ႁူင်းႁဵၼ်းၸၼ်ႉဢွၼ် ၼႂ်းဝၢၼ်ႈပၢင်ႇၵူဝ်း ၸႄႈဝဵင်းမိူင်းယႆ ဢၼ်ၵူၼ်း ဝၢၼ်ႈဢွၼ်ၵၼ်ႁဵတ်းဝႆႉ တႃႇလုၵ်ႈဢွၼ်ႇၼႂ်းမူႇဝၢၼ်ႈ ပေႃႈတေလႆႈၶိုၼ်ႈႁဵၼ်းသွၼ်ၵႂႃႇၼၼ်ႉ ယွၼ်ႉဝႃႈ ၾူၼ်လူင်လူမ်းလူင် 

ပတ်ႉပိဝ်ၵွၵ်းဢွၵ်ႇ လဵၵ်းမုင်းတင်း ၽႃၵင်ႈ ႁူင်းႁဵၼ်းၵႂႃႇ ဝႃႈၼႆ။

လူမ်းလႅင်ႉၽတ်ႉပဝ်ႇၶဝ်ႈမိူင်းယႆ ဝၼ်းတီႈ 23/04/2017 ယၢမ်းဝၢႆးဝၼ်း 4 မူင်းပၢႆ။ ႁူင်းႁဵၼ်းၵိင်ႇၽႄ ၸၼ်ႉဢွၼ် တင်းၵွင်းမူး ၼႂ်းဝၢၼ်ႈပၢင်ႇၵူဝ်း ဢိူင်ႇၼွင်မူဝ် ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆး

ပွတ်းႁွင်ႇ လဵၵ်းမုင်းႁူင်းႁဵၼ်းလႄႈ ၽႃၵင်ႈ ပိဝ်ၸွမ်းလူမ်း၊ ထီးၵွင်းမူးၼၼ်ႉၵေႃႈႁၵ်း။ 

ၸၢႆးမျိၼ်ႉထူး ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ပႃႇတီႇႁူဝ်သိူဝ် SNLD လၢတ်ႈဝႃႈ 

“ ႁူင်းႁဵၼ်း ၼႂ်းဝၢၼ်ႈပၢင်ႇၵူဝ်းၼၼ်ႉ ယူႇတီႈၵူၼ်း ဝၢၼ်ႈၵူၼ်းသူၼ် ႁူမ်ႈၵၼ်သေ သၢင်ႈဝႆႉ ၼင်ႇၵႃႈပွင်ပဵၼ်လႆႈ။ လဵၵ်းမုင်းၵေႃႈသမ်ႉဢဝ်မႆႉသေ ငႅပ်ႈဝႆႉ၊ ၽႃၵင်ႈမၼ်းၵေႃႈ ၸၵ်းၽႃမႆႉသေၵင်ႈဝႆႉၵူၺ်းလႄႈ ပေႃးလူမ်းမႃးၼႆ ဢမ်ႇသူႈလႆႈႁႅင်းလူမ်း ယွၼ်ႉၼၼ်လႄႈ လဵၵ်းမုင်းတင်းၽႃၵင်ႈၵေႃႈ လႆႈပိဝ်ၵွၵ်းဢွၵ်ႇသေ လႆႈလူႉလႅဝ်တင်းၼမ်” ဝႃႈၼႆ။

လွင်ႈၼႆႉတႄႉ ပဵၼ်ပၢႆးပၺ်ၺႃတႃႇလုၵ်ႈဢွၼ်ႇ-မၼ်းလမ်ႇလွင်ႈတႄႉတႄႉ။ ၵွပ်ႈၼႆ ႁဝ်းၶႃႈတေႁႃတၢင်းၸွႆႈထႅမ်တီႈၾၢႆႇပၢႆးပၺ်ၺႃၶဝ် တႃႇၶိုၼ်းသၢင်ႈပၼ်ၶိုၼ်းႁူင်းႁဵၼ်းလင်မႂ်ႇ ဝႃႈၼႆ။

ၼႂ်းဝၢၼ်ႈပၢင်ႇၵူဝ်းၼႆႉ ဢၼ်ထုၵ်ႇလူမ်းလူင်ပတ်ႉပဝ်ႇႁၢဝ်ႈႁႅင်းသေ လႆႈလူႉလႅဝ်ၵႂႃႇတႄႉ မီးႁူင်းႁဵၼ်း ၸၼ်ႉဢွၼ်လႄႈ ထီးၵွင်းမူး။ လွင်ႈႁိူၼ်းၵူၼ်းတႄႉ ဢမ်ႇပဵၼ်သင် ၵူၼ်းလူႉ တၢႆမၢတ်ႇၸဵပ်းၵေႃႈ 

ဢမ်ႇမီး ဝႃႈၼႆ။

ၸၢႆးမျိၼ်ႉထူးလၢတ်ႈဝႃႈ ထီးၵွင်းမူးပူတ်းတူၵ်းၼၼ်ႉ ယွၼ်ႉဝႃႈ ပဵၼ်ၵွင်းမူး ဢၼ်ၵဝ်ႇၵႄႇ ပီယၢဝ်းၶၢဝ်းႁိုင်

ယဝ်ႉ ဝႃႈၼႆ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 25/04/2017