တၢင်းပွတ်းၵဵင်းတုင်ၼႆႉ ပေႃးဝႃႈပီႈၼွင်ႉဢႃးၶႃႇ လႃးႁူႇ တင်းမၢၼ်ႈႁူမ်ႈၵၼ် ႁူဝ်ၵူၼ်းၼမ်လိူဝ်တႆး။ မိူၼ်ၵၼ်တင်းဝဵင်းလူင်တူၼ်ႈတီး လႃႈသဵဝ်ႈ ပေႃးလိူၵ်ႈတင်ႈ တႆးဢမ်ႇပေႉလႆႈ၊ ပွၵ်ႈၼႆႉသုမ်းၵေႃႈ ပွၵ်ႈတေမႃးတေပေႉယူႇ။ ႁူဝ်ပဝ်ႈပႃႇတီႇသိူဝ်ၽိူၵ်ႇ ၸၢႆးဢၢႆႈပဝ်း တွပ်ႇလၢတ်ႈဝႆႉတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

 

ႁူဝ်ပဝ်ႈပႃႇတီႇသိူဝ်ၽိူၵ်ႇ ၸၢႆးဢၢႆႈပဝ်း

ထၢမ် - ပၢင်လိူၵ်ႈတင်ႈသွမ်ႈၼႆႉ ယူႇတီႇပႃႇတီႇသိူဝ်ၽိူၵ်ႇသေၸွင်ႇပဵင်းပေႃးၸႂ်ၶႃႈ?။

တွပ်ႇ - ဢမ်ႇပဵင်းပေႃးၸႂ်၊ ယွၼ်ႉႁဝ်းဢမ်ႇပေႉ ႁဵတ်းႁိုဝ်ပဵင်းပေႃးၸႂ်လႃႇ။

ထၢမ် - ယွၼ်ႉသင်လႄႈပႃႇတီႇသိူဝ်ၽိူၵ်ႇဢမ်ႇပေႉ ပွတ်းတၢင်းမိူင်းသူႈ၊ ၵေးသီးၸိူဝ်းၼႆႉၶႃႈ?။

တွပ်ႇ -  ၵေးသီးသေမိူင်းသူႈၼႆႉ မၼ်းပဵၼ်ၼႃႈလိၼ်  SSPP/SSA ။ SSPP/SSA ၼႆႉ ၶဝ်ပဵၼ် SSJAC  ၶဝ်တင်းႁူဝ်သိူဝ်ပဵၼ်ဢူၺ်းလီၵၼ်ဝႆႉ၊ SSJAC ၼႆႉဝၢၼ်ႈႁၢႆး၊ သိုၵ်းၵူၼ်းမိူင်းသႅင်ၵႅဝ်ႉ၊ ႁူဝ်သိူဝ်ၶဝ်ပဵၼ်ဢူၺ်းလီၵၼ်၊ သၽႃဝမၼ်းယဝ်ႉ ပေႃးပဵၼ်ဢူၺ်းလီၵၼ်ၼႆႉ ၼင်ႇႁိုဝ်ဢူၺ်းလီၶဝ်တေပေႉ ၶဝ်ၸွႆႈၵၼ်ဢိူဝ်ႈ၊ ႁဝ်းသမ်ႉဢမ်ႇမီးဢူၺ်းလီၼႃႇ၊ ဢၼ်တေမႃးၸွႆႈႁဝ်းသမ်ႉဢမ်ႇမီး၊ ဢၼ်ၼႆႉၵေႃႈပႃးဢၼ်ၼိုင်ႈ။ 

ထႅင်းဢၼ်ၼိုင်းသမ်ႉမိူဝ်ႈပီ 2010 ၼၼ်ႉ ႁဝ်းပေႉၵႂႃႇယဝ်ႉ တႅၼ်းၽွင်းႁဝ်းၵေႃႈ ပေႃးသွၼ်ႇမႃးတႄႉတႄႉၵေႃႈ ၶဝ်ဢမ်ႇပေႃးႁဵတ်းၵၢၼ်ပုၼ်ႈတႃႇတူင်ႇဝဵင်းၶဝ်လီလီ၊ ၵူၼ်းမိူင်းၵေႃႈဢမ်ႇပေႃးပဵင်းၸႂ်ဢၼ်ၼႆႉၵေႃႈပႃးဢၼ်ၼိုင်ႈ၊ မၼ်းတေမီးယူႇသွင်တွၼ်ႈၼႆႉ။

ထၢမ် - ယွၼ်ႉသင်ပႃႇတီႇတႆးတင်းသွင်ဢၼ် ဢမ်ႇပေႉတၢင်းပွတ်းၵဵင်းတုင်ၼႆႉၶႃႈ?။

တွပ်ႇ - ၵဵင်းတုင်ၼႆႉ မၼ်းယၢပ်ႇ၊ မၼ်းယၢပ်ႇၸိူင်ႉႁိုဝ်ၼႆ ၵဵင်းတုင်ၼႆႉ ၵူၼ်းတႆးၼႆႉ ပေႃးဝႃႈဢႃးၶႃႇ၊ လႃးႁူႇ၊ ပီႈၼွင်ႉမၢၼ်ႈတင်းပီႈၼွင်ႉတၢင်ႇၸိူဝ်းႁူမ်ႈၵၼ်ၼႆႉ ႁူဝ်ၵူၼ်းၶဝ်ၼမ်သေတႆး။ ဢၼ်ၼႆႉတႄႉ တွႆႇႁိင်ႇပၼ်သတိပီႈၼွင်ႉတႆးၵဵင်းတုင်သေဢမ်ႇၵႃး ပၼ်ပီႈၼွင်ႉတႆးတင်းသဵင်ႈယဝ်ႉ။

 

ၵဵင်းတုင်ၼႆႉ ပေႃးပဵၼ်ၼႆတႄႉ တႆးႁဝ်းတေဢမ်ႇပေႉလႆႈသေပွၵ်ႈယဝ်ႉ မၼ်းမိူၼ်တၢင်းလႃႈသဵဝ်ႈ၊ ၵဵင်းတုင်၊ တူၼ်ႈတီး ပီၼွင်ႉတႆးဢမ်ႇပေႉလႆႈ၊ ၵွပ်ႈႁူဝ်ၵူၼ်းတႆးဢေႇၼႃႇ၊ မိူၼ်တူၼ်ႈတီးၼႆႉ ႁူဝ်ၼပ်ႉၵူၼ်းမီးသၢမ်သႅၼ်ႁူၵ်းမိုၼ်ႇ (360,000) ပီႈၼွင်ႉတႆးသၢမ်မိုၼ်ႇ သမ်ႉဢမ်ႇမီး တေႁဵတ်းႁိုဝ်ပေႉလႆႈ။

ၵဵင်းတုင်ၼႆႉ မီးသႅၼ်မၼ်းႁူၵ်းမိုၼ်ႇ၊ တႆးႁဝ်းမီးႁူၵ်းမိုၼ်ႇပၢႆၵူၺ်း မၼ်းသမ်ႉတႅၵ်ႇၵၼ်ဝႆႉ မၼ်းႁဵတ်းႁိူဝ်ၵႂႃႇပေႉလႆႈလႃႇ၊ ယွၼ်းတူၺ်းႁူဝ်ၼပ်ႉၵူၼ်းတီႈလဝၵၶဝ်လေႃႇ ဢႃးၶႃႇတင်းလႃးႁူႇသေမၢၼ်ႈႁူမ်ႈၵၼ်ၼႆႉ ၼမ်သေတႆး၊ မိူင်းတႆးႁဝ်းမၼ်းယၢပ်ႇၸိူင်ႉၼႆ၊ မိူၼ်မိူင်းလူင်လႃႈသဵဝ်ႈ၊ တူၼ်ႈတီး၊ ၵဵင်းတုင် ၶႂ်ႈယၢပ်ႇမႃးလွႆးလွႆးယဝ်ႉ၊ လႃႈသဵဝ်ႈတင်းတူၼ်ႈတီး တႄႉယၢပ်ႇတႄႉတႄႉဝႃႈဝႃႈယဝ်ႉ။

ထၢမ် - ပေႃး 2020 မႃးၸွင်ႇတေၶဝ်ႈလိူၵ်ႈတင်ႈထႅင်ႈၶႃႈ?။

တွပ်ႇ - ၶဝ်ႈဢိူဝ်ႈ၊ ပႃႇတီႇပၢႆးမိူင်းၼႆႉ ၵမ်းၼႆႉႁဝ်းသုမ်းသေတႃႉၵေႃႈယႃႇ ပွၵ်ႈတေမႃးႁဝ်းတေပေႉၵႂႃႈ၊ တူၺ်းပႃႇတီႇၼူၵ်ႉယူင်းၶဝ်လေႃႇ ပူၼ်ႉမႃး 2015 ၼၼ်ႉ ၶဝ်ပေႉၼမ်ၼႅၼ်ႇ 80% ၶိုၼ်ႈၼႃ၊ ၵမ်းၼႆႉ 50 % သမ်ႉဢမ်ႇပေႉ၊ ၵူၼ်းမိူင်းၼႆႉ ၶႂ်ႈလႅၵ်ႈလၢႆႈ သၽႃဝမၼ်းယဝ်ႉ၊ ပေႃးၵူၼ်းမိူင်းဢမ်ႇပဵင်းပေႃးၸႂ်မႃးၼႆႉ ၶဝ်ၶႂ်းလႅၵ်ႈလၢႆႈ၊ လူင်ပွင်ၸိုင်ႈၼႆႉ ၶဝ်ၶႂ်းလႅၵ်ႈလၢႆႈတႃႇသေႇယဝ်ႉ။

ပၢင်လိူၵ်ႈတင်ႈသွမ်ႈ လိူၼ်ဢေႊပရိူဝ်ႊ ဝၼ်းတီႈ 1 တီႈၼႂ်းဝဵင်းၵဵင်းတုင် ၸိုင်ႈတႆးပွတ်းဢွၵ်ႇၼၼ်ႉ ပႃႇတီႇၵၢၼ်မိူင်း ၸိူဝ်းၶဝ်ႈၶႅင်ႇၵၼ် တင်းမူတ်းမီး 6 ပႃႇတီႇ ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ပႃႇတီႇဢႃးၶႃႇ၊ ပႃႇတီႇလႃးႁူႇ၊ ပႃႇတီႇၼူၵ်ႉယုင်းလႄႈ ပႃႇတီႇသၢင်ႇသီႈ။ ပႃႇတီႇဢၼ်လႆႈၶႅပ်းၵၢင်ၸႂ်ၼမ်သုတ်းသေ ပေႉၵႂႃႇပဵၼ် ပႃႇတီႇသၢင်ႇသီႈ (USDP) ။

ၼၢင်းသႅင်ၽူး