ၸုမ်းပီႇတုၸိတ်ႉ မၢၼ်ႈပၢင်ႇ ဢိင်ဢၢင်ႈဝႃႈ မူႇၸုမ်းထူပ်းတၢင်းယၢပ်ႇၽိုတ်ႇၼႆသေ တုၵ်းယွၼ်း ႁႂ်ႈၵူၼ်းဝၢၼ်ႈ/ ၵူၼ်းမိူင်း ၼႂ်းၼႃႈတီႈၶဝ်တူင်ႉ ၼိုင်ၵႂႃႇမႃး ၸွႆႈထႅမ်ငိုၼ်းတွင်း ၼိုင်ႈဢိူင်ႇလႂ် ၼပ်ႉႁူဝ်သႅၼ်။

ဝၼ်းတီႈ 22/02/2017 ၸုမ်းပီႇတုၸိတ်ႉ မၢၼ်ႈပၢင်ႇ ႁွင်ႉပူႇၵၢင်ႉ/ၵႄႇ(ဢုၵ်ႉၵထ) ၼႂ်းဢိူင်ႇ မိူင်းၵႅင်၊ ဢိူင်ႇၼမ်ႉႁူးလွႆၵႃ၊ ဢိူင်ႇပၢင်ၺွင်ႇ၊ ဢိူင်ႇၼႃးၼိဝ်ႉ ၸိူဝ်းၼႆႉမႃးၶဝ်ႈႁူမ်ႈ ပၢင်ၵုမ်  တီႈဝၢၼ်ႈလူင်မိူင်းၵႅင်၊ ဢိူင်ႇမိူင်းၵႅင်၊ ၸႄႈဝဵင်းတၢင်ႉယၢၼ်း ၸိုင်ႈတႆး ပွတ်းႁွင်ႇ။ ယူႇတီႈၸဝ်ႈ ၼႃႈတီႈ ၽူႈၵွၼ်းဢိူင်ႇမိူင်းၵႅင် လုင်းသၢင်ႇလဵၵ်းတင်း ၽူႈၵွၼ်းၼႃႈတီႈ ၼွင်လႅင် သႅဝ်းၽႃ လၢတ်ႈဝႃႈ တေလႆႈသႂ်ႇငိုၼ်းၵၼ်ႇတေႃးပူဝ်ႇမူၼ်း ဢိင်ၼိူဝ် ဝၢၼ်ႈလဵၵ်ႉ/ ယႂ်ႇ၊ ဢိူင်ႇလဵၵ်ႉ/ယႂ်ႇသေ ၼိုင်ႈဢိူင်ႇလႂ် တေလႆႈသႂ်ႇ 35 သႅၼ်တေႃႇ 50 သႅၼ်ပျႃး၊ ၼိုင်ႈလင်ႁိူၼ်းလႂ် တီႈဢေႇသုတ်း 10000 ထိုင် 15000 ပျႃး။ ၼွၵ်ႈလိူဝ်ၼၼ်ႉ ပေႃးမီးသူၼ်ယႃႈ တေလႆႈသႂ်ႇ လိူဝ်ထႅင်ႈၶေႃၶေႃ 10000 ပျႃး၊ ႁႂ်ႈသူင်ႇငိုၼ်းယဝ်ႉတူဝ်ႈ ၼႂ်းဝၼ်းတီႈ 27/02/2017 ဝႃႈၼႆ။


ၵူၼ်းမိူင်းထုင်ႉတၢင်ႉယၢၼ်း ၸိူဝ်းၺႃးၵဵပ်းၶွၼ်ႇမႃး ပီယၢဝ်းၶၢဝ်းႁိုင်တႄႉ လၢတ်ႈဝႃႈ ၸွမ်းၼင်ႇ သိုၵ်းၵူၼ်းမိူင်း မၢၼ်ႈပၢင်ႇ ယွၼ်းငိုၼ်းၵူၼ်းမိူင်း ၼႂ်းၼႃႈတီႈၶဝ်ၵုမ်းၵမ်ဝႆႉၼၼ်ႉ ဢၢၼ်ႇႁူဝ် သိပ်းသႅၼ်ပျႃး ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ်။ ဝၢၼ်ႈႁဝ်းၶႃႈတႄႉ ၺႃးသွင်သႅၼ်သီႇမိုၼ်ႇ ၶဝ်ဢမ်ႇယွမ်းပၼ်သေပျႃး၊ ၼင်ႇႁိုဝ် ၵူၼ်းမိူင်းႁဝ်းၶႃႈ တေပူၼ်ႉလွင်ႈယၢပ်ႇ ၽိုတ်ႇၸိူဝ်းၼႆႉ ပိုင်ႈဢိင်မူႇၸုမ်းပႃႇတီႇ ၵၢၼ်မိူင်းလႄႈ ၸုမ်းၵေႃႁူမ်ႈသၢင်ႈ ႁဝ်းၶဝ်ၵူႈမူႇၵူႈၸုမ်း ႁႂ်ႈၸွႆႈထႅမ် ၵႄႈလိတ်ႈ ပၼ်သေၵမ်း ဝႃႈၼႆ။


ၵူၼ်းမိူင်းပၢတ်ႇၶဝ်ၵေႃႈလၢတ်ႈဝႃႈ  ၸုမ်းပီႇၸုၸိတ်ႉ မၢၼ်ႈပၢင်ႇၼႆႉ ၼွၵ်ႈလိူဝ်သေ ယွၼ်းငိုၼ်း ၵဵပ်းၶွၼ်ႇယဝ်ႉ ယင်းၵဵပ်းပႃးၶဝ်ႈသၢၼ်ၼမ်ႉမၼ်းထႅင်ႈ။ ပေႃးၶဝ်ယွၼ်းမႃးသေ ဢမ်ႇၵဵပ်းပၼ်ၸိုင် ၺႃးတီႉၺွပ်းဢဝ်ၵႂႃႇၵုမ်းၶင်ပေႃႉထုပ်ႉထႅင်ႈ ဝႃႈၼႆ။


ၼႃႈတီႈ ၵုမ်းၵမ်ၸုမ်းပီႇတုၸိတ်ႉမၢၼ်ႈပၢင်ႇ ဢၼ်တူင်ႉၼိုင်ၵႂႃႇမႃး ပၵ်းသဝ်းသမ်ႉ မိူၼ်ၼင်ႇ ဢိူင်ႇၼမ်ႉႁူးလွႆၵႃ၊ ပၢင်ၺွင်ႇ၊ မိူင်းၵႅင်၊ ပၢင်ၼွႆႉ/ၼႃးၼိဝ်ႉ ၸိူဝ်းၼႆႉသမ်ႉ ယူႇၼႂ်းၼႃႈတီႈ ၵုမ်းၵမ် တပ်ႉမိူင်းၵႅင်။ ဢိူင်ႇၼမ်ႉၶူႉသႄႈ၊ ၼွင်လႅင်၊ ၼမ်ႉႁူးၼွင်လႅင်၊ ပၢင်လဝ်ႇ/ပႃႇၽၢင်၊ ၵွင်းသၢင်း ၸိူဝ်းၼႆႉသမ်ႉ ယူႇၼႂ်းၼႃႈတီႈၵုမ်းၵမ် တပ်ႉဢိူင်ႇၼွင်လႅင်။ ဢိူင်ႇမၢၼ်ႈၵၢတ်ႇ၊ မိူင်းတွမ်း၊ မိူင်းမႃး၊ လွႆဝေႃး(မၢၼ်ႈပၢင်ႇ)၊ မၢၼ်ႈပၢင်ႇၵွင်းမူး၊ လွႆပႅၵ်ႇ ၸဵမ်ၸိူဝ်းၼႆႉသမ်ႉ ယူႇၼႂ်းၼႃႈတီႈၵုမ်းၵမ် တပ်ႉမၢၼ်ႈပၢင်ႇ။ ဢိူင်ႇၵုင်းမူင်ႈ၊ မိူင်းပၢတ်ႇ၊ ႁူဝ်ပၢတ်ႇ ၸဵမ်ၸိူဝ်းၼႆႉသမ်ႉ ယူႇၼႂ်းၼႃႈတီႈၵုမ်းၵမ် တပ်ႉပၢင်သဝ်းတီႈၵုင်းမူင်ႈ ဝႃႈၼႆ။