ၸဝ်ႈၼႃႈတီႈၾၢႆႇၵူတ်ႇထတ်း ၵူၼ်းၶဝ်ႈမိူင်း တီႉၺွပ်းလႆႈၵူၼ်းမိူင်းတႆး ၶဝ်ႈမိူင်းထႆး 15ၵေႃႉ တီႈလႅၼ်လိၼ်ထႆး- တႆး။

မိူဝ်ႈဝၼ်းတီႈ03/04/2017 သိုဝ်ႇၶၢဝ်ႇ MaeSai ပိုၼ်ၽၢဝ်ႇဝႃႈ -  ၸဝ်ႈၼႃႈတီႈ ၾၢႆႇၵူတ်ႇထတ်း ၵူၼ်းၶဝ်ႈမိူင်း ဝဵင်းမႄႈသၢႆ ဢွၼ်ၵၼ်ၵႂႃႇပႂ်ႉၵူတ်ႇထတ်းၵူၼ်းၶဝ်ႈမိူင်း ၼိူဝ်သဵၼ်ႈတၢင်း တီႈဢိူင်ႇၵုၼ် ၸၢင်ႉ ၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆး ၸိုင်ႈတႆးပွတ်းႁွင်ႇ။


ၽွင်းၼၼ်ႉ မီးၵူၼ်းၶဝ်ႈမိူင်းၽိတ်းမၢႆမီႈ ၶီႇႁိူဝ်းၶၢမ်ႈၼမ်ႉမႃး မီးၵႃးမႃးပႂ်ႉႁပ်ႉ ယဝ်ႉဢွၼ်ၵၼ်ၵႂႃႇ တီႈႁိူၼ်းလင်ၼိုင်ႈ ဢၼ်မီးတီႈဢိူင်ႇပူင်ႇငၢမ်း ၸႄႈဝဵင်းမႄႈသၢႆ ၸႄႈဝဵင်းၵဵင်းႁၢႆး။ ၸဝ်ႈၼႃႈတီႈ ၸွမ်းၵႂႃႇ တီႈႁိူၼ်းလင်ၼၼ်ႉသေ ၼႄတူဝ်ယွၼ်းၵူတ်ႇထတ်း။


ထူပ်းႁၼ်ၵူၼ်းၶဝ်ႈမိူင်းၽိတ်းမၢႆမီႈ 6ၵေႃႉ တေၵႂႃႇႁႃႁဵတ်းၵၢၼ် တီႈမိူင်းၵွၵ်ႇ လႆႈပၼ်ၵႃႈၵူၼ်း ဢွၼ်ၵႂႃႇ ၸိုဝ်ႈၸၢႆးမွင်ႇၶမ်း 1ၵေႃႉလႂ် 8,000 ဝၢတ်ႇ - ဝႃႈၼႆ။


ၸိူင်ႉၼၼ်ၼင်ႇၵဝ်ႇ မိူဝ်ႈဝၼ်းတီႈ 31/03/2017 ၼၼ်ႉၵေႃႈ ၸဝ်ႈၼႃႈတီႈ ပလိၵ်ႈတီႈလၢၼ်ႇ (ၵဵၵ်ႉ) သႅၼ်သုၵ်ႇ ဢိူင်ႇတႃႈတွၼ်း ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ တီႉၺွပ်းလႆႈၵူၼ်း ၶဝ်ႈမိူင်း ၽိတ်းမၢႆမီႈထႅင်ႈ9 ၵေႃႉ။


ၸဝ်ႈၼႃႈတီႈၾၢႆႇၵူတ်ႇထတ်းၵူၼ်းၶဝ်ႈမိူင်း ဢဝ်ၵူၼ်းၶဝ်ႈမိူင်းၽိတ်းမၢႆမီႈတင်းမူတ်း ပၼ်တူတ်ႈ တၢမ်ႇၸွမ်းၼင်ႇမၢႆမီႈ ဝၢၼ်ႈမိူင်းမီး - ဝႃႈၼႆ။

ၸုမ်းၶၢဝ်ႇၽူႈတွႆႇႁွၵ်ႈ/သၢႆမွၵ်ႇႁွမ်