သင်ၶၸဝ်ႈတင်းပေႃႈမႄႈၵူၼ်းမိူင်း ဢဵၼ်ႁႅင်း ႁိမ်း 600 ႁူမ်ႈၵၼ်ၸတ်းႁဵတ်းပၢင်လူႇတၢၼ်းသိုပ်ႇၸႃႇတႃႇ ပႃႇမႆႉလႄႈ သၢၼ်ၶတ်းလွင်ႈၶုတ်းထၢၼ်ႇႁိၼ် တီႈဢိူင်ႇၼမ်ႉမ ၸႄႈဝဵင်းသီႇပေႃႉ။


ပူၼ်ႉမႃး ဝၼ်းတီႈ 23/06/2017 ယၢမ်းၵၢင်ၼႂ် 08:00-11:00 မူင်း သင်ၶၸဝ်ႈ၊ ပေႃႈမႄႈၵူၼ်းမိူင်း၊ ၽူႈတႅၼ်း ပႃႇတီႇႁူဝ်သိူဝ်၊ ၸုမ်းၵူၼ်းၼုမ်ႇတႆးလႄႈ ၸုမ်းတူင်ႉၼိုင်တူင်ႇဝူင်းတႆး လၢႆမူႇၸုမ်း ႁူမ်ႈၵၼ် ၸတ်းႁဵတ်းပၢင် လူႇတၢၼ်း သိုပ်ႇၸႃႇတႃႇ ပႃႇမႆႉလႄႈ သၢၼ်ၶတ်းၵၢၼ်ၶုတ်းထၢၼ်ႇႁိၼ် တီႈႁူဝ်ၼႃးၾႃႉ ဢိူင်ႇၼမ်ႉမ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ၼင်ႇႁိုဝ် ၸုမ်းၶုတ်းထၢၼ်ႇႁိၼ် တေဢမ်ႇသိုပ်ႇ ၶုတ်းထႅင်ႈ ၼင်လိၼ် ဢၼ်လႆႈတႅၵ်ႇငၢၵ်ႈၵႂႃႇၼၼ်ႉ ဢဝ်ႁဵတ်းပဵၼ်သၢၵ်ႈသေႇ(လၵ်းထၢၼ်) သေ တေဢမ်ႇ ပၼ်သိုပ်ႇၶုတ်း ၵႂႃႇထႅင်ႈ ဝႃႈၼႆ။

ၸၢႆးၼေႃႇသႅင် ႁူဝ်ၼႃႈၸုမ်းၵူၼ်းၼုမ်ႇတႆး TYN လၢတ်ႈဝႃႈ “ သင်ၶၸဝ်ႈ ၵူၼ်းမိူင်း ဢဵၼ်ႁႅင်းၵူၼ်းတင်းၼမ်လၢႆ ဢွၼ်ၵၼ်ႁဵတ်းၵုသူလ်ႇတၢင်းလီ ၵႅတ်ႇၶႄႁႄႉၵင်ႈ ၼင်ႇႁိုဝ် ၸုမ်းၶုတ်းထၢၼ်ႇႁိၼ်ၶဝ် ပေႃးတေဢမ်ႇသိုပ်ႇ ၶုတ်းၵႂႃႇ ထႅင်ႈ၊ ယႃႇႁႂ်ႈၶဝ်ႈမႃးယႃႉပႃႇမႆႉလႄႈ ၶုတ်းထၢၼ်ႇႁိၼ် ၶဝ်ႈမႃး တိၵ်းတိၵ်း ၸဵမ်ၸိူဝ်းၼႆႉ ႁဝ်းၶႃႈ ၵူၼ်းမိူင်း ၸင်ႇ ဢွၼ်ၵၼ် ႁဵတ်းပၢင်လူႇတၢၼ်း သိုပ်ႇၸႃႇတႃႇပႃႇမႆႉလႄႈ  သၢၼ်ၶတ်းၵၢၼ်ၶုတ်းထၢၼ်ႇႁိၼ် ယွၼ်ႉဝႃႈ ၽွၼ်းႁၢႆႉၸႃႉ ၵၢၼ်ၶုတ်းထၢၼ်ႇႁိၼ်တီႈၼမ်ႉမၼၼ်ႉ တုမ်ႉတိူဝ်ႉၵူၼ်းမိူင်း ၼႂ်းပိုၼ်ႉတီႈ တင်းၼမ်လၢႆ” ဝႃႈၼႆ။


ၶွမ်ႊပၼီႊဢၼ်မႃးၶုတ်းထၢၼ်ႇႁိၼ် ၼႂ်းဢိူင်ႇၼမ်ႉမ ၸႄႈဝဵင်းသီႇပေႃႉၼႆႉ ပဵၼ်ၶွမ်ႊပၼီႊ ငူၺ်ႇယီႇပလႄး တႄႇၶဝ်ႈမႃးၶုတ်း မိူဝ်ႈပီ 2004 တီႈဝၢၼ်ႈၼႃးၵုၼ်၊ ပီ 2005 သမ်ႉ တီႈဝၢၼ်ႈပဵင်းသၢႆး။ တေႃႈလဵဝ်သမ်ႉ ၶႂ်ႈသိုပ်ႇ ၶုတ်းထႅင်ႈ တီႈႁူဝ်ၼႃးၾႃႉထႅင်ႈ ဝႃႈၼႆ။


လွင်ႈၽွၼ်းႁၢႆႉၸႃႉ ၵၢၼ်ၶုတ်းထၢၼ်ႇႁိၼ် တီႈဝၢၼ်ႈပဵင်းသၢႆးၼၼ်ႉ တီႈၶုတ်းထၢၼ်ႇႁိၼ်ယဵၼ်းပဵၼ်ၼွင်လူင်ၵႂႃႇ ယဝ်ႉလႄႈ လႆႈလူႉသုမ်း တူင်ႈၼႃး 6 တူင်ႈ မွၵ်ႈ 30 ဢေႊၶိူဝ်ႊ၊ သူၼ်မၢၵ်ႇဝၢၼ် 6 ဢေႊၶိူဝ်ႊ၊ သူၼ်ႁႆႈ 14 ဢေႊၶိူဝ်ႊ ႁူမ်ႈၵၼ်တင်းမူတ်း 50 ဢေႊၶိူဝ်ႊ။


ယွၼ်ႉၼွင်လူင်ၼႆႉ ၼမ်ႉယိုင်ႈတဵမ်ၾင်ႇမႃးယဝ်ႉလႄႈ ၾင်ႇၼွင်ၵေႃႈၵူၼ်ႇပင်းယူႇၵူႈမိုဝ်ႉ ၵူႈဝၼ်း၊ ထႅင်ႈပိူင် ၼိုင်ႈၵေႃႈ ၼမ်ႉၼွင်သုင်လိူဝ်တူင်ႈၼႃး ႁဵတ်းႁႂ်ႈၼမ်ႉလႆၶဝ်ႈၼႃး/ ၸိုမ်းၶဝ်ႈၼႃး ဢမ်ႇႁႅင်ႈလႆႈသေပွၵ်ႈလႄႈ ၸဝ်ႈသူၼ်ၸဝ်ႈၼႃး လႆႈတၢင်းယၢပ်ႇၽိုတ်ႇႁၢဝ်ႈႁႅင်း။ လၢႆႇမိူင်ထၢၼ်ႇႁိၼ်လႆၶဝ်ႈၼမ်ႉမ ႁဵတ်းႁႂ်ႈၼမ်ႉမ ဢမ်ႇၸိုၼ်ႈသႂ်၊ ထႅင်ႈပိူင်ၼိုင်ႈၵေႃႈ ၵူၼ်းမိူင်းလႆႈ သုတ်ႇဢၢႆ ထၢၼ်ႇ/ ၾုၼ်ႇမုၵ်ႉ  ၵွင်ႉထၢၼ်ႇႁိၼ် ယူႇၶိူဝ်းၶိူဝ်းယႂ်းယႂ်းလႄႈ ၵူၼ်းဝၢၼ်ႈၵူၼ်းမိူင်းလႆႈၸပ်းတၢင်းပဵၼ် မွင်ၶေႃႈ၊ ၸႂ်ၵပ်ႉ ၸဵမ်ၸိူဝ်းၼႆႉ။ ၼွၵ်ႈလိူဝ်ၼၼ်ႉ တၢင်းပဵၼ်ပွတ်ႇ၊ ထူၺ်ႈၸႂ်ၵပ်ႉ၊ လွတ်ႇလူမ်း၊ ၵူင်ၶေႃးၶူမ်းၵၢႆး၊ ဢႆ၊ ၼိူဝ်ႉလိူင် ၸိူဝ်းၼႆႉၵေႃႈ မီးတင်းၼမ်။


ၶွမ်ႊပၼီႊၸူင်ၶုတ်းထၢၼ်ႇႁိၼ် တႂ်ႈသူၼ်၊ တႂ်ႈၼႃး၊ တႂ်ႈဝၢၼ်ႈလႄႈ ႁဵတ်းႁႂ်ႈလိၼ်တႅၵ်ႇဢႃႈ တၢင်းယၢဝ်း ဢမ်ႇယွမ်း 1000 ထတ်း(ပေႇ) တၢင်းလိုၵ်ႉမီးၼိုင်ႈၸူဝ်ႈၵူၼ်း။ ၵူၼ်းမိူင်းတႆးလႆႈမႆႈၸႂ် ၵူဝ်လိၼ်ၵူၼ်ႇပင်း။ ၸဝ်ႈၼႃး  6 ၸဝ်ႈ ဢေႊၶိူဝ်ႊ မွၵ်ႈ 50 ဢေႊၶိူဝ်ႊ ပီၼႆႉ ဢမ်ႇၸၢင်ႈၽုၵ်ႇယဝ်ႉ ဝႃႈၼႆ။


လိူဝ်ၼၼ်ႉ ၼႂ်းပီ 2016-2017 မႃးၼႆႉ ၶွမ်ႊပၼီႊငူၺ်ႇယီႇပလႄးၶဝ် ၶႂ်ႈမႃးၸၢမ်းၶုတ်းတီႈႁူဝ်ၼႃးၾႃႉ ဝၢၼ်ႈလူင် ပဵင်းသၢႆးထႅင်ႈ။ တီႈၼႆႈ ယွၼ်ႉပိူဝ်ႈ တေတုမ်ႉတိူဝ်ႉပႃႇမႆႉ/ တီႈဢွၵ်ႇၼမ်ႉ လဵင်ႉၼႃးလၢႆလၢႆတူင်ႈလႄႈ  ၵူၼ်းမိူင်းဢမ်ႇၽွမ်ႉ ဢမ်ႇပၼ်ၶုတ်း ဝႃႈၼႆ။


တီႈႁူဝ်ၼႃးၾႃႉၼႆႉ ၵူၼ်းမိူင်းဢမ်ႇတွၼ်ႉပၼ်ၽႂ် တႅပ်းမႆႉ ႁဵတ်းႁၢႆႉ ယႃႉပႃႇထိူၼ်ႇလႃးလႃး ပႅင်းမႅတ်ႇႁၵ်ႉသႃ ၵၼ်မႃး ၼပ်ႉႁူဝ်ပၢၵ်ႇပီ တႃႇတေလႆႈၶုတ်းၼၼ်ႉ ယူႇတီႈၶွမ်ႊပၼီႊငူၺ်ႇယီႇပလႄး ဢဝ်လွၵ်းလၢႆးၸေးယၢင်ႇသေ လွၵ်ႇငိုတ်ႈ ႁဵတ်းႁႂ်ႈၵူၼ်းမိူင်းလႆႈၵူဝ်ႁႄ။ ၵူၼ်းလႆႈတၢႆယွၼ်ႉ မိူင်ထၢၼ်ႇႁိၼ်ၵေႃႈမီး။


ပၢင်လူႇတၢၼ်းသိုပ်ႇၸႃႇတႃႇပႃႇမႆႉၼႆႉ မီးသင်ၶၸဝ်ႈ ပေႃႈမႄႈပီႈၼွင်ႉၵူၼ်းမိူင်းလႄႈ ၸုမ်းပွင်ၵၢၼ်ပႃႇတီႇ ၊ ၽူႈတႅၼ်းပႃႇတီႇႁူဝ်သိူဝ် ႁူမ်ႈလူၺ်ႈ ၸုမ်းၵူၼ်းၼုမ်ႇတႆး တၢင်ႇၸႄႈဝဵင်းၵေႃႈ ဢွၼ်ၵၼ်မႃးၶဝ်ႈႁူမ်ႈၸွမ်း တင်းၼမ်လၢႆ ဝႃႈၼႆ။


လိူဝ်ၼၼ်ႉ ယၢမ်းဝၢႆးဝၼ်းသမ်ႉ ၸုမ်းၵူၼ်းၼုမ်ႇတႆး TYN ၼႂ်းၸႄႈဝဵင်းသီႇပေႃႉ ၼမ်ႉလၼ်ႈလႄႈ ဢိၵ်ႇထႅင်ႈ လၢႆလၢႆတီႈ ႁူမ်ႈၵၼ်ၽုၵ်ႇတူၼ်ႈမႆႉ မွၵ်ႇၵွၼ် တင်းၼမ် 160 တူၼ်ႈ တီႈဝတ်ႉဝိႁၢရ်လူင် ၼမ်ႉမ ၸႄႈဝဵင်းသီႇပေႃႉ ဝႃႈၼႆ။