ဝၼ်းတီႈ 26 လိူၼ်ၵျုၼ်ႊ ပဵၼ်ဝၼ်းၽဵဝ်ႈမူၺ်ႉယႃႈမဝ်းၵမ်လုမ်ႈၾႃႉ လႄႈ ဝဵင်းလူင်တူၼ်ႈတီး ဢိၵ်ႇ ၼႂ်းၸိုင်ႈတႆးလၢႆလၢႆၸႄႈတွၼ်ႈ တီႈဢၼ်ၸုမ်းၸၢဝ်းၶိူဝ်းယိပ်းၵွင်ႈၵၢင်ႇၵုမ်းၵမ်ဝႆႉ ဢိၵ်ႇပႃးၼႂ်း ၼႃႈလိၼ်ၽွင်းငမ်းတူဝ်ၵဝ်ႇလၢႆလၢႆတီႈ ၸတ်းႁဵတ်းပၢင်ၽဝ်ယႃႈမဝ်းၵမ်။ တီႈငဝ်ႈငုၼ်းဝၢၼ်ႈႁႆး SSPP/SSA ၵေႃႈၸတ်းႁဵတ်းပၢင်ၽဝ်ယႃႈမဝ်းၵမ်။


ငဝ်ႈငုၼ်း SSPP/SSA ဢိူင်ႇဝၢၼ်ႈႁႆး ၸႄႈဝဵင်းၵေးသီး ၸိုင်းတႆးပွတ်းၸၢၼ်း လႆႈၸတ်းႁဵတ်းပၢင်ၽဝ်ယႃႈမဝ်းၵမ် ဢၼ်တီႉလႆႈၼႂ်းပီ 2014 ထိုင် 2017 ။ ပၢင်ၽဝ်တႄႇၸတ်းႁဵတ်းၵၢင်ၼႂ်ယၢမ်း 09:30 တေႃႇထိုင်ၵၢင်ဝၼ်း 11 မူင်းယဝ်ႉတူဝ်ႈလီငၢမ်း။ ၸတ်းႁဵတ်းတီႈတၢင်းၽႄပႃႇၶီး ဢိူင်ႇဝၢၼ်ႈႁႆး ၼႂ်းပၢင်ႇပိတ်ႉမၢၵ်ႇၼင်ႁူင်းႁဵၼ်းၸၼ်ႉငဝ်ႈ ပႃႇၶီး ။

ယေႈသႅင်ၵေႃႇ ၽူႇသိုဝ်ႇၶၢဝ်ႇ ၸုမ်းၶၢဝ်ႇၽူႈတွႆႇႁွၵ်ႈ လၢတ်ႈဝႃႈ- "ယႃႈမႃႉ ယႃႈမဝ်းၵမ် ဢၼ်ၽဝ်ၼႄဝၼ်းမိူဝ်ႈၼႆႉ SSPP/SSA တီႉလႆႈတီႈၵူၼ်းသူႇၵိၼ်သမ်း ၵႃႉၶၢႆ ၼႂ်းၶၢဝ်းတၢင်းပီ 2014 ထိုင် ပီ2017 ။ တေမီးၵႃႈၶၼ်ငိုၼ်းမွၵ်ႈ 2,000 လၢၼ်ႉပျႃးပၢႆ-ဝႃႈၼႆ။


ယႃႈမဝ်းၵမ်ဢၼ်လႆႈၽဝ်ပႅတ်ႈၵႂႃႇဝၼ်းထီႉ 26 လိူၼ်ႊၵျုၼ်ႊၼႆႉ ၽဝ်ၼႄ ယႃႈမႃႉ 900,000 မဵတ်ႉပၢႆ၊ ယႃႈၾိၼ်ႇၽိူၵ်ႇ 140 ၵီႊလူဝ်ႊပၢႆ၊ ယႃႈလမ် 16 ၸွႆႉ။


မီးၽူႈယႂ်ႇၵူၼ်းလူင်လႄႈ ပီႈၼွင်ႉၶႅၵ်ႇတီႈၸမ်တီႈၵႆ မႃးၶဝ်ႈႁူမ်ႈပၢင်ၽဝ်ယႃႈမဝ်းၵမ် 1,900 ပၢႆ ။ ၵႅမ်ႁူဝ်ပဝ်ႈၼိုင်ႈ SSPP/SSA ၸွမ်ႁၢၼ်ၶုၼ်သႅင် မွၵ်ႇလၢတ်ႈၶေႃႈၵႂၢမ်းသပ်းလႅင်းၼႄလွင်ႈလႆႈၸတ်းပၢင်ၽဝ်ယႃႈမဝ်းၵမ်။


ၸဝ်ႈၼႃႈတီႈ SSPP/SSA  သပ်းလႅင်းၼႄဝႃႈ-" ၼႂ်းၶၢဝ်းတၢင်း 4 ပီၼႆႉ တီႉလႆႈယႃႈမႃႉ 138 ၵမ်း၊ ယႃႈၽိူၵ်ႇ 20 ၵမ်း၊ ယႃႈလမ် 5 ၵမ်း။ ယွၼ်ႉပိူဝ်ႈဝႃႈၼႂ်းပီ2014-2015 ၼႆႉ တပ်ႉသိုၵ်းတပ်ႉမတေႃႇ လူင်ပွင်ၸိုင်ႈႁႅၼ်းသိုၵ်းလေႃႇတိုၵ်း SSPP/SSA  ဢမ်ႇထၢတ်ႇဢမ်ႇယင်ႉ ပဵၼ်ပၢင်တိုၵ်းၶၢဝ်းယၢဝ်းဝႆႉလႄႈ ဢမ်ႇၸၢင်ႈၸတ်းၵၢၼ်ၽဵဝ်ႈမူၺ်ႉ ယႃႈမဝ်းၵမ်လႆႈၵႂၢင်ႈၵႂၢင်ႈၶႂၢင်ၶႂၢင်။ ၼႂ်းပီ 2016-2017 ၼႆႉၵူၺ်း ၸင်ႇၸၢင်ႈႁဵတ်းလႆႈၵႂၢင်ႈၶႂၢင်လီငၢမ်း"- ဝႃႈၼႆ။


မိူၼ်ၼၼ်ၼင်ႇၵဝ်ႇ တီႈဝဵင်းလူင်တူၼ်ႈတီး ငဝ်ႈဝဵင်းလူင်ၸိုင်ႈတႆးၵေႃႈ ၾၢႆႇလူင်ပွင်ၸိုင်ႈမိူင်းတႆး၊ တပ်ႉသိုၵ်းတပ်ႉမတေႃႇမၢၼ်ႈ ဢိၵ်ႇပႃး ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ ဢၼ်တူင်ႉၼိုင်ၽဵဝ်ႈမူၺ်ႉယႃႈမဝ်းၵမ် တီႈၼႂ်းၸိုင်ႈတႆး ပႃးၸဵမ်ၸုမ်းသိုၵ်းၼႃႈလိၼ်ၽွင်းငမ်းတူဝ်ၵဝ်ႇ၊ ၸုမ်းပီႇတူႉၸိတ်ႉလႄႈ RCSS/SSA ၶဝ်ၵေႃႈႁူမ်ႈၵၼ်ၸတ်းႁဵတ်း ပၢင်ၽဝ်ယႃႈမဝ်းၵမ် ဢၼ်ပဵၼ်ၸၼ်ႉမိူင်းတႆးလႄႈမိူင်းယၢင်းလႅင်။ ယႃႈမဝ်းၵမ် ဢၼ်ၽဝ်ၼႄတီႈဝဵင်းတူၼ်ႈတီးၼႆႉ ၵႃႈၶၼ်မီးယူႇသႅၼ်ၵဝ်ႈမိုၼ်ႇလၢၼ်ႉပၢႆ၊ တူၵ်းမႅၼ်ႈငိုၼ်းၻေႃႊလိူဝ်ႊ 143 လၢၼ်ႉပၢႆ။


လိူဝ်ၼၼ်ႉ တီႈမိူင်းပွၵ်ႉ ၼႃႈလိၼ် UWSA ဝႃႉၵုမ်းၵမ်ဝႆႉၼၼ်ႉလႄႈသင်၊ တီးၼႃႈလိၼ်ၶိုၵ်ႉတွၼ်းမၢႆ-4 ၸုမ်းမိူင်းလႃးၸိူဝ်းၼၼ်ႉလႄႈသင်  ၸတ်းႁဵတ်းပၢင်ၽဝ်ယႃႈမဝ်းၵမ် ၽႂ်မၼ်း။ လိူဝ်ၼၼ်ႉ တပ်ႉသိုၵ်းတဢၢင်း TNLA ၵေႃႈ ၸတ်းႁဵတ်းပၢင်ၽဝ်ယႃႈမဝ်းၵမ်။