လူတ်ႉၵႃး လမ်းၼိုင်ႈ ၽွင်းတိုၵ်ႉႁူၼ်လင် ဢွၵ်ႇႁိူၼ်းမႃးၼၼ်ႉ ယွၼ်ႉဢမ်ႇၵုမ်းလႆႈႁႅင်းလူတ်ႉသေ ပုင်ႈတူၵ်း ၼႂ်းၼွင်တုင်၊ ၵူၺ်းၵႃႈ ဢမ်ႇမီးၵူၼ်းမၢတ်ႇၸဵပ်းလူႉတၢႆ။

ဝၼ်းတီႈ 04/04/2017 ယၢမ်းဝၢႆးဝၼ်း မွၵ်ႈ 15:30 မူင်းပၢႆၼၼ်ႉ ၵႃးသီၶၢဝ် လမ်းၼိုင်ႈ ၽွင်းတိုၵ်ႉထွႆလင်(ႁူၼ်လင်) ဢွၵ်ႇႁိူၼ်းမႃးၼၼ်ႉ ယွၼ်ႉဝႃႈဢမ်ႇၵုမ်းလႆႈႁႅင်းလူတ်ႉသေ ပုင်ႈတူၵ်းၵႂႃႇၼႂ်းၼမ်ႉၼွင်တုင် တီႈဝၢၼ်ႈၼွင်ၶႄႉ ပွၵ်ႉ 5 ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း။

ၸၢႆးသၢမ် ၵူၼ်းယူႇႁိမ်းၼွင်တုင်ၼၼ်ႉ လၢတ်ႈဝႃႈ “ ၵူၼ်းႁေႃႈလူတ်ႉတႄႉ ဢမ်ႇတၼ်းပဵၼ် သင်၊ လူတ်ႉၵႃးတႄႉ တူၵ်းလူင်းၵႂႃႇၼႂ်းၼမ်ႉၼွင်တုင်။ လူတ်ႉၼႆႉလဵပ်ႈပဵၼ် လူတ်ႉဢၼ်ၸႂ်ႉၵေး ဢေႃႊတေႃႊ၊ မိူဝ်ႈၽွင်းတိုၵ်ႉထွႆလင်(ႁူၼ်လင်)ၼၼ်ႉ သမ်ႉႁူၼ်ဝႆးသေ ဢမ်ႇတၼ်းၵုမ်းလႆႈ ႁႅင်းႁိုဝ် ၵေႃႈဢမ်ႇႁူႉ၊ ဢမ်ႇၼၼ်ၵေႃႈ ၵူၼ်းႁေႃႈလူတ်ႉမၼ်း ပဵၼ်ၵူၼ်းမိုဝ်းမႂ်ႇ၊ ႁေႃႈမႂ်ႇႁိုဝ်ၵေႃႈ ဢမ်ႇႁူႉ၊ ဢၼ်လႆႈႁပ်ႉႁူႉတႄႉ ၵူၼ်းႁေႃႈမၼ်းပဵၼ်ၼၢင်းယိင်း” ဝႃႈၼႆ။

ၵဵဝ်ႇၵပ်းလွင်ႈၼႆႉသေ တေႃႈလဵဝ် လူတ်ႉၵႃး ဢၼ်တူၵ်းၵႂႃႇၼၼ်ႉ ယူႇတီႈၾၢႆႇၽူႈမီးပုၼ်ႈၽွၼ်း ၼႂ်းၸႄႈဝဵင်းၵဵင်းတုင် ၸွႆႈၵၼ်ဢဝ်ဢွၵ်ႇၶိုၼ်ႈမႃးယဝ်ႉ။ လူတ်ႉၵႃးတႄႉ လႆႈလူႉၵွႆတင်းၼမ်ယူႇ ဝႃႈၼႆ။

ႁိမ်းၾၢင်ႇၼွင်တုင် တီႈလူတ်ႉၵႃးတူၵ်းၵႂႃႇၼၼ်ႉ သဝ်ဢုတ်ႇလႄႈ ႁူဝ်ႉလဵၵ်း ဢၼ်ႁႄႉ ၵၢင်ႈဝႆႉ ၼၼ်ႉ လႆႈလူႉလႅဝ်ဝႆႉၵမ်ႈၽွင်ႈ ဝႃႈၼႆ။

ၼွင်တုင်ၼႆႉ ပဵၼ်ၼွင်ဢၼ်ၵိုၵ်းႁေႃလူင် ၸဝ်ႈၾႃႉၵဵင်းတုင်လႄႈ ဝဵင်းၵဵင်းတုင်၊ ဝၢႆးႁေႃၸဝ်ႈ ၾႃႉၺႃးယႃႉယဝ်ႉ- ၼွင်တုင်ၼႆႉ ထုၵ်ႇၸုမ်းသိုၵ်းမၢၼ်ႈပၼ်ႁဵတ်းႁၢၼ်ႉတၢင်းၶၢႆ/ႁၢၼ်ႉႁွင်ႉၵႂၢမ်း။ ယၢမ်းလဵဝ် ၼႂ်းၼွင်တုင် ဢမ်ႇမီးႁၢၼ်ႉတၢင်းၶၢႆၼိူဝ်ၼမ်ႉ-သေဢမ်ႇၵႃး ၼွင်တုင်ၵေႃႈ မႄးလုမ်းလႃး ႁႂ်ႈႁၢင်ႈလီၶိုၼ်းဝႆႉ ဝႃႈၼႆ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 05/04/2017