တႃႇၶဝ်ႈၶေႉၶဵင်ႇပၢင်လိူၵ်ႈတင်ႈသွမ်ႈ ဢၼ်တေၸတ်းၼႂ်းလိူၼ် ဢေႊပရိူဝ်ႊလ် 2017 တေမႃးၼႆႉ ၼႆသေ ပႃႇတီႇတႆး လူင်းသူၼ်းတုမ်ၵူၼ်းမိူင်း ၼႂ်းၸိုင်ႈတႆးပွတ်ႊၸၢၼ်း ၸႄႈဝဵင်းမိူင်းသူႈလႄႈ ၵေးသီး။

ၸၢႆးဢၢႆႈပဝ်း ႁူဝ်ပဝ်ႈပႃႇတီသိူဝ်ၽိူၵ်ႇ တိုၵ်းသူၼ်းၵူၼ်းမိူင်း ႁႂ်ႈလိူၵ်ႈတွတ်ႈၶႅပ်းၵၢင်ၸႂ် ပၼ်ပႃႇတီႇဢၼ်တေ ၸၢင်ႈၸွႆႈထႅမ် ႁဵတ်းပၼ်ၽွၼ်းလီၵူၼ်းမိူင်းလႆႈတဵမ်ထူၼ်ႈ။


တင်ႈဢဝ်ဝၼ်းတီႈ 26 – 27 /02/2017 မႃးတေႃႇထိုင်ယၢမ်းလဵဝ် ၼေႃႇၽူႈတႅၼ်း  တီႇမူဝ်ႇၶရႅၵ်ႉတိၵ်ႉပႃႇတီႇ ၸၢဝ်းၶိူဝ်းတႆး( ႁိုဝ် ) ပႃႇတီႇသိူဝ်ၽိူၵ်ႇ SNDP လူင်းႁူပ်ႉထူပ်းၵူၼ်းမိူင်း ၼႂ်းၸႄႈဝဵင်းၵေးသီး၊ မိူင်းသူႈလၢႆ ဝၢၼ်ႈ မီးၵူၼ်းဝၢၼ်ႈ ၵူၼ်းမိူင်း ၼိုင်ႈဝၢၼ်ႈလႂ်မႃးထွမ်ႇဢမ်ႇယွမ်းပၢၵ်ႇ။


ပၢင်ႁူပ်ႉထူပ်းသူၼ်းတုမ်ၵူၼ်းမိူင်းၼႆႉ ၼေႃႇၽူႈတႅၼ်းပႃႇတီႇ SNDP မွၵ်ႇလၢတ်ႈတိုၵ်းသူၼ်း ႁႂ်ႈၵူၼ်းမိူင်း မေႃလိူၵ်ႈပၼ်ၶႅပ်းၵၢင်ၸႂ် ၽူႈတႅၼ်းဢၼ်တေၸၢင်ႈမႃးပူၵ်းပွင်လႆႈ ပၼ်ၵူၼ်းမိူင်းၼႂ်းဢိူင်ႇဝၢၼ်ႈပိုၼ်ႉတီႈ၊ သွၼ်ပၼ်လၢႆးတွတ်ႈၶႅပ်းၵၢင်ၸႂ်၊ သပ်းလႅင်းၼႄပေႃႇလသီႇပႃႇတီႇ၊ ထၢမ်လွင်ႈတၢင်းယၢပ်ႇၽိုတ်ႇၵူၼ်းမိူင်း ၸိူဝ်းၼႆႉ။


ၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ လၢတ်ႈဝႃႈ - “ပီႈၼွင်ႉၵူၼ်းမိူင်းၵူႈၵေႃႉ ပေႃးတေတွတ်ႈၶႅပ်း ၵၢင်ၸႂ်ၸိုင် ႁႂ်ႈလဵပ်ႈႁဵၼ်းလီလီသေၸင်ႇပၼ်ၶႅပ်းၵၢင်ၸႂ်သေၵမ်း၊ ပေႃးႁဝ်းလိူၵ်ႈၽိတ်းၸိုင် ၼႃႈဝၢၼ်ႈတႃသူၼ်ႁဝ်းၵေႃႈ ဢမ်ႇၶိုၼ်ႈယႂ်ႇ၊  သင်ဝႃႈပႃႇတီႇႁဝ်းပေႉ လႆႈပဵၼ်ၽူႈတႅၼ်းၼႆၸိုင် ၵူၼ်းမိူင်းမီးတၢင်းယၢပ်ႇၸိူင်ႉႁိုဝ်၊ ထူပ်း တၢင်းတုၵ်ႉၶၸိူင်ႉႁိုဝ် တၢင်ႇလၢတ်ႈလႆႈတီႈ ပႃႇတီႇႁဝ်း ၼင်ႇဢၼ်ႁဝ်းပွင်ပဵၼ်လႆႈၼၼ်ႉ တေၶတ်းၸႂ်ပွင် သၢင်ႈပၼ်ပေႃႈမႄႈၵူၼ်းမိူင်းယူႇ။ တေၶတ်းၸႂ်ၶိုင်ပွင်ႁဵတ်းသၢင်ႈ ၸွႆႈထႅမ်ပၼ်ၵူၼ်းမိူင်းႁဝ်းယူႇ ” ဝႃႈၼႆ။


ဝၼ်းတီႈ01/04/2017 တေမႃးၼႆႉ တၢင်းၾၢႆႇၶွမ်ႊမသျိၼ်ႊပၢင်လိူၵ်ႈတင်ႈ တေၸတ်းႁဵတ်း ပၢင်လိူၵ်ႈ တင်ႈသွမ်ႈ။ ၼႂ်းမိူင်းတႆးမီးတီႈၼင်ႈ ၽူႈတႅၼ်းသၽႃးပဝ်ႇႁၢမ်း 8  တီႈၼင်ႈ။ ပႃႇတီႇသိူဝ်ၽိူၵ်ႇ ဢၼ်တေ ၶဝ်ႈၶေႉၶဵင်ႇလိူၵ်ႈတင်ႈ မီး 7 တီႈၼင်ႈ ။မိူၼ်ၼင်ႇ ၼႂ်းၸႄႈဝဵင်းၵေးသီး 3 တီႈၼင်ႈ ၸႄႈဝဵင်းမိူင်းသူႈ 3 တီႈၼင်ႈလႄႈ တီႈဝဵင်းၵဵင်းတုင် 1 တီႈၼင်ႈ။


ၼႂ်းၸႄႈဝဵင်းၵေးသီး ၽူႈတႅၼ်းသၽႃးၵူၼ်းမိူင်း ပႃႇတီႇသိူဝ်ၽိူၵ်ႇ ၼၢင်းတိၼ်ႇဢူး ၸႄႈမိူင်းမၢႆ ၼိုင်ႈ ပဵၼ် ၼၢင်းၼူၺ်းၼူၺ်း မၢႆ 2 ပဵၼ်ၼၢင်းမွၼ်းဢွင်ႇ။ တီႈဝဵင်းမိူင်းသူႈသမ်ႉ  ၽူႈတေၶဝ်ႈၶေႉၶဵင်ႇ သၽႃးၵူၼ်းမိူင်း ၼၢင်းၶမ်းယဵၼ်ႇဢွင်ႇ၊ ၸႄႈမိူင်းမၢႆၼိုင်ႈ ပဵၼ် ၸၢႆးပႃႉထုၼ်း မၢႆသွင်ပဵၼ် ၼၢင်းၸၢမ်ဢူး၊ တီႈဝဵင်းၵဵင်းတုင် ၽူႈတႅၼ်းသၽႃး ၶဵတ်ႇလိူၵ်ႈတင်ႈမၢႆသွင် ပႃႇတီႇသိူဝ်ၽိူၵ်ႇ ပဵၼ် တွၵ်ႊတိူဝ်ႊၸၢႆးယွတ်ႈႁွင် ။


ၼႂ်းပိုၼ်ႉတီႈၼႆႉ လိူဝ်သေပႃႇတီႇသိူဝ်ၽိူၵ်ႇ၊ ႁူဝ်သိူဝ်ယဝ်ႉ မိူၼ်ၼင်ႇပႃႇတီႇၼူၵ်ႉယုင်း ၊ ပႃႇတီႇသၢင်ႇသီႈ ဢိၵ်ႇ ပႃႇတီႇၸၢဝ်းၶိူဝ်းၼႂ်းပိုၼ်ႉတီႈၸိူဝ်းၼႆႉၵေႃႈ တေၶဝ်ႈၶေႉၶဵင်ႇ  - ဝႃႈၼႆ။