ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ ၼႂ်းမိူင်းတူင်ႇတၢင်ႇပိုၼ်ႉတီႈၼႆႉ ၸတ်းႁဵတ်းတီႈ ဝဵင်းတူၼ်ႈတီး မီး ၽူႈၶဝ်ႈႁူမ်ႈ 400 ပၢႆ တၢင်ႇၽိုၼ်လိၵ်ႈဢၼ်ႁၢင်ႈႁႅၼ်းမႃး ၽႂ်မၼ်း 70 ၽိုၼ် လႄႈ လိၵ်ႈပၼ် တၢင်းၶႆႈၸႂ် 45 ၽိုၼ်။ ၼႂ်းႁူဝ်ၶေႃႈ ၵၢၼ်မိူင်း၊ ၵၢၼ်ပၢႆးမၢၵ်ႈမီးလႄႈ လွင်ႈၶူဝ်း ၶွင်ၼိူဝ်လိၼ်တႂ်ႈ လိၼ် ဢၼ်ဢဝ်ပိူင်ၾႄႊတရႄႊပဵၼ်ငဝ်ႈ ၶၢမ်ႇပိုၼ်ႉသေ ၸတ်းႁဵတ်း။

ၸုမ်းလူင်ပွင်ၸိုင်ႈမိူင်းတႆး ဢွၼ်ႁူဝ် ၼမ်းၼႃႈ ၸတ်းႁဵတ်းပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈ ၼႂ်းမိူင်းတူင်ႇတၢင်ႇပိုၼ်ႉတီႈ တႃႇၶၢဝ်း တၢင်း 3 ဝၼ်း ဝၼ်းတီႈ 23-25/04/2017 တီႈႁူင်းႁေႃမဵဝ်ႉ တေႃႇၶၢၼ်းမ ဝဵင်းတူၼ်ႈတီး ၸိုင်ႈတႆး ပွတ်းၸၢၼ်း။ 

တွၵ်ႊတိူဝ်ႊမဵဝ်းထုၼ်း ၽွင်ႈလူင်ၾၢႆႇတူင်ႇဝူင်းၵူၼ်း လၢတ်ႈဝႃႈ “ ဢၼ်လႆႈၸတ်းႁဵတ်း ပၢင်ၵုမ်ပွၵ်ႈ ၼႆႉၵေႃႈ တႃႇတေလႆႈလွင်ႈငမ်းယဵၼ်မၼ်ႈၵိုမ်းယိုၼ်းယၢဝ်း၊ တႃႇႁႂ်ႈတင်းသဵင်ႈ ၶဝ်ႈႁူမ်ႈဢုပ်ႇ ဢူဝ်းၸွမ်း ၶၵ်ႉတွၼ်ႈ မိူၼ်ၼင်ႇ ႁူဝ်ၶေႃ ၵဵဝ်ႇလူၺ်ႈလွင်ႈၸိူဝ်ႉၸၢတ်ႈ ၸၢဝ်းၶိူဝ်းၽႂ်မၼ်း၊ ပိုၼ်ႉတီႈၽႂ်မၼ်းလႄႈ လွင်ႈတၢင်းၽႂ်မၼ်း။ ယူႇတီႈပၢင်ၵုမ်ၼႆႉသေ ၶေႃႈမုလ်းၽိုၼ်လိၵ်ႈ ဢၼ်လႆႈမႃးၼၼ်ႉ တေဢဝ်ၵႂႃႇတၢင်ႇလၢတ်ႈတီႈၼႂ်းပၢင်ၵုမ်လူင်ပၢင်လူင် ႁူဝ်ပၢၵ်ႇပီ 21 ပွၵ်ႈၵမ်းသွင် တေထိုင်ၼႆႉ” ဝႃႈၼႆ။

ၽူႈတႅၼ်းပႃႇတီႇၵၢၼ်မိူင်း၊ ၵူၼ်းမိူင်းၼႂ်းပိုၼ်ႉတီႈ ၸိူဝ်းမႃးၶဝ်ႈႁူမ်ႈ ပၢင်ၵုမ်ၵၢၼ်မိူင်း ၸၼ်ႉၸိူဝ်ႉ ၸၢတ်ႈ ၼႂ်းမိူင်းတူင်ႇတၢင်ႇၼႆႉ ဢွၼ်ၵၼ်ဝႃႈ ယွၼ်ႉဝႃႈ ႁိပ်ႈၼႅတ်ႈၼႃႇလႄႈ ဢမ်ႇတၼ်းလႆႈ ႁၢင်ႈႁႅၼ်းတူဝ်ႈတၼ်းသင် ဝႃႈၼႆ။

ၼၢင်းမျႃႉဢူး တူဝ်တႅၼ်းပႃႇတီႇႁူဝ်သိူဝ် SNLD လၢတ်ႈဝႃႈ “ တၢင်းမုင်ႈမွင်းတႄႉ မၼ်းဢမ်ႇပေႃး မီးၼမ် ႁဵတ်းသင်လႄႈၼႆ ပၢင်ၵုမ်ၸၢဝ်းၶိူဝ်းတႆးႁဝ်းၵေႃႈ ပႆႇလႆႈႁဵတ်း တၢင်းမုင်ႈမွင်းႁဝ်းၵေႃႈ တေဢမ်ႇဢွၵ်ႇၼမ် သဵင်ႁူဝ်ၸႂ်ၵူၼ်းမိူင်းႁဝ်းၵေႃႈ ဢမ်ႇလႆႈထွမ်ႇသဵင်ၶဝ်သေဢိတ်း တႃႇတေမုင်ႈ မွင်းဢၼ်ယႂ်ႇယႂ်ႇတႄႉၵေႃႈပႆႇမီး။ ၵူၺ်းၵႃႈ ဢၼ်ၶဝ်ၸႂ်ႉတၢင်ႇ ၽိုၼ်လိၵ်ႈၼၼ်ႉၵေႃႈ ႁဝ်းၶဝ်လႆႈ ႁၢင်ႈႁႅၼ်းမႃးယူႇ၊ ႁၢင်ႈႁႅၼ်းသေတႃႉၵေႃႈသမ်ႉဢမ်ႇလႆႈသူင်ႇဝႆႉလူင်ႈၼႃႈမၼ်း ၶဝ်သမ်ႉၸင်ႇ ႁႃလၢတ်ႈမႃး ၼႂ်းဝၼ်း သွင်ဝၼ်းၼႆႉၵူၺ်း ဝႃႈၼႆ။

ၵဵဝ်ႇၵပ်းလွင်ႈၼႆႉ ၸၢႆးဢွင်ႇမိၼ်ႉ တူဝ်တႅၼ်းပႃႇတီႇသိူဝ်ၽိူၵ်ႇ SNDP လၢတ်ႈဝႃႈ “ ပၢင်ၵုမ်ၼႆႉ ယူႇတီႈလူင်ပွင်ၸိုင်ႈမိူင်းတႆးၶဝ် ႁိပ်ႈၼႅတ်ႈႁဵတ်းဝႆးလႄႈ လွင်ႈၵၢင်ၸႂ်ၵူၼ်းမိူင်း တေဢမ်ႇပႃး ၼမ် မၼ်းပဵၼ်လွင်ႈၶပ်းၶိုင်ၶဝ်လႄႈ လႆႈႁဵတ်းၸွမ်းၵႂႃႇၸိူင်ႉၼၼ်ၵူၺ်း တီႈတႄႉပေႃးတေႁဵတ်းၼႆ မၼ်းလူဝ်ႇပၼ်ၶၢဝ်းယၢမ်းၼမ်ဢိတ်းၼိုင်ႈ ႁႂ်ႈပေႃႈမႄႈၵူၼ်းမိူင်းႁူႉပွင်ႇ” ဝႃႈၼႆ။

ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ ၼႂ်းမိူင်းတူင်ႇတၢင်ႇပိုၼ်ႉတီႈ ဢၼ်လႆႈၸတ်း ႁဵတ်းတႃႇ ၶၢဝ်းတၢင်း 3 ဝၼ်းၼႆႉ ယူႇတီႈတူဝ်တႅၼ်း ၼႃႈလိၼ်ၽွင်းငမ်းတူဝ်ငဝ်ႇ၊ ၼႂ်းမိူင်းတူင်ႇတင်ႇပိုၼ်ႉတီႈ ၸွမ်းၸႄႈတွၼ်ႈ ၼႂ်းၸိုင်ႈတႆး လႆႈယိုၼ်ႈလိၵ်ႈၶိုၼ်ႈမႃး ၵဵဝ်ႇၵပ်းၵၢၼ်မိူင်း 26 ၽိုၼ်၊ ၵၢၼ်မၢၵ်ႈမီး 23 ၽိုၼ်လႄႈလွင်ႈၶူဝ်းၶွင်ၼိူဝ်လိၼ်တႂ်ႈလိၼ် 21 ၽိုၼ် ႁူမ်ႈၵၼ်တင်းမူတ်း 70 ၽိုၼ်။ ၼႂ်းၽိုၼ်လိၵ်ႈ 70 ၽိုၼ် တေၽိတ်ႈမွၵ်ႇ ၶူးပူင်သွၼ် ၼႂ်းႁူင်းႁဵၼ်းၸၼ်ႉၸွမ် မႃးႁုပ်ႈၶေႃႈမုလ်း မဵဝ်းလႂ် ၼိုင်ႈၽိုၼ် ႁႂ်ႈႁုပ်ႈၶေႃႈမုလ်းပဵၼ် 3 ၽိုၼ် တွၼ်ႈတႃႈတေဢဝ်ၵႂႃႇဢုပ်ႇဢူဝ်း ၼႂ်းပၢင်ၵုမ်လူင် ပၢင်လူင်ႁူဝ်ပၢၵ်ႇပီ 21 ပွၵ်ႈၵမ်းသွင် ဢၼ်တေၸတ်းႁဵတ်း ၼႂ်းလိူၼ်မေႊ တေထိုင်မႃးၼႆႉ ဝႃႈၼႆ။

ပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈ ၼႂ်းမိူင်းတူင်ႇတၢင်ႇပိုၼ်ႉတီႈၼႆႉ မီးတူဝ်တႅၼ်း မႃးၶဝ်ႈႁူမ်ႈ မိူၼ်ၼင်ႇ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၊ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA တင်း ၸုမ်းသိုၵ်းပူတ်းပွႆႇၸိူဝ်ႉၸၢတ်ႈ ပဢူဝ်း PNLO ၊ ၸုမ်းလူင်ပွင်ၸိုင်ႈမိူင်းတႆး၊ တူဝ်တႅၼ်းတပ်ႉသိုၵ်းမၢၼ်ႈ၊ တူဝ်တႅၼ်းပႃႇတီႇၵၢၼ်မိူင်း၊ တူဝ်တႅၼ်းၼႃႈလိၼ်ၽွင်းငမ်းတူဝ်ၵဝ်ႇ၊ တူဝ်တႅၼ်းၸုမ်းတူင်ႇဝူင်းၵူၼ်းလႄႈ တူဝ်တႅၼ်းၸုမ်း ၵေႃလိၵ်ႈလၢႆးၾိင်ႈငႄႈ ၸၢဝ်းၶိူဝ်း တင်းမူတ်း မႃးၶဝ်ႈႁူမ်ႈ 400 ပၢႆ ၼႆယဝ်ႉ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 25/04/2017