ပၢင်ၵုမ်လူင်သိုဝ်ႇၶၢဝ်ႇၸၢဝ်းၶိူဝ်း ၵမ်းထူၼ်ႈ 5 ၸတ်းႁဵတ်းတီႈဝဵင်းလွႆၶေႃ ႁိုဝ် လွႆၵေႃႇ၊ ဝဵင်းငဝ်ႈမိူင်း ၸႄႈမိူင်းယၢင်းလႅင်။ မီးၽူႈယႂ်ႇၵူၼ်းလူင်ၼႂ်းၸၢဝ်းၶိူဝ်း၊ ၼႂ်းလူင်ပွင်ၸိုင်ႈ ဢိၵ်ႇၸုမ်းသိုဝ်ႇၶၢဝ်ႇၸၢဝ်းၶိူဝ်း လၢႆမူႇၸုမ်းၶဝ်ႈႁူမ်ႈ။


ပၢင်ၵုမ်လူင်သိုဝ်ႇၶၢဝ်ႇၸၢဝ်းၶိူဝ်း (Ethnic Media Conference-EMC) ၼႆႉ  ၵမ်းထူၼ်ႈ 5  ၸတ်းႁဵတ်း တင်ႈတႄႇဝၼ်းတီႈ 26-28/06/2017 ၶၢဝ်းတၢင်းသၢမ်ဝၼ်း။ ႁူဝ်ၶေႃႈပၢင်ၵုမ်သႂ်ႇဝႆႉဝႃႈ- "တႃႇယုၵ်ႉယွင်ႈသိုဝ်ႇၶၢဝ်ႇၸၢဝ်းၶိူဝ်း၊ ၽွင်းယၢမ်းငဝ်းလၢႆးၵၢၼ်မိူင်းလႅၵ်ႈလၢႆႈ"- ၼႆယဝ်ႉ။

ၸွမ်းၼင်ႇၶပ်းမၢႆပၢင်ၵုမ်ၼၼ်ႉ ဝၼ်းပိုတ်ႇပၢင်ၵႅဝ်ႈပၢင်ၵုမ် ဝၼ်းတီႈ 26/06/2017 ၽူႈယႂ်ႇၵူၼ်းလူင် မွၵ်ႇလၢတ်ႈၶေႃႈၵႂၢမ်း၊ ၵပ်းသိုပ်ႇႁူႉၸၵ်းၸႄႈမိူင်းယၢင်းလႅင်၊ ပိူဝ်ႈတႃႇသိုဝ်ႇၶၢဝ်ႇၸၢဝ်းၶိူဝ်းတေၸုၵ်းမၼ်ႈလႆႈ၊ လွင်ႈလွၵ်းၵၢတ်ႇ၊ လွင်ႈသိုဝ်ႇၼိူဝ်ဢွၼ်ႊလၢႆႊ ၸဵမ်ၸိူဝ်းၼႆႉ။ မီးၽူႈယႂ်ႇၵူၼ်းလူင်၊ ၽူႈၸတ်းၵၢၼ်မူႇၸုမ်း ၼၢႆႇၵသေႃးမုၼ်ႇ၊ ၽွင်းလူင်ႇၾၢႆႇၶၢဝ်ႇသၢရ် မိူင်းႁူမ်ႈတုမ် ၻွၵ်ႊတိူဝ်ႊၽေႇမိၼ်ႉ ၊ ၸွမ်ၽွင်းလူင်မိူင်းယၢင်းလႅင် ဢူးဢႄႊလ်ၽွင်းၶျူဝ်ႇ ဢိၵ်ႇၽူႈယႂ်ႇၵူၼ်းလူင် ၼႂ်းၸႄႈမိူင်းယၢင်းလႅင် ၶဝ်ႈႁူမ်ႈ။


တႃႇပွင်ပဵၼ်မႃးပၢင်ၵုမ်လူင်သိုဝ်ႇၶၢဝ်ႇၸၢဝ်းၶိူဝ်းၼႆႉ ၸုမ်း BNI ပဵၼ်ၵဝ်ႉၵၼ်းသေ ၸုမ်းၶၢဝ်ႇယၢင်းလႅင် ၵၼ်ႇတရဝၻီႇထၢႆႊမ် ၶိုင်သၢင်ႈႁၢင်ႈပွင်ပဵၼ်မႃး။


ပၢင်ၵုမ်ၸုမ်းသိုဝ်ႇၶၢဝ်ႇၸၢဝ်းၶိူဝ်း (EMC) ၼႆႉ  ပွၵ်ႈၵမ်း 1  ၸတ်းႁဵတ်းတီႈ ဝဵင်းမေႃႇလမႅင်ႇ (မိူင်းမွၼ်း)ၼႂ်းပီ 2013 ။ ပွၵ်ႈၵမ်း 2 ၸတ်းတီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ၼႂ်းပီ 2014။ ပွၵ်ႈၵမ်း 3 ၸတ်းတီႈဝဵင်းႁႃးၶႃး ၸႄႈမိူင်းၶျၢင်း ပီ 2015 ။ ပွၵ်ႈၵမ်း 4 ၸတ်းတီႈဝဵင်းမျွၵ်ႉဢူး ၸႄႈမိူင်းရၶႅင်ႇ ၼႂ်းပီ 2016 သေ ၵမ်းထူၼ်ႈ 5 ၼႆႉ ၸတ်းတီႈဝဵင်းလွႆၶေႃ ၸႄႈမိူင်းယၢင်းလႅင်။