ပၢင်လိူၵ်ႈတင်ႈသွမ်ႈမိူဝ်ႈဝၼ်းတီႈ  1 လိူၼ် April ပီ 2017 ၼၼ်ႉ ပႃႇတီႇတႆး 2 ဢၼ် ဢၼ်ပဵၼ် ပႃႇတီႇႁူဝ်သိူဝ် SNLD လႄႈ ပႃႇတီႇ သိူဝ်ၽိူၵ်ႇ SNDP - ၶဝ်ႈၶေႉၶဵင်ႇ လိူၵ်ႈတင်ႈ တီႈၼင်ႈၽွင်း တႅၼ်းသၽႃး 7 တီႈ ၼႂ်းမိူင်းတႆး။ ၼႂ်းၼၼ်ႉပႃႇတီႇႁူဝ်သိူဝ် ဢွင်ႇပေႉလႆႈတီႈၼင်ႈ 6 တီႈ။ ၼႂ်းၸေႈ ဝဵင်းမိူင်းသူႈ 3 တီႈလႄႈ ၸႄႈဝဵင်းၵေးသီး 3 တီႈ။ ၵူၺ်းၵႃႈ တီႈၼင်ႈၽူႈတႅၼ်း သၽႃး ၸေႈမိူင်း ၶဵတ်ႇလိူၵ်ႈတင်ႈမၢႆ 2 ဝဵင်းၵဵင်းတုင် တီႈၼိုင်ႈၼၼ်ႉတေႉ ပႃႇတီႇတႆး ဢမ်ႇပေႉသေဢၼ်။ ပဵၼ်ပႃႇတီႇသၢင်ႇသီႈ USDP ဢွင်ႇပေႉလႆႈတီႈၼင်ႈၵႂႃႇပႅတ်ႈ။ ဢိင်ၼိူဝ်ၼႆႉသေ လုင်းၸၢႆးယွတ်ႈႁွင် ၼေႃႇၽူႈတႅၼ်းသၽႃးပႃႇတီႇ   သိူဝ်ၽိူၵ်ႇ ဢၼ်ဢမ်ႇပေႉပၢင်လိူၵ်ႈတင်ႈသွမ်ႈ တီႈၵဵင်းတုင်ၼၼ်ႉ ႁၼ်ထိုင်ၸိူင်ႉႁိုဝ်။ ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ် ၼေႃႇၽူႈတႅၼ်းသၽႃးပႃႇတီႇသိူဝ်ၽိူၵ်ႇ လုင်းၸၢႆးယွတ်ႈႁွင် ဝႆႉၼင်ႇၼႆ။

ထၢမ်။ ။ ႁဵတ်းသင်လႄႈ ပႃႇတီႇသိူဝ်ၽိူၵ်ႇ ၸႄႈဝဵင်းၵဵင်းတုင် လႆႈသုမ်းၵၢၼ်ႉ?

တွပ်ႇ။ ။ ၶႃႈၶဝ်ႁဵတ်းႁိုဝ်လႄႈၵၢၼ်ႉ ႁဝ်းၶႃႈသွၼ်ႇဝႆႉ တီႈၵဵင်းတုင်ႁဝ်းၼႆႉ တပ်ႉ သိုၵ်းဢၼ်တေသႂ်ႇတွတ်ႈၶႅပ်းၵၢင်ၸႂ် တင်းမူတ်းမီးယူႇ 9 တပ်ႉ၊ ၶႃႈႁၢပ်ႇၵၢၼ်လူင်ပွင်ၸိုင်ႈမၢၼ်ႈ (ဝုၼ်ႇထၢၼ်း)ၵေႃႈမီး၊ သမ်ႉၼိူဝ်လွႆ တႃႇႁႃႈဢိူင်ႇၼၼ်ႉ မိူၼ်ၼင်ႇ ဢိူင်ႇၼမ်ႉဢိၼ်း၊ ဢိူင်ႇ ၼမ်ႉၶၢၵ်ႉ၊ ဢိူင်ႇၼွင်တွင်း၊ ဢိူင်းၼႃးပေႃႇ၊ ဢိူင်ႇမိူင်းဢိၼ်း ၸိူဝ်းၼႆႉ ဢၼ်ၼႆႉၵေႃႈ ပဵၼ်သၢင်ႇသီႈ ၵႂႃႇမူတ်း။ ၾၢႆႇသၢင်ႇသီႈ ပိူၼ်ႈၵႂႃႇႁဵတ်းတၢင်းဝႆႉ၊ ပၼ်ၾႆးဝႆႉ ၸိူဝ်းၼႆႉ ဢၼ်ၵူၼ်း ၼႂ်း ဢိူင်ႇၸိူဝ်း ၼႆႉသမ်ႉ မၼ်းတေပဵၼ်ၵူၼ်းၶဝ်သဵင်ႈသဵင်ႈယဝ်ႉ ဢၼ်ဝႃႈၼၼ်ႉ ယူႇတီႈသြႃႇၶဝ်သေ လႆႈႁူႉဝႆႉ ၼင်ႇၼႆ။ ႁဵတ်းႁိုဝ်လႄႈၵၢၼ်ႉ/ သုမ်းၼႆ ၵူၼ်းမိူင်းမႃးသႂ်ႇ တွတ်ႈၶႅပ်းၵၢင်ၸႂ် ႁူဝ်ပၢၵ်ႇလႂ် မီး 40 % ၵူၺ်းၶႃႈ ဢၼ်မႃးတွတ်ႈ။ ၵွပ်ႈဝႃႈ မိူၼ်ၼိူဝ်လွႆ၊ ၽူႈႁၢပ်ႇၵၢၼ် လူင်ပွင်ၸိုင်ႈ တင်းသဵင်ႈသေ၊ သမ်ႉ တပ်ႉသိုၵ်း ပေႃးမီးလၢႆႁဵင်ယဝ်ႉ။ ၼွၵ်ႈလိူဝ်ၼၼ်ႉ ဢၼ်ပဵၼ် ၶႅပ်းၵၢင်ၸႂ်လူင်ႈၼႃႈသမ်ႉ ပေႃးမီး 773 ၶႅပ်းယဝ်ႉ။

  

ထၢမ်။ ။ လွင်ႈလႆႈသုမ်းၵၢၼ်ႉၵႂႃႇၼႆႉ မိူဝ်းၼႃႈမႃး ထုၵ်ႇလီမူၼ်ႉမႄးၸိူင်ႉႁိုဝ်?

တွပ်ႇ။ ။ ၶႃႈၶဝ်တႄႉ ပဵၼ်ႁိုဝ်ၵေႃႈပဵၼ် ၵၢၼ်ႉၵၢၼ်ႉပေႉပေႉ ယူႇတီႈပႃႇတီႇသိူဝ်ၽိူၵ်ႇသေ ၶွတ်ႇ ၽွတ်ႈဝႆႉၵေႃၸဝ်ႈႁႆႈၸဝ်ႈၼႃး ႁႂ်ႈမၼ်းမၼ်ႈၵႅၼ်ႇၶႃႈ၊ သင်ဝႃႈ မၼ်းၵႅၼ်ႇယဝ်ႉၸိုင် တႃႇၸဝ်ႈႁႆႈ ၸဝ်ႈၼႃးႁဝ်း ႁူဝ်ပၢၵ်ႇလႂ် 60% ၸိုင် ပေႃးထိုင်မႃး ပၢင်လိူၵ်ႈတင်ႈ 2020 ၼႆႉ တႃႇတေပေႉ ၶပ်းၶိုင်ဝႆႉၼင်ႇၼႆၶႃႈ။

ထၢမ်။ ။ ၵဵဝ်ႇၵပ်းလွင်ႈလႆႈသုမ်းၵၢၼ်ႉၼႆႉသေ ၶႂ်ႈမွၵ်ႇလၢတ်ႈၼႄပီႈၼွင်ႉၵူၼ်းမိူင်းၸိူင်ႉႁိုဝ်?

တွပ်ႇ။ ။ ဢၼ်ၶႃႈလၢတ်ႈတႄႉ ပီႈၼွင်ႉတႆးႁဝ်း ယႃႇပေႁူဝဝ်၊ ထွမ်ႇၵႂၢမ်းငၢႆႈ၊ ပီႈၼွင်ႉတႆးႁဝ်း တင်းသဵင်ႈ ႁူဝ်ၵူၼ်းႁဝ်းၼမ်လိူဝ်ပိူၼ်ႈ ၵူၺ်းၵႃႈ မိူဝ်ႈလဵဝ်ၼႆႉ မၼ်းပဵၼ်ဝႆႉၸိူင်ႉႁိုဝ်၊ ၽႂ်ပဝ်ႇတၢင်း လႂ်ၵေႃႈ ပီႈၼွင်ႉၵူၼ်းမိူင်းႁဝ်းၵႂႃႇတၢင်းၼၼ်ႉ၊ တႆးတေႃႇတႆးၵေႃႈ ဢမ်ႇမႅၼ်ႈၵၼ် ၵဝ်ပဵၼ်ႁူဝ်သိူဝ်၊ ၵဝ်ပဵၼ်သိူဝ်ၽိူၵ်ႇ သင်ႁဝ်းတႅၵ်ႇယၢႆႈၵၼ်ၸိူင်ႉၼႆတႄႉ ႁဝ်းတေဢမ်ႇပေႉပိူၼ်ႈသေပွၵ်ႈ ႁဵတ်းႁိုဝ် လႄႈၼႆ ပီႈၼွင်ႉတႆး ၼႂ်းၵဵင်းတုင်ၼႆႉ တင်းမူတ်းမီးယူႇ ၸဵတ်းမိုၼ်ႇပၢႆ ပေႃးဢဝ်% ဝႃႈၸိုင် တေမီး 38 % ဢၼ်မီးသုၼ်ႇတွတ်ႈၶႅပ်းၵၢင်ၸႂ် ၼႂ်းပၢင်လိူၵ်ႈ တင်ႈ သွမ်ႈသမ်ႉ မီးသွင်မိုၼ်ႇပၢႆ တင်းမူတ်း တေသႂ်ႇတွတ်ႈၵႃႈႁိုဝ်ၵူၺ်း ၶိုင်ႈၼိုင်ႈတႄႉ တေဢမ်ႇမီးၶႃႈယူဝ်ႉ ၶႃႈဝႃႈတႄႉ သင်ဝႃႈ ဢမ်ႇၸႅၵ်ႇ ၽႄၵၼ်သေ ပၼ်ၵၼ်ပၼ်တီႈ ၽေပၼ်ၵၼ်သေ ၶဝ်ႈ လိူၵ်ႈတင်ႈတႄႉ ပႃႇတီႇတႆးႁဝ်းၶႃႈတေ ၸၢင်ႈပေႉၼႆ ႁဝ်းၶႃႈ ၶႂ်ႈသင်ႇလၢတ်ႈ ပၼ်ပီႈၼွင်ႉ ၵူၼ်းမိူင်း ႁဝ်းၶႃႈၸိူင်ႉၼႆၶႃႈ။

ထၢမ်။ ။ မိူဝ်းၼႃႈၼႆႉ ယူႇတီႈပႃႇတီႇသိူဝ်ၽိူၵ်ႇၸႄႈဝဵင်းၵဵင်းတုင်သမ်ႉ တေဢၢၼ်းႁဵတ်းသၢင်ႈ သင်ၵႂႃႇထႅင်ႈ၊ ႁၢင်ႈႁႅၼ်းဝႆႉၸိူင်ႉႁိုဝ်?

တွပ်ႇ။ ။ တႆးတေႃႇတႆး သိူဝ်တေႃႇသိူဝ်မႃးၶူပ်းၵၼ်တႄႉ မၼ်းတေဢမ်ႇပေႉလႆႈသေပွၵ်ႈ ၽိူဝ်ႇတႃႉ ႁဝ်းႁဵတ်းၸိူင်ႉၼႆ ႁဝ်းတေႃႇႁဝ်း ယႃႇပေၶူပ်းၵၼ် ႁဝ်းတေႃႇႁဝ်း ၽႄတီႈယူႇၵၼ်သေ မိူၼ်ၼင်ႇ ပီ 2020 ၼႆႉ ၽူႈတႅၼ်းသၽႃးၵူၼ်းမိူင်း သိူဝ်ၽိူၵ်ႇၶဝ်ႈလႄႈ၊ ၽူႈတႅၼ်းသၽႃးၸႄႈမိူင်းသမ်ႉ ႁူဝ်သိူဝ်ၶဝ်ႈလႄႈ၊ ႁဝ်းတေၽႄၵၼ်ၸိူင်ႉႁိုဝ်ၵေႃႈ ၵူၺ်းၵႃႈ ႁဝ်းယႃႇပေၵႂႃႇတုမ်ႉတိူဝ်ႉၵၼ် သင်ဝႃႈ သိူဝ်ၽိူၵ်ႇၶဝ်ႈၵေႃႈ ႁူဝ်သိူဝ်ယႃႇပေၶဝ်ႈ၊ သင်ဝႃႈ ႁူဝ်သိူဝ်ၶဝ်ႈၵေႃႈ သိူဝ်ၽိူၵ်ႇယႃႇပေၶဝ်ႈ သင်ႁဝ်း ဢုပ်ႇၵၼ်လႆႈၸိူင်ႉၼႆၸိုင် သင်ပႃႇတီႇတႆးႁဝ်း ၶဝ်ႈပဵၼ်တီႈပဵၼ်တီႈၸိူင်ႉၼႆ ဢွင်ႈတီႈၸိူဝ်းၼၼ်ႉ သႂ်ႇပၼ်ႁူဝ်သိူဝ်သဵင်ႈသဵင်ႈ၊ သႂ်ႇပၼ်သိူဝ်ၽိူၵ်ႇသဵင်ႈသဵင်ႈ ၼႂ်းပီ 2020 ၼႆႉ ပႃႇတီႇတႆးႁဝ်း မၼ်း တိုၼ်းတေပေႉဢမ်ႇႁၢင်ႉ ဝႃႈၼႆ။

ပၢင်လိူၵ်ႈတင်ႈသွမ်ႈ ဢၼ်ၸတ်းႁဵတ်းၼႂ်းဝၼ်းတီႈ 1 လိူၼ် April ၼၼ်ႉ ၼႂ်းမိူင်းတႆးၼႆႉ တီႈၼင်ႈ သၽႃးႁၢမ်းပဝ်ႇဝႆႉ 8 တီႈၼင်ႈ ပႃႇတီႇ တႆး 2 ဢၼ် ၶဝ်ႈၶေႉၶဵင်ႇ 7 တီႈၼင်ႈ။ 1 တီႈၼင်ႈ ၼႂ်းၸႄႈဝဵင်း ၵဵင်းတုင်တႄႉ ပႃႇတီႇသၢင်ႇသီႈ လႆႈၶႅပ်းၵၢင်ၸႂ်ၼမ်သုတ်း သေ ၼႂ်းၸႄႈဝဵင်းယွင်ႈႁူၺ်ႈ 1 တီႈၼင်ႈ သမ်ႉ ပႃႇတီႇ ၼူၵ်ႉယူင်း ဢွင်ႇပေႉ ။ ပၢင်လိူၵ်ႈတင်ႈသွမ်ႈ ဢၼ်ၸတ်းႁဵတ်းၼႂ်းမိူင်းမၢၼ်ႈ ပတ်းပိုၼ်ႉ 22 ၸေႈဝဵင်းၼႆႉ တီႈၼင်ႈ သၽႃးႁၢမ်းပဝ်ႇဝႆႉ 19 တီႈၼင်ႈ။ ပႃႇတီႇၵၢၼ်မိူင်း 24 ဢၼ်သူင်ႇတူဝ် တႅၼ်း 87 ၵေႃႉ၊ ယူႇတီႈသုၼ်ႇတူဝ်သေၶဝ်ႈ ၶေႉၶႅင်ႇသမ်ႉ 7 ၵေႃႉ ႁူမ်ႈတင်းမူတ်း 94 ၵေႃႉ ၶဝ်ႈၶေႉၶႅင်ႇၵၼ်။ ၼႂ်းၼၼ်ႉ ပႃႇတီႇ ၼူၵ်ႉယုင်းပေႉ 9 တီႈၼင်ႈ၊ ပႃႇတီႇ ႁူဝ်သိူဝ် ပေႉ 6 တီႈၼင်ႈ။ ပႃႇတီႇသၢင်ႇသီႈ 2 တီႈၼင်ႈလႄႈ ပႃႇတီႇရၶႅင်ႇ 1 တီႈၼင်ႈ ပႃႇတီႇ တီႊမွၵ်ႇၶရေသီႇ ၵူၼ်းၶိူဝ်းႁူမ်ႈ ( လူႇမဵဝ်းပွင်းၸူင်ႇ တီႊမွၵ်ႇၶရေသီႇပႃႇတီႇ) 1 တီႈၼင်ႈ။ ပၢင်လိူၵ်ႈတင်ႈသွမ်ႈၵမ်းၼႆႉ ၽူႈမီး သုၼ်ႇ တွတ်ႈၶႅပ်းၵၢင်ၸႂ် မိူင်းမၢၼ်ႈပတ်းပိုၼ်ႉ မီး 2 လၢၼ်ႉပၢႆ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 06/04/2017