဵၼ်း လူင်ပွင်ၸိုင်ႈ ၵမ်ႈၽွင်ႈ ဝႃႈၼႆ။

ၸၢႆးၼေႃႇသႅင် ၸုမ်းၵူၼ်းၼုမ်ႇတႆး TYN ဝဵင်းၼမ်ႉလၼ်ႈ လၢတ်ႈဝႃႈ “ ၸႂ်ႈၶႃႈဢေႃႈ မၢင်တီႈၼမ်ႉထူမ်ႈတၢင်းလိုၵ်ႉ တေမီးမွၵ်ႈႁူးလႅင်း၊ ပွၵ်ႉဢၼ်ၼမ်ႉထူမ်ႈၼၼ်ႉသမ်ႉ မီးတီႈၶူင်ႈဢိတ်းဢိတ်း၊ သမ်ႉယူႇႁူဝ်ဝဵင်း၊ ယဝ်ႉၵေႃႈ ၸမ်ၼမ်ႉ ႁူးမွၵ်ႇၶဝ်ႈတႅၵ်ႇ၊ ထႅင်ႈၾၢႆႇၼိုင်ႈၵေႃႈ တၢင်းပွတ်းၼိူဝ်သမ်ႉ ဢမ်ႇမီး ထိူၼ်ႇ ဢမ်ႇမီးဢၼ်တေထိင်းၼမ်ႉယဝ်ႉ။ မိူဝ်ႈၶမ်ႈ ဝၼ်းတီႈ 26 သမ်ႉ ၾူၼ်တူၵ်းသိင်းတင်းၶိုၼ်ႈ ၵွပ်ႈၼၼ် ၼမ်ႉႁူၺ်ႈလႆထူမ်ႈ ႁိူၼ်းၵူၼ်းဝၢၼ်ႈ၊ ႁူင်းႁဵၼ်း လူင်ပွင်ၸိုင်ႈမၢၼ်ႈ မၢင်တီႈၵေႃႈ လႆႈထုၵ်ႇ ဢိုတ်းဝႆႉၵေႃႈမီး” ဝႃႈၼႆ။


ၽွင်းၼမ်ႉထူမ်ႈၼၼ်ႉ ႁိူၼ်းၵူၼ်းဝၢၼ်ႈ ၼႂ်းပွၵ်ႉမၢၵ်ႇမူင်ႈႁိင်ႇ တင်းဝၢၼ်ႈပၢင်ႇႁႆႈ ဢမ်ႇတၼ်းလႆႈဢဝ်ၶူဝ်းၶၢႆႉလႄႈ ထုၵ်ႇၼမ်ႉထူမ်ႈ မိူၼ်ၼင်ႇၶဝ်ႈၵၢပ်ႇ(ၶဝ်ႈၶႄႇ) ၊ ၶွင်ၵိၼ်ယႅမ်ႉ ၼႂ်းႁိူၼ်း ၸဵမ်ၸိူဝ်းၼႆႉ တင်းၼမ်လၢႆ။ လိူဝ်ၼၼ်ႉ တီႈႁူင်းႁဵၼ်းၸၼ်ႉဢွၼ် ဝၢၼ်ႈပၢင်ႇႁႆႈၵေႃႈလႆႈ ဢိုတ်းဝႆႉၸူဝ်ႈၶၢဝ်း၊ ယွၼ်ႉၼမ်ႉထူမ်ႈၼွင်းၼႂ်းႁူင်းႁဵၼ်းသေ ဢမ်ႇၸၢင်ႈပူင်သွၼ်ပၼ်လုၵ်ႈဢွၼ်ႇလႄႈ ၸင်ႇလႆႈဢိုတ်းဝႆႉၸူဝ်ႈၶၢဝ်း ဝႃႈၼႆ။


ၸၢႆးၼေႃႇသႅင် လၢတ်ႈဝႃႈ ၵဵဝ်ႇၵပ်းလွင်ႈၼမ်ႉထူမ်ႈၼႆႉ ပွၵ်ႈၼႆႉ ဢမ်ႇၸႂ်ႈပဵၼ်ပွၵ်ႈၵမ်းႁႅၵ်ႈ။ ၵႆႉ ထူမ်ႈယူႇတႃႇ သေႇ ပေႃးၾူၼ်တူၵ်းသိင်းတင်းၶိုၼ်းသေ မၢင်ပွၵ်ႈ ၶၢဝ်းယၢမ်း ၵၢင်ၶိုၼ်း 2-3 မူင်း ၼမ်ႉၵႆႉၶိုၼ်ႈၼွင်း ဝႃႈၼႆ။