ပၢင်သွၼ်လင်ႇၵႃႇလိၵ်ႈလူင် ပွၵ်ႈၵမ်း 1 သၼ်လွႆၶိူဝ်း ဢိူင်ႇမိူင်းၶိူဝ်း ၸႄႈဝဵင်းသီႇပေႃႉ၊ မီးပီႈၼွင်ႉၵူၼ်းမိူင်း ၶိုၼ်ႈႁွတ်ႈၶဝ်ႈႁူမ်ႈလဵပ်ႈႁဵၼ်း ႁိမ်းပၢၵ်ႇ။

တင်ႈတႄႇဝၼ်းတီႈ 26/02/2017 တေႃႇထိုင်ဝၼ်းတီႈ 02/03/2017 (ၶၢဝ်းတၢင်း 7 ဝၼ်း) မီးပၢင်သွၼ်လင်ႇၵႃႇ လိၵ်ႈလူင် ပွၵ်ႈၵမ်းၼိုင်ႈ သၼ်လွႆၶိူဝ်း ဢိူင်ႇမိူင်းၶိူဝ်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ၽူႈပူင်သွၼ် မီးမိူၼ်ၼင်ႇ 1.ၸရေးဝႃႇလိင်ႇ။ 2.ၸရေးသၢင်ႇမျႃႉ။ 3.လၢႆးသႂ်ၵမ်ႇ ၸိူဝ်းၼႆႉ။ မီးၽူႈၶိုၼ်ႈႁွတ်ႈၶဝ်ႈႁူမ်ႈ မွၵ်ႈႁိမ်းပၢၵ်ႇ- ၼႆယဝ်ႉ။


လုင်းၸရေးဝႃႇလိင်ႇ ယူႇဝၢၼ်ႈငူင်ႉၸၢင်ႉ လွႆၶိူဝ်း၊ ၵေႃႉႁၢပ်ႇၵၢၼ် ၵႅမ်ၶိင်းႁူဝ်ဝတ်ႉ လၢတ်ႈၼႄတၢင်းယိူင်းဢၢၼ်း ဢၼ်လႆႈၸတ်းပၢင်သွၼ် လင်ႇၵႃႇလိၵ်ႈလူင်ဝႃႈ- "ၼင်ႇႁိုဝ်လိၵ်ႈလူင် လင်ႇၵႃႇတႆးႁဝ်းပေႃးတေဢမ်ႇႁူင်ႈဢမ်ႇႁၢႆ၊ သိုပ်ႇမီးသၢႆၸႂ်ႁႂ်ႈပေႃးႁိူဝ်ႈႁိူင်း တေႃႇၸူဝ်ႈလုၵ်ႈပၢၼ်လၢၼ်ၼၼ်ႉသေ ၸင်ႇလႆႈၸတ်းႁဵတ်း"-ဝႃႈၼႆ။


သိုပ်ႇလၢတ်ႈဝႃႈ- ပူင်သွၼ်ပၼ်လၢႆးဝႆႉဝၢင်းသဵင်မၼ်း ပဵၼ်လၢႆးလူလိၵ်ႈပွတ်းႁွင်ႇ၊ ပဵၼ်လၢႆးတဵၵ်းသဵင်ၼိုင်ႈတွၼ်ႈ ပွႆႇသဵင်ၼိုင်ႈတွၼ်ႈ၊ ၸိူင်ႉၼင်ႇဝႃႈ ႁုင်ႉမိၼ် သိူဝ်ပႆ ၵႆႇၶၼ် ၸၢင်ႉၵႂႃႇ ၸိူင်ႉၼင်ႇဢၼ်ၶူးဝႃးသြႃႇႁဝ်းၶဝ် သိုပ်ႇသွၼ်ၵၼ်မႃးၼၼ်ႉ ဝႃႈၼႆ။ ၼွၵ်ႈသေၼၼ်ႉ ယင်းတိုၵ်းသူၼ်းထႅင်ႈဝႃႈ ၶႅၼ်းတေႃႈၶတ်းၸႂ် သိုပ်ႇသွၼ်ၵႂႃႇ ၵူႈတီႈၵူႈတၢင်းၵူႈဝၢၼ်ႈၵူႈမိူင်း တင်းသဵင်ႈၶႃႈ- ဝႃႈၼႆ။


ၸၢႆးဢွင်ႇသႃႇ ဝၢၼ်ႈမွၼ်း လွႆၶိူဝ်း ၽူႈၶဝ်ႈႁူမ်ႈပၢင်သွၼ်လၢတ်ႈဝႃႈ- "လၢႆးၵႂႃႇလင်ႇၵႃႇလိၵ်ႈလူင်ႁဝ်း မိူၼ်ၼင်ႇသဵင်ၶဵင်ႈသဵင်ယၢၼ်း၊ တီႈၵိုတ်း၊ တီႈတိုင်ႈၸိူဝ်းၼႆႉလႂ်။ ၼႂ်းၵႃႈလင်ႇၵႃႇၸိူဝ်းၼႆႉ လႆႈတိူဝ်းႁူႉလိၵ်ႈႁဝ်း ၵႂၢမ်းႁဝ်း။ ပဵၼ်ၵၢၼ်ၶိင်းၼၢႆးၸၢႆးယိင်းႁဝ်းၶႃႈ သၢမ်ပၢၼ်ၸဵတ်းသႅၼ်း ထုၵ်ႇလီႁူႉဢဝ်သွၼ်တူဝ်သွၼ်ၸႂ် ၵႂႃႇဝၼ်းလိုၼ်းမိူဝ်းၼႃႈလႄႈ ပဵၼ်ၵၢၼ်ပႂ်ႉပႃးၾိင်ႈငႄႈလိၵ်ႈလၢႆးၵႂၢမ်းလၢတ်ႈႁဝ်းၵေႃႈၸႂ်ႈ၊ ပဵၼ်ၵၢၼ်ပႂ်ႉပႃးလူလွမ်ပုတ်ႉထသႃသၼႃႁဝ်းၵေႃႈၸႂ်ႈ၊ ယွၼ်ႉၼႆ ၸင်ႇမီးလွင်ႈသူၼ်ၸႂ်ၵၢၼ်ႁဵၼ်း လင်ႇၵႃႇလူင်ၼႆႉ"- ဝႃႈၼႆ။


ၼၢင်းသႅင်ၼူၼ်း ဝၢၼ်ႈမွၼ်း လွႆၶိူဝ်း ၽူႈၶဝ်ႈႁူမ်ႈပၢင်သွၼ်လၢတ်ႈဝႃႈ- ယူႇတီႈပဵၼ်ၼၢင်းယိင်းၵေႃႉၼိုင်ႈသေ ပေႃးမေႃလင်ႇၵႃႇၵႂႃႇယဝ်ႉ တေၵႂႃႇၸႂ်ႉတိုဝ်းတီႈလႂ်ဢၼ်ဝႃႈၼၼ်ႉ မေႃဝႆႉၶႅၼ်းသေဝႆႉမေႃ။ ႁူမ်ႈဝႃႈလင်ႇၵႃႇတႆး ႁဝ်းၼႆႉ သုၼ်ႇလႆႈၼၢင်းယိင်းႁဝ်းဢမ်ႇမီးၼႆသေတႃႉၵေႃႈ ပေႃးဝႃႈႁဝ်းပႃးၸႂ်သူင်ၸႂ်ႁႅင်းၸိုင် တႅမ်ႈလင်ႇၵႃႇ ၸိူဝ်းၼႆႉၵေႃႈလႆႈယူႇ။ မိူဝ်ႈႁဝ်းပဵၼ်ၽူႈထွမ်ႇ မိူဝ်ႈဢၼ်ပိူၼ်ႈႁေႃးၼၼ်ႉၼႆၵေႃႈ ႁဝ်းၶႃႈၵေႃႈမေႃၸႅၵ်ႇၽႄႁူႉၸၵ်း ၼမ်ႉၵႂၢမ်းပိူၼ်ႈ ၽွင်ႈယူႇၶႃႈ၊ တႃႇႁႂ်ႈမီးႁႅင်းၸႂ်ၼၼ်ႉ ႁဝ်းတေလႆႈဢဝ်ၶူးမေႃလိၵ်ႈလူင်ၼၢင်းၶမ်းၵူႇ ႁဵတ်းတွၼ်ႈသွၼ်ၵႂႃႇၶႃႈဢေႃႈ"-ဝႃႈၼႆ။