ၵၢၼ်လွမ်ၶႃႈႁႅမ်ယိုဝ်းၵၼ် တီႈဝၢၼ်ႈၼႃးလွၼ် ဢိူင်ႇပၢင်ႇၵေႇတူႉ ၸႄႈဝဵင်းမိူင်းၵိုင်ၼၼ်ႉ မီးၵူၼ်းလူႉတၢႆသွင်ၵေႃႉ။ တႃႇၵေႃႉၼိုင်ႈ ထုၵ်ႇယိုဝ်းတိူဝ်ႉၸွမ်းၶႅၼ်/မိုဝ်း ဝၢတ်ႇၸဵပ်းႁၢဝ်ႈႁႅင်း။

မိူဝ်ႈဝၼ်းတီႈ 03/04/2017 ယၢမ်းၵၢင်ၶမ်ႈၼၼ်ႉ တီႈဝၢၼ်ႈၼႃးလွၼ် ဢိူင်ႇပၢင်ႇၵေႇတူႉ ၸႄႈဝဵင်းမိူင်းၵိုင် မီးၵၢၼ်ၶႃႈႁႅမ်ယိုဝ်းၵၼ်တၢႆ။ ၵူၼ်းၵေႃႉထုၵ်ႇယိုဝ်းတင်းမူတ်းမီး 3 ၵေႃႉ 1.လုင်းတေႇၸ ။ 2.လုင်းၸၢင်းသူႉလၢႆး။ 3.ၸၢႆးသၢင်ႇထုၼ်း။ ၼႂ်းသၢမ်ၵေႃႉၼႆႉ တႃႇသွင်ၵေႃႉ လုင်းတေႇၸလႄႈ လုင်းၸၢႆးသူႉလၢႆး လႆႈလူႉတၢႆၵႂႃႇ။ ၸၢႆးသၢင်ႇထုၼ်းတႄႉ ၺႃးယိုဝ်းတိူဝ်ႉဝၢတ်ႇၸဵပ်းၸွမ်းၶႅၼ်ၸွမ်းမိုဝ်းႁၢဝ်ႈႁႅင်းဝႆႉ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵူၼ်းၼႂ်းပိုၼ်ႉတီႈ ၸႄႈဝဵင်းမိူင်းၵိုင် ဢၼ်တူင်ႉၼိုင်ၵၢၼ်တူင်ႇဝူင်းၵူၼ်း ၵေႃႉၼိုင်ႈလၢတ်ႈဝႃႈ- "လွင်ႈၼႆႉ ၶတ်းၸႂ်တိတ်းတေႃႇတၢင်းႁမ်းငၢႆး ၸိူဝ်းၼႆႉတူၺ်းယူႇ၊ ၵူၺ်းၵႃႈဢမ်ႇလႆႈႁူႉတႅတ်ႈတေႃး။ ၶတ်းၸႂ်တိတ်းတေႃႇ တွင်ႈထၢမ်တူၺ်း တၢင်းႁူင်းယႃ တီႈမေႃယႃၶဝ်ၵေႃႈ ဢမ်ႇလႆႈႁူႉတႅတ်ႈတေႃးၼင်ႇၵဝ်ႇ၊ ပေႃးထွမ်ႇတူၺ်း သၢႆၵႂၢမ်းၶဝ်တႄႉ ပဵၼ်ၼႂ်းသိုၵ်းၼင်ႇၵၼ်ၶိုၼ်းယိုဝ်းၵၼ်တၢႆ၊ တပ်ႉၸုမ်း 758 ၊ ၵေႃႉဢၼ်လူႉတၢႆၵႂႃႇ (လုင်းတေႇၸ)ၼႆႉ လႆႈငိၼ်းဝႃႈပဵၼ်လုၵ်ႈပီႈလုၵ်ႈၼွင်ႉၵၼ် တင်းၸဝ်ႈထွႆႉ"- ဝႃႈၼႆ။

ၵဵဝ်ႇၵပ်းလွင်ႈၼႆႉ ၵမ်ႈၽွင်ႈၵေႃႈဝႃႈ ပဵၼ်လွင်ႈႁၵ်းလင်ၵၼ်၊ ၵွပ်ႈဝႃႈလုင်းတေႇၸၼႆႉ ယၢမ်ႈပဵၼ်လုၵ်ႈၼွင်ႉ ၸဝ်ႈၵႃႇလိင်ႇထွႆႉ (ၸုမ်းပီႇတုၸိတ်ႉဝၢၼ်ႈပၢင်ႇ တပ်ႉၸုမ်း 758၊ ၵေႃႉၺႃးယိုဝ်းသေ လူႉတၢႆၵႂႃႇဢွၼ်ၼႃႈၼႆႉ)။ လုင်းတေႇၸၼႆႉ မႃးၸႂ်းႁိူၼ်းတီႈဝၢၼ်ႈၼႃးလွၼ်သေ ထုၵ်ႇယိုဝ်း။ ၸၢႆးသၢင်ႇထုၼ်း ပဵၼ်လုၵ်ႈၸၢႆးလုင်းတေႇၸ။ ၵူၺ်းၵႃႈ လုင်းၸၢင်းသူႉလၢႆးတႄႉ ပဵၼ်ၶႅၵ်ႇ မႃးယဵမ်ႈသူႇၸႂ်းၸဝ်ႈႁိူၼ်းသေ ထုၵ်ႇယိုဝ်းတၢႆၸွမ်း- ၼႆယဝ်ႉ။

ဝၢၼ်ႈၼႃးလွၼ်ၼႆႉ ယူႇၼႂ်းဢိူင်ႇပၢင်ႇၵေႇတူႉ ၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း၊ ဢိူင်ႇပၢင်ႇၵေႇတူႉ ယၢၼ်ၾၢႆႇႁွင်ႇဝဵင်းမိူင်းၵိုင် 19 လၵ်း။