ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး ဢွၵ်ႇပၵ်းပိူင် မၢႆမီႈမႂ်ႇ ၵဵဝ်ႇလူၺ်ႈလွင်ႈ ႁႅင်းၵၢၼ်ၽိတ်းမၢႆမီႈ ပီ 2017 ။


ႁွင်ႈၵၢၼ်ၾၢႆႇၸတ်းႁႃၵၢၼ် လူင်ပွင်ၸိုင်ႈမိူင်းထႆး ဢွၵ်ႇပၵ်းပိူင်မၢႆမီႈမႂ်ႇ ပၼ်တူတ်ႈတၢမ်ႇပေႃႈလဵင်ႉ ၼၢႆးၸၢင်ႈလႄႈ ႁႅင်းၵၢၼ်ဢၼ်ႁဵတ်းၽိတ်းမၢႆမီႈ။ ပၵ်းပိူင်ၼႆႉတႄႇပိုၼ်ၽၢဝ်ႇၸႂ်ႉ ၼႂ်းဝၼ်းတီႈ 23/06 /2017 ၼႂ်းပၵ်းပိူင်ၼၼ်ႉ တႅမ်ႈဝႆႉဝႃႈ-

1. ၽူႈလႂ်ၽႂ်ႁပ်ႉၵူၼ်းႁဵတ်းၵၢၼ် ဢမ်ႇမီးဝတ်းဝႂ်၊ ႁဵတ်းၵၢၼ် ၽိတ်းတီႈ၊ ႁဵတ်းၵၢၼ်ၽိတ်း ပၵ်းပိူင်ၼႆၸိုင် မီးတၢမ်ႇမႂ်ငိုၼ်း 400,000 – 800,000 ၿၢတ်ႇ တေႃႇၵူၼ်းႁဵတ်းၵၢၼ် ၼိုင်ႈၵေႃႉ။


2. ၽႂ်ၸၢင်ႈၵူၼ်းႁဵတ်းၵၢၼ် ဢမ်ႇမႅၼ်ႈၸွမ်းၼင်ႇၼႂ်းဝတ်းဝႂ် မီးတၢမ်ႇ မႂ်ငိုၼ်း 400,000 ၿၢတ်ႇ။


3.  ႁႅင်းၵၢၼ် ႁဵတ်းၵၢၼ်ဢၼ်ပၵ်းပိူင်ႁႄႉႁၢမ်ႈ ဝႆႉၼၼ်ႉ မီးတူတ်ႈတၢမ်ႇတူၵ်းၶွၵ်ႈ 5 ပီ မႂ်ငိုၼ်း 2,000 – 100,000 ၿၢတ်ႇ။


4. ႁႅင်းၵၢၼ်လႆႈဢွၵ်ႇၼွၵ်ႈပိုၼ်ႉတီႈၶိုၵ်ႉၶၵ်ႉ ဢမ်ႇတၼ်းလႆႈတၢင်ႇလၢတ်ႈ ထိုင်ၾၢႆႇၸတ်းႁႃၵၢၼ်ငၢၼ်း မႂ်ငိုၼ်း 20,000-100,000 ၿၢတ်ႇ။


5. ႁႅင်းၵၢၼ်ႁဵတ်းၵၢၼ်ၽိတ်းတီႈ ၺႃးမႂ်ငိုၼ်း 100,000 ၿၢတ်ႇ။


6. ၽူႈလႂ်ၽႂ်ဢဝ်ဝတ်းဝႂ်ႁႅင်းၵၢၼ်ဝႆႉ မီးတူတ်ႈတၢမ်ႇတူၵ်းၶွၵ်ႈ 6 လိူၼ်မႂ်ငိုၼ်း 100,000 ၿၢတ်ႇ။


7. ၽူႈလႂ်ၽႂ်လွၵ်ႇၵဝ်းၵူၼ်းမႃးႁဵတ်းၵၢၼ်ၽိတ်းမၢႆမီႈၼႂ်းမိူင်းထႆး တူတ်ႈတၢမ်ႇၶွၵ်ႈ 3-10 ပီ မႂ်ငိုၼ်း 1,000,000 ၿၢတ်ႇ။


8. ၽူႈလႂ်ၽႂ်ႁဵတ်းၼၢႆးၼႃႈ(ႁဵတ်းၶဵဝ်) ဢဝ်ႁႅင်းၵၢၼ် မႃးႁဵတ်းၵၢၼ် ၼႂ်းမိူင်းထႆးၽိတ်းမၢႆမီႈ မီးတူတ်ႈတၢမ်ႇၶွၵ်ႈ 1-3 ပီ မႂ်ငိုၼ်း 200,000-600,000 ၿၢတ်ႇ ။


ဝႃႊရႃႊၼူၼ်ႊ ပီႊတီႊဝၼ်ႊ ႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်းလၢတ်ႈဝႃႈ - “ယိူင်းဢၢၼ်းဢၼ်ႁဝ်းၶႃႈလႆႈ ဢွၵ်ႇပၵ်းပိူင် ၼႆႉ ပိူဝ်ႈတႃႇႁႂ်ႈပၵ်းပိူင် မီးလွင်ႈၶိုတ်းၵၢပ်ႈပၢၼ် ၶိုတ်းၸၼ်ႉလုမ်ႈၾႃႉ၊ ၵွၼ်ႇတီႈတေပိုၼ်ၽၢဝ်ႇ ၸႂ်ႉပၵ်း ပိူင်ၼႆႉၵေႃႈ လႆႈပိုၼ်ၽၢဝ်ႇဝႆႉၵွၼ်ႇၼႃႈၼႆႉ2 လိူၼ်ယဝ်ႉ၊ တွၼ်ႈတႃႇတေပၼ်တူတ်ႈတၢမ်ႇ ၼမ်ထိုင် 8 သႅၼ်ဝၢတ်ႇ ဢၼ်ဢွၼ် ၵၼ်တူၵ်းၸႂ်ၼၼ်ႉတႄႉ ယူႇတီႈလုမ်းတြႃးသေ တေထတ်းတူၺ်း တၢင်းၽိတ်းလႄႈ ၸင်ႇတႅပ်းတတ်း ပၼ်တူတ်ႈ တၢမ်ႇထႅင်ႈၵမ်းၼိုင်ႈ ” ဝႃႈၼႆ။


ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ ၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း လၢတ်ႈဝႃႈ- “ ႁႅင်းၵၢၼ်ႁဝ်း ယႃႇပေတူင်ႉတိုၼ်ႇ ၼႃႇပူၼ်ႉတီႈ ပေႃးႁဝ်းမီးဝတ်းဝႂ် ႁဵတ်းၸွမ်းၼင်ႇပၵ်းပိူင်ပိူၼ်ႈၸိုင် ပိူၼ်ႈၵေႃႈဢမ်ႇၸၢင်ႈမႃး တီႉၺွပ်းႁဝ်း ” ။


ၸဝ်ႈႁၢၼ်သႅင်လီ ၽူႈၼင်ႈလုမ်းၵပ်းသၢၼ် RCSS ဝဵင်းတႃႈၶီႈလဵၵ်းလၢတ်ႈဝႃႈ -“  ပီႈၼွင်ႉႁဝ်းၶႃႈ ၸိူဝ်းႁွတ်ႈမႃးတီႈ လႅၼ်လိၼ်ၼၼ်ႉ သင်ဢမ်ႇမီးပီႈမီးၼွင်ႉၼႆၸိုင် ၵပ်းသိုပ်ႇယွၼ်းတၢင်းၸွႆႈထႅမ် မႃးတီႈလုမ်းၵပ်းသၢၼ် ႁဝ်းၶႃႈလႆႈယူႇ” ဝႃႈၼႆ။


ႁွင်ႈၵၢၼ်ၾၢႆႇႁႅင်းၵၢၼ် ပိုၼ်ၽၢဝ်ႇ သဵၼ်ႈမၢႆႁႅင်းၵၢၼ်ၶၢမ်ႈမိူင်း မိူဝ်ႈလိူၼ်ၼူဝ်ႊဝႅမ်ႊၿိူဝ်ႊ 2016 ၼၼ်ႉဝႃႈ- ႁႅင်းၵၢၼ် ၶၢမ်ႈမိူင်းတင်းမူတ်းမီး 1,298,058 ၵေႃႉ ၽႄပဵၼ် ၶႅမ်ႊၿေႃႊတီႊယႃႊ 248,515 ၵေႃႉ ၊ လၢဝ်း106, 527၊ ၵူၼ်းမိူင်း ႁူမ်ႈတုမ်မျႅၼ်ႇမႃႇမီး 943,016 ။ ၵမ်ႈၼမ်ႁဵတ်းၵၢၼ်ၵေႃႇသၢင်ႈ 245,352 ၵေႃႉ၊ လဵင်ႉသတ်း 108,069 ၵေႃႉ ၊ ၼႃႈၵၢၼ် ၵူႈလွင်ႈလွင်ႈ 216,893 ၵေႃႉဝႃႈၼႆ။